Gênesis 43

V’adu’gu' v’amwa Yosefu v’ali’su’v’a hangi' ku' Misili

1 Itungo lyeni’lo nzala yali' yi’kaali' ndaki mu nsi' ya Kanaani. 2 Aho viliwa vyamalaga i’vyo v’agu’lile ku' Misili, sav’o Izilaeli wav’awi’laga v’aane, "Su’v’i hangi' ku' Misili mukagu’le viliwa."

3 Ali’vi Yuda wamuwi’laga ise ati', "Muntu' mwenu’yo waku’hanile ku' wu’daki ati', ‘Mukasye mwiwone nanne hangi' u’lu' mukizile na muzuna winywe.’ 4 U’lu' u’ku’zumya muzuna wiswe Benyamini ku’ye haki’mo nawe, haho ku’ku’ya ku’kagu’la viliwa. 5 Ali’vi u’lu' u’kaanile ku’muyane, ninga iswe ku’kav’ile ku’ya, ku’nguno muntu' mwenu’yo waku’wi’lile ati', ‘Mukasye mwiwone nanne hangi' u’lu' mukizile na muzuna winywe.’ "

6 Sav’o Izilaeli wawu’zyaga, "ku' ki' mwandetelaga makoye mu ku’muwi’la mwenu’yo muntu' ati', muli' na muzuna winywe yu’ngi'?" 7 Ali’vi v’eni’ki’li' v’asu’v’yaga ati', "Muntu' mwenu’yo waku’wu’zi’li’zyage lwa ku’tisi’la muno magambo giswe na mugana gwiswe. Ndi' waku’wu’zya, ‘U’sinywe akaali' ali’zuwu’ka? Vihe, muli' na mudu’gu' winywe yu’ngi'?’ Iswe kwasu’v’yaga ki’ti' i’vyo wawu’zyaga. Mbe ku’kamanye vihe ku’v’a akaku’wi’la ati', ‘Kamuleti muzuna winywe aha’?" 8 Haho Yuda wamuwi’laga ise Izilaeli, ati', "U’nzumi’zye ku’ya nawe. Ku’ye ku’kagu’le viliwa, ki’gele ku’du' ku’fwe na nzala, iswe, ev’e na v’ana v’iswe. 9 Ene mweni’ki’li' nkwi’ma ku' lwandi' lwa mwana wako ku' ki’la igambo. U’lu' naleka ku’musu’v’ya na ku’muleta ha mbele ya minso gako, musango gu’lav’e ku' wanne nhananhana. 10 Kwali' ku’leke kwikendelezya mbe kwakaya na ku’su’v’a kav’i’li'."

11 Haho sav’o Izilaeli wav’awi’laga ati', "U’lu' hu' vyene muv’ezye i’vi: Musole mugati' na vili’mwa visoga ku’fuma mu nsi' yiswe. Soli' wu’ki' wu’doo, wisu’lyu' wa zeli, wu’bani na manemane, haki’mo na visumo vya kungu na lozi, muvitu’u’le mu mifuko zinywe, na mumufili’le muhanya mwenu’yo, ziv’e hu' lu’holo. 12 Musole hela, mongezye kav’i’li' zya ku’li’pi’ki’zya, ki’gele musu’v’ye hela i’zyo ndi' zyatu’u’lagwa mu maguni’la ginywe. Hamo ndi' zyatu’u’lagwa ku' ku’hu’v’a. 13 Mumusole na mudu’gu' winywe Benyamini, muye nawe ku' muhanya mwenu’yo. 14 Gu’ku' Mulungu wa Nguzu amugwasye, muhanya mwenu’yo amuwonele ki’sa, ki’gele amuleku’li’le mudu’gu' winywe u’yo wasigalile kwenu’ko na muzuna winywe Benyamini musu’v’e haki’mo nav’o. Ene u’lu' ku’fwi’lwa na v’ana v’anne leka nfwi’lagwe!"

15 Hohene v’enav’o v’asu’mbana, v’ana v’amwa Yakobo, v’asolaga lu’holo haki’mo na hela zya ku’gu’li’la viliwa na zya ku’li’pi’ki’zya. V’awu’kaga ku’ya ku' Misili haki’mo na muzuna wav’o. Aho v’afikaga kwenu’ko, v’ayaga ha mbele yamwa Yosefu.

16 Nawe Yosefu aho wamuwona Benyamini ali' haki’mo nav’o, wamuwi’laga mwi’mi’li’zi wa nnumba yakwe ati', "U’v’afile v’antu' av’a ku' lu’go lwanne na u’kasi’nze mutugo gu’mo na ku’v’av’ezezya ki’liwa ki’soga, ku’nguno v’enav’a v’aku’lya haki’mo nanne ki’liwa cha lyu’v’a." 17 Haho mwi’mi’li’zi mwenu’yo wav’ezyaga ki’ti' i’vyo walagi’li’ziv’agwa na wav’afilaga v’ageni v’enav’o ku' lu’go lwamwa Yosefu. 18 Ali’vi v’antu' v’enav’a v’ogohaga aho v’awonaga v’afililwe mu lu’go lwamwa Yosefu. V’iyombelaga ati', "Kwaletwa henanha ku’nguno ya hela i’zyo ndi' zyasu’v’iwa mu maguni’la giswe ha lu’gendo lwa kwandya. Ali’koov’a aku’gwi’li’le na ku’ku’kinda ki’gele aku’sole ku’v’e v’asese, na mpunda ziswe azisole."

19 Haho v’amwegelaga mwi’mi’li’zi wa lu’go lwamwa Yosefu, na v’asu’nsu’mu’laga nawe ha muzigo gwa nnumba. 20 V’amuwi’laga, "Gu’ku' ku’ku’lomba chaki’sa, lu’gendo u’lo ndi' kwiza henanha ku’gu’la viliwa, 21 hangi' kwawu’kaga ku’su’v’a ku' lu’go. Yav’aga aho ndi' kwafika ha ku’suuha ha itungo lya mpi’ndi', kwatungu’laga maguni’la giswe, kwakumyaga ku’wona hela ziswe zyose zili' ha igu’lya mu maguni’la giswe! Hu' i’zi kwazisu’v’ya. 22 Hangi' kwaletaga hela zya ku’gu’li’la viliwa. Ali’vi ku’kamanya u’yo ndi' watu’u’la hela mu maguni’la giswe."

23 Mwi’mi’li’zi mwenu’yo wav’awi’laga ati', "Ku’du' mogohe. Muv’e na ku’hola, ku’nguno Mulungu winywe, u’yo hu' ali' Mulungu wamwa sinywe, hu' mwene wamupile mbi’i’ka yeni’yo mu maguni’la ginywe. Ene ndi' napiwa hela zinywe." Haho wamulugu’li’laga Simiyoni, na wav’aletelaga.

24 Wav’akalibisyaga mu nnumba yamwa Yosefu, wav’apaga minzi' ga ku’kusi’la magu’lu', na mpunda zyav’o wazipaga ki’liwa. 25 Aho v’igagwa ku’v’a v’aku’lya ki’liwa haki’mo na Yosefu, haho v’agelani’zyaga lu’holo lwav’o ki’gele v’amupe.

26 Yav’aga aho Yosefu wizaga mu lu’go lwakwe, v’amupaga lu’holo lwav’o na ku’muku’v’i’i’la. 27 Yosefu wav’agisi’li’zyaga na wav’awu’zyaga ati', "U’sinywe munamala, u’yo mwambwi’lage mmola zyakwe, mupanga? Akaali' ali’zuwu’ka?" 28 V’asu’v’yaga ati', "U’siswe, mukumba wako, ali’zuwu’ka na mupanga." Haho v’asukambaga na ku’muku’v’i’i’la ku' isima.

29 Aho Yosefu wawu’syaga minso gakwe, wamuwonaga muzunaye Benyamini, mwana wamwa nnina. Wav’awu’zyaga ati', "U’yu' hu' muzuna winywe u’yo mwambwi’lage mmola zyakwe?" Haho wamuwi’laga, "Mulungu aku’wonele ki’sa, mwana wanne." 30 Ali’vi Yosefu wawu’wonaga wu’togwe wu’hanya ku' muzunaye, na ndi’li’lo zyayengayengaga. Wahafumaga wangu' wangu' na ku’koov’a ha ku’li’li’la. Wingi’laga ku’mbele kwa winene na ku’li’la mwenu’mo. 31 Aho wamali’la ku’li’la, wisukaga minzi' ku' wu’syu', na wafumaga ku’no ilambi’ki’zizye na ku’v’awi’la v’atu’mami v’akwe ati', "Ku’leteli ki’liwa."

32 Hohene Yosefu waletelagwa ki’liwa inene, v’adu’gu’ye nav’o v’aletelagwa v’inene, V’amisili nav’o v’apiv’agwa ki’liwa chav’o na v’alyaga v’inene. V’av’ezyaga vyeni’vyo ku’nguno yi’li' igayi’li’zyo ku' V’amisili ku’lya na V’aebulania. 33 V’adu’gu' v’enav’a v’amwa Yosefu v’ikalaga ha mbele yakwe v’ahelilwe ku’londana na misimo zyav’o, ku’lamuli’la muv’yalwa wa mbele mpaka wa ku' mpelo. Haho v’ilingaga na ku’kekev’ala! 34 V’afili’lagwa viliwa ku’fuma ha meza yamwa Yosefu, ali’vi Benyamini wafili’lagwa vingi kali' katano, ku’ki’la viliwa vya v’angi' v’ose. Hohene v’anywaga v’ose ku' miyeye haki’mo na Yosefu.