1 Lu'siku' lu'mo, Gu'ku' Mulungu wamuwi'laga Abulamu, "Wu'ka u'fume mu nsi' i'yi' wikalile, u'v'aleke v'adu'gu'yo na mugana gwamwa so, u'ye ku' lwandi' u'lo ndaku'lagi'le.

2 Nanne ndaku'v'ezye ev'e ku'v'a nsi' nhanya,

ndaku'dosye na ku'li'kumalu'sya lina lyako,

ki'gele u'v'e lu'v'ango ku' v'angi'.

3 Ndav'adosye av'o v'alaku'dosye,

ndav'afwizi'i'le av'o v'alaku'tyomokele,

na ku' wako magongo gose ga mu welelo galadosiwe."

4 Hu' vyene Abulamu wawu'kaga ku' kaya yeni'yo ya Halani ki'ti' i'vyo Gu'ku' Mulungu wamuwi'laga. Itungo lyeni'lo wasangwa wafikyaga musimo gwa myaka maku'mi mupungati' na itano. 5 Abulamu wamusolaga Salai muki' wakwe haki'mo na Loto mwana wa muyagi mudu'gu'ye, na v'akumba av'o v'av'apandi'kile kwenu'ko, haki'mo na nsawo zyav'o zyose i'zyo v'av'age nazyo ku' Halani, nav'o v'ayu'mbaga ku'ya ku' nsi' ya Kanaani na v'afikaga kwenu'ko. 6 Abulamu haki'mo na mugana gwakwe v'av'i'taga hagati' na Kanaani, nav'o v'afikaga ha lwandi' u'lo hav'age na muti' muhanya gwa mwaloni u'go gwav'age ku' Mole, bi'hi' na kaya ya Shekemu. Ha itungo lyeni'lo V'akanaani hu' v'av'age v'ikazi v'a nsi' yeni'yo.

7 Haho Gu'ku' Mulungu wamwifumi'i'laga Abulamu na wamuwi'laga ati', "V'av'yalwa v'ako ndav'ape nsi' yeni'yi'." Nawe Abulamu aho wigagwa vyeni'vyo wamuzyengelaga Gu'ku' Mulungu ihozezyo, ku'nguno yamwa Gu'ku' Mulungu u'yo wamwifumi'i'laga.

8 Ku'fuma kwenu'ko Abulamu walondaga ku' ngu'lu' zya lwandi' lwa mu ki'ya ya kaya ya Beteli, na wazyengaga nkambi' yakwe. Beteli yav'age lwandi' lwa mu mweli na Ai yav'age lwandi' lwa mu ki'ya. Kwenu'ko nako wamuzyengelaga Gu'ku' Mulungu ihozezyo na ku'mwisenga ku' lina lyakwe. 9 Haho Abulamu wendeleyaga na musi'nzo ku'ya ku' lwandi' lwa dakama mu ibalangu' lya Negebu.

10 Ha itungo lyeni'lo yasangwa yagwa nzala ndaki ku' lwandi' lwenu'lo, nawe Abulamu yamudimaga ku'ya ku' lwandi' lwa dakama ku' nsi' ya Misili, ku'kikala ha itungo lyeni'lo lya nzala. 11 Aho wegelaga kwingi'la mu nsi' ya Misili wamuwi'laga muki' wakwe Salai, "Degeleka, manyile ku'v'a u'li' muki'ma musoga na wa kwiv'elelwa. 12 U'lu' v'aku'wone V'amisili v'aku'yomba, ‘U'yu' ali' muki' wakwe,’ haho v'aku'mbu'laga, sumbwa ev'e v'aku'ku'leka u'li' mupanga. 13 Ku'nguno yeni'yo u'v'awi'le ati', ene ni' ilu'mbu'yo, ki'gele mpandi'ke wu'soga haki'mo na wu'zuwu'ku wanne viv'e ku'nguno yako."

14 Aho Abulamu wafikaga ku' Misili, V'amisili v'amuwonaga Salai ku'v'a ali' muki'ma musoga muno. 15 V'ahanya v'a hamwa Falao*, mutemi wa Misili, aho v'amuwonaga Salai, v'amukumi'li'zyaga ku' mutemi wav'o. Haho Salai wafilagwa ku' iku'lu'. 16 Ku'nguno yamwa Salai, Falao wamuv'ezezyaga Abulamu wu'soga. Wamupaga ng'ombe, nkolo, mbu'li, mpunda, ntwangawu'lende na v'akumba v'a ki'gosya na v'a ki'ki'ma.

17 Ali'vi Gu'ku' Mulungu wamutusyaga Falao na v'antu' v'a mu lu'go lwakwe v'ose ku' malwile mahanya ku'nguno ya ku'musola Salai, muki' wamwa Abulamu. 18 Haho Falao wamwitanaga Abulamu na ku'muwu'zya, "Wambezezyaga ki'? Ku' ki' u'kambwi'lile ati' Salai ali' muki' wako? 19 Ku' ki' wayombile ati', ali' ilu'mbu'yo, ninga waleka namusola av'e muki' wanne? Haya musole muki' wako u'hafume henanha!" 20 Hangi' mutemi Falao wav'alagi'li'zyaga v'antu' v'akwe ku'mufili'li'zya Abulamu na muki' wakwe, na vintu' vyose i'vyo wav'age navyo.