Gênesis 24

Ku’toola kwamwa Isaka

1 Itungo lyeni’lo Abalahamu wav’age mukiku’lu' wa myaka mingi, nawe Gu’ku' Mulungu wasangwa wamudosizye ku' vyose. 2 Lu’siku' lu’mo, Abalahamu wamuwi’laga mukumba wakwe u’yo wav’age mukiku’lu' ku’ki’la v’ose na mwi’mi’li’zi muhanya wa nsawo yakwe yose ati', "Tu’u’la mukono gwako mu matango ganne*24:2 Ku’tu’u’la makono mu matango nguno yayo yav’age kwitu’u’li’la mulahi' gwa igambo ihanya. , 3 ki’gele u’lahi’le ku' lina lyamwa Gu’ku' Mulungu, Mulungu wa ilunde na li’welelo ati', u’kasye u’mutozye mwana wanne Isaka mwaniki' mugati' na v’aki’ma v’a Ki’kanaani av’o kwikalile nav’o henanha. 4 Ali’vi u’laye ku' kaya yiswe na ku' v’adu’gu' v’anne, u’kamukoov’ele kwenu’ko muki’ma."

5 Mukumba wakwe wasu’v’yaga ati', "Hamo muki’ma mwenu’yo akaane kwiza nanne ku’no, vihe, nize musu’v’ye mwana wako u’ko wafumi’i’la ev’e?" 6 Abalahamu wayombaga ati', "Ng’o! Witeege muno, ku’du' wize u’musu’v’ye mwana wanne kwenu’ko. 7 Gu’ku' Mulungu, Mulungu wa mu ilunde, u’yo wanfumizye ku' lu’go lwamwa v’av’a, na ku’fuma ku' nsi' i’yo nav’yali’lwa, ndi' walahi’la ku' ku’yomba ati', ‘Wu’v’yalwa wako ndav’ape nsi' yeni’yi'.’ Ku’nguno yeni’yo Mulungu alamutu’me malaika wakwe aku’tongelele ki’gele u’kamuletele mwana wanne muki’ma ku’fuma kwenu’ko. 8 U’lu' muki’ma mwenu’yo wakaana kwilonda nanho, hu' hene mulahi' gwanne gu’kakowola ku’ku’tunga. Sumbwa du', ku’du' wize u’musu’v’ye mwana wanne kwenu’ko." 9 Haho mukumba mwenu’yo watu’u’laga mukono gwakwe mu matango gamwa gu’ku' wakwe Abalahamu. Hene haho walyaga mulahi' gwa igambo lyeni’lo.

10 Hangi' mukumba mwenu’yo wasolaga ntwangawu’lende iku’mi zyamwa gu’ku' wakwe, haki’mo na lu’holo lwingi lwa hekeheke. Wav’ezyaga musi’nzo ku’ya ku' kaya i’yo ikalile Naholi, ku' nsi' ya Mesopotamia. 11 Aho wafikaga kwenu’ko, bi’hi' na kaya hav’age na lwinzi', itungo lyeni’lo yav’age lyu’v’a lya mpi’ndi' aho v’aki’ma v’av’age v’ali’ya ku’kadaha minzi'. Wazisukambyaga ntwangawu’lende zyakwe bi’hi' na lwinzi' lwenu’lo.

12 Haho walombaga, "Ev’e Gu’ku' Mulungu, Mulungu wamwa gu’ku' wanne Abalahamu, nu’ku’lomba u’ngwasye nkinde walelo, na gu’ku' wanne Abalahamu u’muv’ezezye chelu'. 13 Lingaga! Ni’maga henanha bi’hi' na lwinzi' aho v’aniki' v’ikazi v’a kaya yeni’yi' v’ali’wizaga ku’daha minzi'. 14 Gi’si' yi’v’e i’vi: mwaniki' u’yo nku’muwi’la ati', ‘Nu’lomba u’tu’u’le muzoga gwako gwa minzi' u’mpe nywe,’ nawe mbe wasu’v’ya ati', ‘Nywaga ninga ntwangawu’lende zyako nku’zinywisya,’ haho nku’manya ati' hu' mwene wamusogolelaga mukumba wako Isaka, na ku' lyeni’lo nku’manya wamu’v’ezezyaga chelu' gu’ku' wanne."

15 Yav’aga aho akaali' ali’mulomba Mulungu, kasinaga henanho wafumi’i’laga mwaniki' yu’mo lina lyakwe Lebeka, itwi’kile muzoga gwakwe! Lebeka mwenu’yo wav’age mwana wamwa Betueli, na Betueli wav’age mwana wamwa Milika, muki' wamwa Naholi, mudu’gu’ye na Abalahamu. 16 Mwaniki' mwenu’yo wav’age ali' na wu’syu' wu’soga na wa kwiv’elela muno, na wav’age akaali' ku’manya mugosya. Wingi’laga mu lwinzi', wokazyaga minzi' muzoga gwakwe, na wafumaga.

17 Haho mukumba mwenu’yo wangu’haga ku’kapoma nawe, na wamuwi’laga ati', "Nu’ku’lomba u’mpe minzi' madoo ga mu muzoga gwako nywe." 18 Mwaniki' mwenu’yo wasu’v’yaga, "Endita gu’ku', nywaga." Hene haho wagu’sosyaga muzoga gwakwe na wagu’dimi’li’laga ki’gele amunywisye. 19 Aho wamali’laga ku’mupa minzi' wamuwi’laga ati', "Na ntwangawu’lende zyako nku’zidahi’la minzi', ki’gele nazyo zinywe na zifulane." 20 Hohene wav’ezyaga wangu', na wapu’ngu’li’laga minzi' ga mu muzoga gwakwe mu ipango lya ku’nywela mitugo, hangi' wasu’v’aga lu’v’i’lo ku' lwinzi', wadahaga minzi' na ku’zinywisya ntwangawu’lende zyakwe zyose. 21 Itungo lyeni’lo, mukumba mwenu’yo wamulingi’li’laga na wahu’li’kaga akayombile muhayo, ki’gele amanye u’lu' Gu’ku' Mulungu wav’ezyaga musi’nzo gwakwe ku’v’a musoga ninga ng’o.

22 Aho ntwangawu’lende zyafulanaga ku’nywa minzi', mwenu’yo mukumba wamupaga mwaniki' ki’pini cha zahabu ya wu’timbu wa gilamu mukaga, na mabangili av’i’li' zya wu’timbu wa gilamu igana li’mo na maku’mi av’i’li'. 23 Hangi' wamuwu’zyaga, "Ev’e u’li' mwaniki' wa hamwa nde? Nu’ku’lomba u’mbwi’le, vihe, ha lu’go lwinywe yi’li’ho nafasi ya ku’lala?" 24 Mwaniki' mwenu’yo wasu’v’yaga ati', "Ene ni' mwana wamwa Betueli, u’yo mwana wamwa Milika, muki' wamwa Naholi." 25 Hangi' wayombaga, "Ku' wiswe ku’li' na maswa mingi ga ku’di’mi’zya na mawulule ga ku’lali’la ntwangawu’lende, haki’mo na ha ku’lala v’ageni."

26 Haho mukumba mwenu’yo wasukambaga na ku’mukumi’li’zya Gu’ku' Mulungu. 27 Wayombaga, "Akumu’kiwe Gu’ku' Mulungu, Mulungu wamwa gu’ku' wanne Abalahamu, ku’nguno walagi’laga chelu' chakwe na nhana yakwe ku’mwa gu’ku' wanne. Gu’ku' Mulungu wantongelelaga ene mpaka ku’fiki’i’la ku' v’adu’gu' v’amwa gu’ku' wanne!"

28 Haho mwaniki' mwenu’yo wapeelaga ku’ya ku’kav’awi’la nnina na v’adu’gu' v’amwa nnina igambo lyeni’lo. 29 Lebeka wav’age na ilu’mbu’ye u’yo witanagwe Labani. 30 Labani aho waki’wonaga ki’pini na mabangili ku’mwa ilu’mbu’ye, na kwigwa yose i’yo wawi’lagwa na muntu' mwenu’yo, haho wafumaga lu’v’i’lo ku’ya ku’kapoma na muntu' mwenu’yo ku' lwinzi'. Nawe wamusangaga i’mile bi’hi' na ntwangawu’lende zyakwe ha mpelo na lwinzi'. 31 Labani wamuwi’laga, "Kaliwu' ha lu’go ev’e mudosiwa na Gu’ku' Mulungu. Ku’nguno wi’maga ha ibala? Ene nayiv’angaga nnumba na aho ziku’v’a ntwangawu’lende zyako."

32 Hohene mukumba mwenu’yo wamwa Abalahamu wingi’laga mu lu’go. Labani wazitungu’li’laga ntwangawu’lende na wazipaga maswa, na mawulule ga ku’lali’la, haki’mo na minzi' ga ku’kusi’la magu’lu' musav’a na v’antu' v’akwe. 33 Haho v’amwiv’angaga ki’liwa, ali’vi mukumba mwenu’yo wayombaga ati', "Nkav’ile ku’lya mpaka njombe i’cho nu’koov’a ku’yomba". Labani wayombaga, "Haya ku’wi’le."

34 Muntu' mwenu’yo wayombaga, "Ene ni' mukumba wamwa Abalahamu. 35 Gu’ku' Mulungu wamudosizye gu’ku' wanne, nawe wav’ile mundev’a. Wamupile madale ga ng’ombe, nkolo na mbu’li, mawe ga mupango ga feza na zahabu, v’akumba v’a ki’gosya na v’a ki’ki’ma, ntwangawu’lende na mpunda. 36 Nawe Sala, muki' wamwa gu’ku' wanne, wamuv’yali’lile gu’ku' wanne mwana wa ki’gosya mu itungo lya wu’kiku’lu' wakwe, na gu’ku' wanne Abalahamu wamupaga mwana mwenu’yo nsawo yakwe yose. 37 Gu’ku' wanne wandahi’li’zizye ati', ‘Ku’du' wize u’mutozye mwana wanne mwaniki' mugati' na v’aki’ma v’a Ki’kanaani av’o nikalile mu nsi' yav’o. 38 Sumbwa u’laye ku' lu’go lwiswe ku’mwa v’av’a na ku' igongo lyanne, ki’gele u’kamukoov’ele mwana wanne muki’ma.’ 39 Nanne namuwu’zizye ati', ‘Hamo muki’ma mwenu’yo alakaane kwilonda nanne yi’lav’e vihe?’

40 "Hohene wayombaga, ‘Gu’ku' Mulungu u’yo ndondile nzi’la yakwe, alamutu’me malaika wakwe aye nanho na ku’v’ezya musi’nzo gwako gu’v’e musoga, ki’gele u’muletele mwana wanne muki’ma ku’fuma ku' igongo lyanne na nnumba yamwa v’av’a. 41 U’lu' wiza wafika ku' igongo lyanne nav’o v’aleke ku’ku’pa mwaniki' mwenu’yo, haho mulahi' gwanne gu’kasye gu’ku’tunge.’

42 "Walelo aho nafika ha lwinzi' nalombaga, ‘Ev’e Gu’ku' Mulungu, Mulungu wamwa gu’ku' wanne Abalahamu, nu’ku’lomba u’ngwasye musi’nzo gwanne gu’v’e musoga. 43 Lingaga! Gi’si' ni’maga henanha bi’hi' na lwinzi'. Nu’lomba yi’v’e i’vi: Mwaniki' u’yo akwiza ku’daha minzi', nanne mulombe ampe minzi' madoo ga mu muzoga gwakwe nywe, 44 nawe mbe wasu’v’ya ati', "Nywaga ev’e, na ntwangawu’lende zyako nku’zidahi’la," hohene mwenu’yo av’e hu' mwene u’yo wamusogolelaga av’e muki' wa mwana wamwa gu’ku' wanne.’

45 "Yav’aga aho nali' nkaali' ku’mali’la ku’lomba mu moyo gwanne, kasinaga Lebeka wafikaga itwi’kile muzoga gwakwe gwa minzi'! Wingi’laga mu lwinzi' ku’daha minzi', nanne namuwi’laga, ‘Nu’lomba u’mpe minzi' ga ku’nywa.’ 46 Nawe wav’ezyaga wangu' ku’gu’sosya muzoga gwakwe, na wayombaga, ‘Haya nywaga, na ntwangawu’lende zyako nku’zidahi’la.’ Haho nanywaga na ntwangawu’lende zyanne wazidahi’laga minzi', nazyo zyanywaga.

47 "Haho namuwu’zyaga, ‘Ev’e u’li' mwaniki' wa hamwa nde?’ Nawe wasu’v’yaga, ‘Ene ni' mwana wamwa Betueli, u’yo mwana wamwa Milika, muki' wamwa Naholi.’ Haho namuzwi’kaga ki’pini ku' nnindo na mabangili ku' makono gakwe.

48 "Nanne nasukambaga na ku’mudehelezya Gu’ku' Mulungu, Mulungu wamwa gu’ku' wanne Abalahamu, u’yo wantongelelile ku' nzi’la ya nhana ku’fiki’i’la ku' mwaniki' wa wu’du’gu' wamwa gu’ku' wanne ku’nguno ya mwane. 49 Gi’si' mumbwi’le u’lu' muzumizye ku’muv’ezezya gu’ku' wanne chelu' na nhana. U’lu' ng’o, muyombe, ki’gele nanne manye nzi’la ya ku’londa."

50 Aho v’igagwa genago, Labani na Betueli v’asu’v’yaga ati', "Igambo lyeni’li' li’fumile ku’mwa Gu’ku' Mulungu, iswe ku’kakowola ku’yomba muhayo. 51 Lingaga, Lebeka u’yu' aha. Musolage u’ye, na av’e muki' wa mwana wamwa gu’ku' wako, ki’ti' i’vyo Gu’ku' Mulungu wayombile."

52 Yav’aga mukumba mwenu’yo wamwa Abalahamu aho wigagwa mihayo zyeni’zyo, wamuku’v’i’i’laga Gu’ku' Mulungu. 53 Haho wafumyaga vintu' i’vyo viv’eziv’ilwe ku' mupango muhanya gwa feza na zahabu, haki’mo na vizwalo, wamupaga Lebeka. Hangi' wamupaga ilu’mbu’ye na Lebeka haki’mo na nnina vintu' vya mupango muhanya. 54 Haho mweni’ki’li' haki’mo na v’antu' av’o v’av’age nawe v’alyaga, v’anywaga na ku’lala henanho.

Aho v’atunu’laga ndiyu', mukumba mwenu’yo wayombaga, "Nu’lomba ku’su’v’a ku’mwa gu’ku' wanne." 55 Ali’vi ilu’mbu’ye na Lebeka haki’mo na nnina, v’ayombaga ati', "Muleke mwaniki' ikale niswe ki’ti' nsiku' iku’mi hene u’kowolile ku’wu’ka nawe." 56 Nawe wasu’v’yaga ati', "Ku’du' munkendelezye, kwi’si Gu’ku' Mulungu wambezezyaga musi’nzo gwanne ku’v’a musoga. Ndekagi nsu’v’e ku’mwa gu’ku' wanne." 57 Nav’o v’ayombaga, "Leka ku’mwitane mwaniki' mweni’ki’li' kwigwe aku’yomba vihe."

58 Haho v’amwitanaga Lebeka na v’amuwu’zyaga ati', "Vihe, u’li’zumya ku’ya na muntu' mwenu’yu'?" Nawe wasu’v’yaga, "Nku’ya." 59 Hohene v’amulekaga mudu’gu' wav’o Lebeka awu’ke na muzya u’yo wav’age musu’ngi wakwe, v’aye na mukumba wamwa Abalahamu na v’antu' v’akwe.

60 Nav’o v’amudosyaga Lebeka ku' ku’yomba ati',

"Ev’e mwana wiswe, u’v’e muv’yazi wa v’antu' mahu’ya,

na wu’v’yalwa wako wu’kinde v’anisi na ku’tema kaya zyav’o."

61 Haho Lebeka wawu’kaga haki’mo na v’azya v’akwe, nav’o v’aliinaga ntwangawu’lende na ku’mulonda mwenu’yo mukumba wamwa Abalahamu. Vyeni’vyo hu' i’vyo wamusolaga Lebeka na ku’ya nawe.

62 Matungo genago Isaka wasangwa waku’fumile ku' lwandi' lwa Beeli-lahai-loi, na kwikala ku' lwandi' lwa ibalangu' lya Negebu. 63 Lu’siku' lu’mo, mu lyu’v’a lya mpi’ndi', Isaka wayaga mu mugu’nda ku’kiganika, hu' hene wawu’syaga minso gakwe, na ku’wona ntwangawu’lende zizile. 64 Nawe Lebeka, wawu’syaga minso gakwe na ku’muwona Isaka. Haho wasookaga ku' ntwangawu’lende, 65 na ku’muwu’zya mukumba wamwa Abalahamu, "Nde u’yo u’mo mu mugu’nda, izile ku’ku’su’mbi’la iswe?" Mukumba wasu’v’yaga ati', "Mwenu’yo hu' gu’ku' wanne." Haho Lebeka wasolaga shela yakwe na kwikumbi’la ku' wu’syu'.

66 Nawe mukumba mwenu’yo wamutentemuli’laga Isaka gose ago wagav’ezizye.

67 Yav’aga Isaka aho wigagwa vyeni’vyo wamwingi’zyaga Lebeka mu ikutu i’lo lyav’age lyamwa nnina Sala, nawe wamutoolaga. Isaka wamutogagwa Lebeka na ku’pandi’ka ihu’li’kyo lya ku’gulali’lwa nnina.