Gênesis 33

Yakobo na Esau v’ali’poma

1 Haho Yakobo wawu’syaga minso gakwe na ku’wona, kasinaga Esau izile haki’mo na idale lya v’antu' magana ane! Hohene wav’atawu’laga v’aane ki’la yu’mo ku’mwa nnina, ku’mwa Leya, Lahele na ku’mwa Zilipa na Biliha v’azya v’av’o. 2 Wagawu’laga i’vi: V’azya na v’ana v’av’o wav’atu’u’laga ku' mbele, Leya na v’aane hagati', na ku' nnuma wav’atu’u’laga Lahele na mwane Yosefu. 3 Haho mweni’ki’li' wav’i’taga ku' mbele yav’o v’ose, ki’gele apome na muku’lu’ye. Yav’aga aho wamuwonaga, walamulaga ku’muku’v’i’i’la ku' iku’zyo ku’no ali’mwegela mpaka kali' mupungati'.

4 Ali’vi Esau wamupeelelaga Yakobo ku’kamusu’mbi’la, wamuwungati’laga mu nhingo na ku’musu’na, na henanho v’ose v’av’i’li' v’ali’laga. 5 Esau aho walolaga, wav’awonaga av’o v’aki’ma na v’ana. Wamuwu’zyaga Yakobo ati', "Ali' v’enav’a u’li' haki’mo nav’o v’a nde?" Yakobo wasu’v’yaga ati', "V’enav’a hu' v’ana av’o Mulungu wampile ene mukumba wako, ku' ki’sa chakwe."

6 Haho v’enav’o v’azya haki’mo na v’ana v’av’o, v’amwegelaga Esau na ku’musungami’la ku' iku’zyo. 7 Hangi' Leya haki’mo na v’aane v’egelaga na ku’sungama ku' iku’zyo. Mpeleleko yakwe v’izaga Yosefu na nnina Lahele, nav’o v’amusungami’laga ku' iku’zyo.

8 Hohene Esau wawu’zyaga ati', "Ali' madale gose ago napomaga nago mu nzi’la nguno yayo ki'?" Yakobo wasu’v’yaga ati', "Nguno yayo yi’li' i’vi: Nu’koov’a mpandi’ke wu’soga ha mbele yako, ev’e gu’ku' wanne." 9 Ali’vi Esau wayombaga ati', "Muzuna wanne, ene ni’na nsawo nyingi. Nsawo yako lekaga yi’v’e yako ev’e mweni’ki’li'." 10 Yakobo wasu’v’yaga ati', "Ayi' ng’o! U’lu' nhana napandi’kaga wu’soga ha mbele yako, nu’ku’lomba wanuku’le na lu’holo mu makono ganne. Nhana ku’wu’wona wu’syu' wako yi’li' ki’ti' ku’wu’wona wu’syu' wa Mulungu, na wansu’mbi’laga ku' wu’soga muno. 11 Nu’ku’lomba chaki’sa u’zumye kwanuku’la lu’holo u’lo naku’letelaga, ku’nguno ninga ene Mulungu wakandosya muno, nanne ni’na nsawo nyingi." I’vi hu' vyene Yakobo wamwikongaga Esau, ndahi’lo wazumyaga kwanuku’la lu’holo.

12 Hangi' Esau wayombaga, "Endita! Ku’yage musi’nzo, nanne nku’ku’tongelela." 13 Ali’vi Yakobo wasu’v’yaga ati', "Gu’ku' wanne, u’manyile ku’v’a v’ana av’a v’akaali' v’ado v’ado, hangi' nkolo, mbu’li na ng’ombe zili’wonsya. U’lu' nzifile wangu' wangu' ku' lu’siku' lu’mo du', mitugo zyose ziku’fwa. 14 Nu’ku’lomba chaki’sa, ev’e tongelaga niswe ku’ku’ku’londa hado hado, ku' lu’gendo lwa v’ana haki’mo na madale aga ha mbele yanne, mpaka ku’fike ku’mwa gu’ku' wanne u’ko ku' Seili."

15 Esau nawe wayombaga ati', "U’lu' mbe vyene yi’li' visoga nku’lekele v’antu' mugati' na v’antu' v’anne." Ali’vi Yakobo wawu’zyaga ati', "ku' ki' u’v’ezye vyeni’vyo? Lekaga du' mpandi’ke wu’soga ha mbele yako, ev’e gu’ku' wanne." 16 Hohene Esau wawu’kaga lu’siku' lwene lu’lo ku’ya ku' Seili. 17 Sumbwa Yakobo na v’antu' v’akwe v’alondaga ku' lwandi' lu’mo u’lo lu’li’witanwa Sukoti. Aho v’av’aga kwenu’ko, wizyengelaga nnumba yakwe na mav’i’gi’li' ku’nguno ya mitugo zyakwe. Yeni’yi' hu' nguno ya henanho ku’hitana "Sukoti*33:17 Lina "Sukoti" ku' Ki’ebulania nguno yayo "mav’i’gi’li'."."

18 Ku’fuma ku’wu’ka kwamwa Yakobo ku' Padani-alamu, wayu’mbaga na ku’hola mpaka aho wafikaga ku' kaya ya Shekemu, ku' lwandi' lwa nsi' ya Kanaani, na wazyengaga nkambi' yakwe bi’hi' na kaya yeni’yo. 19 Kwenu’ko u’ko wav’age azyengile nkambi', wagu’laga lwandi' lwa kwikala ku’fuma ku' v’av’yalwa v’amwa Hamoli, ise wamwa Shekemu, ku' wu’gu’zi wa vipande igana li’mo vya feza. 20 Kwenu’ko wamuzyengelaga Mulungu ihozezyo, na ku’hitana "El-Elohe-Izilaeli*33:20 Lina "El-Elohe-Izilaeli" ku' Ki’ebulania nguno yayo yi’li' "Mulungu ali' Mulungu wamwa Izilaeli."."