1 Ha itungo lyeni'lo, Yuda wav'alekaga v'adu'gu'ye, wayaga ku'kikala na muntu' yu'mo Mwadulami, lina lyakwe Hila. 2 Kwenu'ko Yuda wapomaga na mwaniki' wa Ki'kanaani, lina lyakwe witanagwe Shua. Wamusolaga na ku'mutoola. 3 Mwaniki' mwenu'yo wapandi'kaga mwitungo, na wav'yalaga mwana wa ki'gosya. Yuda wamupaga lina mwana mwenu'yo Eli. 4 Hangi' wapandi'kaga mwitungo, wav'yalaga mwana yu'ngi' wa ki'gosya, na wamupaga lina Onani. 5 Hangi' wav'yalaga mwana yu'ngi' wa ki'gosya, wamupaga lina Shela. Itungo lya ku'v'yalwa kwamwa Shela, Yuda wav'age ku' lwandi' lwa Kezibu.

6 Yuda wamutozyaga Eli, muv'yalwa wakwe wa mbele, ku' muki'ma u'yo witanagwe lina lyakwe Tamali. 7 Ali'vi Eli, muv'yalwa wa mbele wamwa Yuda, wav'age mukenagu'zi ha minso gamwa Gu'ku' Mulungu, na ku'nguno yeni'yo Mulungu wamuwu'lagaga.

8 Hohene Yuda wamuwi'laga Onani ati', "U'mwingi'le muki' wa muyagi mudu'gu'yo, ku'nguno yi'li'ku'dima u'v'ezye vyeni'vyo, u'muv'yali'le muku'lu'yo, ki'gele apandi'ke wu'v'yalwa." 9 Ali'vi Onani wav'age amanyile ku'v'a wu'v'yalwa wenu'wo wu'kasye wu'v'e wakwe. Ku'nguno yeni'yo wav'age u'lu' walala na muki' wa muku'lu'ye, mbiyu' zyakwe witi'lage ha nsi', ki'gele aleke ku'muv'yali'la muku'lu'ye. 10 Igambo lyeni'lo wav'ezyage Onani, lyav'age lya wu'kenagu'zi ha minso gamwa Gu'ku' Mulungu, ku'nguno yeni'yo nawe wamuwu'lagaga.

11 Haho Yuda wamuwi'laga mukamwana wakwe Tamali ati', "U'su'v'e ku' lu'go lwinywe ku'mwa so, u'kav'e mufwi'lwa mpaka mwana wanne Shela aho alav'e waku'la." Yuda wav'ezyaga vyeni'vyo ku'nguno ya kwiganika ku'v'a Shela nawe akowolile ku'fwa ki'ti' v'aku'lu'ye. Hohene Tamali wasu'v'aga ku'mwa ise.

12 Aho lyav'i'ta itungo ilihu, muki' wamwa Yuda wagulalaga. Yav'aga Yuda aho wamalaga ku'muli'la muki' wakwe, wayaga ku' Timuna haki'mo na munwaniye Hila, Mwadulami, ku' v'antu' av'o v'av'age v'ali'zisu'nzu'la nkolo zyakwe woya.

13 Yav'aga aho Tamali wigagwa ati', ise wu'kwi ali' mu nzi'la ku'ya ku' Timuna ku'kazisu'nzu'la woya nkolo zyakwe, 14 hohene wazulaga myenda zya wu'fwi'lwa wakwe, na wikumbi'laga wu'shungi, ki'gele v'aleke ku'mumanya. Haho wayaga bi'hi' na wingi'li'lo wa Enaimu, bi'hi' na nzi'la i'yo yi'yile ku' Timuna. Tamali wav'ezyaga vyeni'vyo ku'nguno wawonaga ku'v'a Shela wav'aga muntu' muhanya, ali'vi v'akamusaazizye ku' wakwe ki'gele av'e mugosi.

15 Aho Yuda wamuwona, wiganikaga ku'v'a muki'ma mwenu'yu' mulav'a, ku'nguno wikumbi'laga wu'syu'. 16 Akamanyile ku'v'a ali' mukamwana wakwe. Hohene wamwegelaga henanho ha mpelo na nzi'la, wamuwi'laga ati', "Izu'u' gi'si', nu'togwa ku'lala nanho." Tamali wamuwu'zyaga ati', "U'lu' nzumye ku'lala nanho u'ku'mpa ki'?" 17 Yuda wasu'v'yaga ati', "Nku'ku'tu'mi'la kadi'lana ka mbu'li ku'fuma mu idale lyanne." Tamali wamuwi'laga, "Tu'u'la mulehani gwa ku'mbezya nsani'zye ku'v'a nhana u'lantu'mi'le kadi'lana." 18 Haho Yuda wamuwu'zyaga, "U'li'koov'a nku'pe ki'ntu' ki'?" Nawe wasu'v'yaga, "Mpage gwenu'go mukufu u'go gu'li' na muhuli gwako haki'mo na mulanga u'go u'dimile."

Hohene Yuda wamupaga vintu' vyeni'vyo vyose, na ku'lala nawe. Haho Tamali wapandi'kaga mwitungo. 19 Nawe Tamali wawu'kaga na ku'su'v'a ku' lu'go, wazulaga wu'shungi wakwe, wazwalaga hangi' myenda zyakwe zya wu'fwi'lwa.

20 Yav'aga itungo i'lo Yuda wamutu'maga munwaniye Hila, Mwadulami, afile kadi'lana kenako, ki'gele asu'v'ye vintu' vyakwe ku'fuma ku' mwenu'yo muki'ma, ali'vi mwenu'yo munwaniye akamusangile. 21 Hila wav'awu'zyaga v'ikazi v'a ha Enaimu, "Ali' ku'he muki'ma mulav'a u'yo ali'v'aga ha mpelo na nzi'la bi'hi' na henanha?" Nav'o v'asu'v'yaga, "Henanha hakav'aga na muki'ma mulav'a."

22 Hila wasu'v'aga ku'mwa Yuda, wamuwi'laga ati', "Nkamuwine, na v'ikazi v'a henanho v'ambwi'laga ati', ‘Hakav'aga na muki'ma mulav'a henanha.’ " 23 Yuda wayombaga, "Leka avisole vintu' vyeni'vyo, ku'du' kwize ku'pondwensoni. Ev'e mweni'ki'li' wawonaga ku'v'a namufili'laga kadi'lana, ali'vi u'kamusangile."

24 Aho lyav'i'taga itungo lya myezi idatu', Yuda wapandi'kaga mmola ku'v'a, "Kasinaga mukamwana wako Tamali wav'aga mulav'a, ku'nguno yeni'yo wapandi'kaga mwitungo!" Hohene Yuda wafumyaga ilagi'li'zyo ati', "Mumufumye ha ibala akatimwe moto mpaka afwe!" 25 Aho v'av'age v'ali'mufumya ha ibala, Tamali watu'maga nkombe ku'mwa ise wu'kwi na ku'yomba ati', "Musav'a vintu' i'vi hu' mwene wampile mwitungo. Ku'nguno yeni'yo, nu'ku'lomba u'mumanye musav'a vintu' i'vi: mukufu, muhuli haki'mo na mulanga." 26 Hohene Yuda wavimanyaga vintu' vyeni'vyo, na wayombaga ati', "Tamali ali' wa lole ku'ki'la ene, ku'nguno nkamupile mwana wanne Shela, ki'gele amutoole." Ku'fuma henanho akalalile nawe hangi'.

27 Yav'aga aho lyafikaga itungo lya ku'v'yala kwamwa Tamali, yamanyi'kaga, kasinaga ali' na mav'asa mu nda yakwe. 28 Aho wav'age ali'v'yala, mwana yu'mo wafumyaga mukono gwakwe ha ibala, hohene mwingi' wasolaga wu'zi wazaa na ku'mutunga mwana mwenu'yo ku' mukono gwakwe, nawe wayombaga ati', "Mwenu'yu' hu' watongelaga ku'v'yalwa." 29 Ali'vi aho wagu'su'v'yaga mukono gwakwe mugati', kasinaga mudu'gu'ye watongelaga ku'fuma! Mwingi' wayombaga ati', "Yav'a vihe wafuma ku' nguzu ev'e?" Ku'nguno yeni'yo v'amupaga lina Pelezi*. 30 Haho wav'yalagwa mudu'gu'ye atungilwe wu'zi wazaa ku' mukono gwakwe, nawe witanagwa lina Zela*.