1 Ha itungo lyeni'lo Salai, muki' wamwa Abulamu, wav'age akaali' ku'muv'yali'la mwana, ali'vi wav'age ikalile na muzya Mumisili, lina lyakwe witanagwe Hajili. 2 Hohene, Salai wamuwi'laga Abulamu, "Degeleka, Gu'ku' Mulungu wanimile wu'v'yazi, gi'si' nu'ku'lomba yaga u'kalale na muzya wanne. Hamo nu'pandi'ka wu'v'yalwa ku'fuma ku' wakwe." Abulamu wazumani'zyaga wu'yombe wamwa Salai.

3 Yav'aga aho Abulamu wikalaga myaka iku'mi mu nsi' ya Kanaani, Salai muki' wakwe wamusolaga muzya wakwe Hajili, Mumisili, na wamupaga Abulamu mugosi av'e isuli'la wakwe.

4 Abulamu walalaga na Hajili, nawe Hajili wapandi'kaga mwitungo. Aho wamanyaga ku'v'a ali' na mwitungo walamulaga ku'muv'engelezya Salai mammaye. 5 Haho Salai wamuwi'laga Abulamu, "Wu'v'i u'wu' nu'pandi'ka, wu'v'e ku' wako. Ene naku'pile muzya wanne, ali'vi aho wamanyaga ku'v'a ali' na mwitungo walamulaga ku'mbengelezya. Gu'ku' Mulungu ayangu'le hagati' yako nanne!" 6 Nawe Abulamu wamuwi'laga Salai, "Lingaga, u'yu' ali' muzya wako, muv'ezezye i'vyo u'koov'ile ev'e." Haho Salai wamutusyaga Hajili mpaka wamupeelaga.

7 Haho Malaika wamwa Gu'ku' Mulungu wamwizi'i'laga Hajili ku' kasela ka minzi' ha ibalangu'. Kasela kenako kav'age kali' bi'hi' na nzi'la ya ku'ya ku' Shuli. 8 Malaika wamuwu'zyaga, "Hajili ev'e muzya wamwa Salai, u'fumi'i'lile ku'he na u'yile ku'he?" Nawe wasu'v'yaga ati', "Nu'mupeela mamma wanne Salai."

9 Haho Malaika wamwa Gu'ku' Mulungu wamuwi'laga Hajili, "Su'v'aga ku'mwa Salai mammayo u'kitunie ku' wakwe." 10 Hangi' wayombaga ati', "Ndav'ingi'hye v'av'yalwa v'ako muno, av'o v'alaleke ku'kowoleka ku'v'azyi'ka." 11 Hangi' wamuwi'laga,

"Lingaga, u'li' na mwitungo

na u'ku'v'yala mwana wa ki'gosya.

U'lamupe lina Isumaili,*

ku'nguno Gu'ku' Mulungu wigagwa ki'li'lo cha lu'duko lwako.

12 Isumaili alikale ki'ti' ndu'lu'*.

Alav'e na wanisi na ki'la muntu', na ki'la muntu' alav'e na wanisi nawe.

Alav'e na wu'kofu ku' v'adu'gu' v'akwe."

13 Haho Hajili wamupaga lina Gu'ku' Mulungu u'yo wayombaga nawe ati', "Ev'e u'li' Mulungu wa Ku'wona," ku'nguno wiganikaga ati', "Nhana henanha namuwonaga u'yo ali'mbona." 14 Hu' i'cho chav'ezya lwinzi' lwenu'lo lwitanwe "Beeli-lahai-loi*." Lingaga, lwinzi' lwenu'lo lu'li' hagati' ya Kadeshi na Beledi.

15 Haho Hajili wamuv'yali'laga Abulamu mwana wa ki'gosya, wamupaga lina Isumaili. 16 Ha itungo lyamwa Hajili ku'muv'yala Isumaili, Abulamu wasangwa ali' na musimo gwa myaka maku'mi munane na mukaga.