1 I'vi hu' vyene Isaka wamwitanaga Yakobo, wamudosyaga, na wamupaga ilagi'li'zyo ati', "Ku'du' wize u'toole muki'ma Mukanaani. 2 Yaga ku' lwandi' lwa Padani-alamu ku'mwa gu'ku'yo Betueli, ise wamwa nnoko. U'katoole muki'ma mugati' na v'aniki' v'ana v'amwa mamiyo Labani, mudu'gu' wamwa nnoko. 3 Gu'ku' Mulungu wa Nguzu aku'dosye, aku'v'ezye u'v'e na wu'v'yalwa wingi na akwingi'hye muno, ki'gele u'v'e mbuto ya makabi'la. 4 Mulungu aku'dosye ev'e haki'mo na v'av'yalwa v'ako, aku'pe lu'v'ango lwamwa Abalahamu. U'yi'sole na ku'yi'tema nsi' yeni'yi' i'yi' wikalile ki'ti' mugeni mwizi'li'zi, nsi' i'yi' Mulungu wamupile Abalahamu."

5 Hohene Isaka wamudahyaga Yakobo, nawe walondaga ku' Padani-alamu ku'mwa mamiye Labani, mwana wamwa Betueli, Mualamu, ilu'mbu'ye na Lebeka, nnina wamwa Yakobo na Esau.

6 Ali'vi Esau wamanyaga ku'v'a Isaka wamudosyaga Yakobo na wamutu'maga ku'ya ku' Padani-alamu, ki'gele akatoole kwenu'ko, hangi' aho wali' ali'mudosya wamupaga ilagi'li'zyo ku'du' ize atoole mwaniki' Mukanaani. 7 Hangi' wamanyaga ku'v'a Yakobo wav'aku'zyaga ise na nnina, nawe wayaga ku' Padani-alamu. 8 Hohene, Esau wamanyaga ku'v'a ise Isaka akatogeziwa na v'aniki' v'a Ki'kanaani. 9 Ku'nguno yeni'yo Esau wayaga ku'mwa Isumaili, mwana wamwa Abalahamu, watoolaga muki'ma yu'ngi' mwana wamwa Isumaili, lina lyakwe Mahalati, ilu'mbu'ye na Nebayoti.

10 Nawe Yakobo aho wawu'kaga ku' Beeli-sheba ku' lu'go lwav'o, walondaga ku' kaya ya Halani. 11 Aho wafikaga lwandi' lu'mo, wawonaga alale henanho ku'nguno lyu'v'a lyasangwa lyalokaga. Wasolaga iwe li'mo lya henanho wali'sagami'laga na ku'lala tu'lo henanho. 12 Itungo lya ku'lala kwakwe walotaga ndoti. Lingaga! Wawonaga itandi'zyo li'ki'ndi'kilwe ku'fuma ha nsi', na nsoto yakwe yi'fikile ku' ilunde. Lingaga! Hangi' v'amalaika v'a Mulungu v'ali'liina na ku'sooka ku' itandi'zyo lyeni'lo.

13 Kasinaga! Gu'ku' Mulungu wi'maga ha igu'lya na itandi'zyo, wayombaga, "Ene ni' Gu'ku' Mulungu, Mulungu wamwa gu'ku'yo Abalahamu, na Mulungu wamwa Isaka. Nsi' i'yi' u'lali'lile nku'ku'pa ev'e na wu'v'yalwa wako. 14 V'av'yalwa v'ako ndav'ingi'hye ki'ti' lu'wuwu lwa nsi', nav'o v'alasambale ku' ki'la lwandi': ku' mweli, ku' ki'ya, ku' sukuma na ku' dakama. Ku'v'i'ti'la ku' wako magongo gose ga mu welelo galadosiwe. 15 Lingaga, ene ni' haki'mo nanho, ndaku'su'nge ki'la u'ko u'lakaye, nanne ndaku'su'v'ye hangi' mu nsi' yeni'yi'. Nkasye nku'leke, sumbwa ndaku'gelani'zi'zye gose ago nayombile."

16 Aho Yakobo watunu'laga, wayombaga ati', "Nhana Gu'ku' Mulungu ali' henanha, nanne nali' nkamanya!" 17 Nawe wogohaga, na wayombaga, "Henanha hatuntumu ki'ti' ki'! I'vi nu'wona henanha yi'li' nnumba ya Mulungu, na wingi'li'lo wa ku' ilunde."

18 Wangalu'ke ndiyu' Yakobo watunu'laga, wali'solaga iwe i'lo wav'age asagami'lile, wali'ki'ndi'kaga wi'i'ma ki'ti' nhi'ngi' na ku'li'v'ezya isondo ku' ku'liti'li'la maguta. 19 Lwandi' lwenu'lo wahitanaga "Beteli*," ali'vi kaya yeni'yo ha kale hitanagwe Luzu.

20 Yakobo watu'u'laga hangi' ki'lu'mbo ati', "Ev'e Gu'ku' Mulungu, u'lu' u'ku'v'a haki'mo nanne, na ku'nsu'nga ku' musi'nzo gwanne, na ku'mpa viliwa na vizwalo, 21 na ku'su'v'a na ku'hola ku' lu'go lwamwa v'av'a, hohene Gu'ku' Mulungu, u'ku'v'a Mulungu wanne. 22 Nalyo iwe i'li' naki'ndi'kaga henanha ki'ti' nhi'ngi', yi'ku'v'a nnumba yako, ev'e Mulungu, na ku' ki'la i'cho u'lampe, nhana ndaku'fumi'zye ifungu lya iku'mi."