1 Yakobo wendeleyaga kwikala mu nsi' ya Kanaani, i'yo wav'age ikalile ise ki'ti' mugeni mwizi'li'zi. 2 I'yi' hu' mmola ya v'av'yalwa v'amwa Yakobo.

Yosefu aho wav'age na myaka iku'mi na mupungati' wadi'mage nkolo na mbu'li haki'mo na v'adu'gu'ye, v'ana v'amwa Biliha na Zilipa, masuli'la v'amwa ise. Yosefu wav'age ali'muletela sav'o mmola ya nsembo mbi ya v'adu'gu'ye.

3 Yakobo, u'yo hu' Izilaeli, wamutogagwa Yosefu ku'kindya v'ana v'akwe v'ose, ku'nguno wamupandi'kaga ku' wu'kiku'lu' wakwe. Nawe wamusumi'laga Yosefu nhanzo ya wu'pu'nde nsoga muno. 4 Ali'vi v'adu'gu'ye aho v'awonaga ku'v'a sav'o amutogilwe Yosefu ku'kindya v'eni'ki'li'. Ku'nguno yeni'yo v'amugayaga Yosefu na v'av'aga v'akav'ile ku'su'nsu'mu'la nawe visoga.

5 Lu'siku' lu'mo wu'ziku', Yosefu walotaga ndoti. Ali'vi aho wav'agani'laga v'adu'gu'ye ndoti yeni'yo, v'ongezyaga ku'mugaya. 6 Wav'awi'laga, "Degeleki ndoti i'yo nalotaga: 7 Nalotaga ati', kwali' ku'li' v'ose ku' mugu'nda ku'li'tunga masapali ga viliwa, ku'titu'ki'la kasinaga isapali lyanne lyi'mi'li'laga sata, na masapali ginywe gikunganiaga ku'li'pilima na ku'li'kundami'la isapali lyanne." 8 V'adu'gu'ye v'amuwu'zyaga ati', "Vihe, u'li'koov'a ku'ku'wi'la ati', u'lav'e mutemi wiswe? Ninga U'li'wiganika ku'v'a u'laku'teme iswe?" V'amugayaga muno ku'nguno ya ndoti na mihayo zyakwe zyeni'zyo.

9 Hangi' Yosefu walotaga ndoti yi'ngi', wav'agani'laga ati', "Degeleki, nalotaga hangi' ndoti yi'ngi'. Nawonaga lyu'v'a, mwezi na nsonda iku'mi na yi'mo zinkundami'lile." 10 Ali'vi aho wamugani'laga ise haki'mo na v'adu'gu'ye, ise wamuhamaga na ku'muwi'la ati', "Ndoti ki' yeni'yo walotaga? Vihe, u'li'koov'a ku'yomba, ene na nnoko haki'mo na v'adu'gu'yo, ku'lize ku'ku'ku'v'i'i'le mpaka hansi'?" 11 V'adu'gu'ye v'amuwonelaga iwu'v'a, ali'vi ise wali'tu'u'laga mu moyo igambo lyeni'lo.

12 Lu'siku' lu'mo, v'adu'gu'ye na Yosefu v'ayaga ku'kadi'ma mitugo zyamwa sav'o bi'hi' na Shekemu. 13 Hohene Izilaeli wamuwi'laga Yosefu, "U'manyile ku'v'a v'adu'gu'yo v'ali'di'ma mitugo ku' Shekemu? Nu'koov'a nku'tu'me kwenu'ko." Yosefu wasu'v'yaga, "Endita v'av'a, ntu'mage nku'ya." 14 Haho ise wamuwi'laga ati', "Yaga u'kav'alinge v'adu'gu'yo haki'mo na mitugo u'lu' zigelani'lile, haho u'su'v'e u'mbwi'le." Hohene Yakobo wamutu'maga Yosefu ku'fuma ku' iwonde lya Hebuloni.

Yosefu aho wafikaga ku' Shekemu, 15 aho wav'age ali'pilimapilima mu isokola lyeni'lo ndi' wasangwa na muntu' yu'mo. Muntu' mwenu'yo wamuwu'zyaga ati', "U'li'koov'a ki'?" 16 Yosefu wasu'v'yaga ati', "Ndi'v'akoov'a v'adu'gu' v'anne. Nu'ku'lomba chaki'sa, u'kowolile ku'mbwi'la u'ko v'ali'di'mi'la mitugo zyav'o?" 17 Muntu' mwenu'yo wasu'v'yaga ati', "V'asamile henanha, ku'nguno nav'igilwe v'ali'yomba, ‘Ku'ye ku' Dotani.’ " Hohene Yosefu wav'alondaga v'adu'gu'ye, na wav'asangaga ku' Dotani.

18 V'adu'gu'ye aho v'amuwona akaali' ali' ku'tali', v'av'ezyaga ndaka ya ku'muwu'laga. 19 V'iwi'laga, "Lolagi! U'yo mlota ndoti izile. 20 Gi'si' ku'muwu'lage, na ku'mutagi'le mu liina. Ku'layombe ati' wakaliwa na idimu idaki lya mu ipolu. Haho ku'lawone ndoti zyakwe zyeni'zyo zilav'e vihe!"

21 Ali'vi Lubeni aho wigagwa vyeni'vyo, wakoov'aga nzi'la ya ku'mupi'zya Yosefu ku'fuma mu makono gav'o. Wav'awi'laga v'adu'gu'ye ati', "Ku'du' ku'muwu'lage. 22 Ku'du' kwite magazi. Mutagi'li mu liina lya henanha ha mbu'ga, ninga ku'du' ku'muvulazye." Lubeni wayombaga vyeni'vyo ki'gele amupi'zye Yosefu mu makono gav'o, na ku'musu'v'ya ku'mwa ise.

23 Yav'aga aho Yosefu wav'afiki'laga v'adu'gu'ye, v'amudimaga lwa nguzu na ku'muzula nhanzo yakwe nsoga i'yo wav'age azwalile. 24 Haho v'amutagi'laga mu liina, i'lo lyav'age li'li' wu'du'hu' minzi'.

25 Aho v'ikalaga ku'lya ki'liwa, v'awu'syaga minso gav'o kasinaga, v'awonaga musu'lu'lu' gwa v'asu'lu'zya V'aisumaili v'afumi'i'lile ku' Gileadi v'ayile ku' Misili! Ntwangawu'lende zyav'o zisombile wisu'lyu' u'wo wu'motu wa wu'bani, zeli na manemane. 26 Haho Yuda wav'awi'laga v'adu'gu'ye ati', "Ku'ku'pandi'ka ki', u'lu' kwamuwu'laga muzuna wiswe na ku'v'isa magazi gakwe? 27 Yi'li' visoga ku'mugu'zye ku' V'aisumaili av'o v'izile. Ku'du' ku'muwu'lage, ku'nguno ali' mudu'gu' wiswe, nyama yiswe na magazi gakwe na giswe hu' gamo." V'adu'gu'ye v'izumani'zyaga nawe.

28 Aho v'afikaga henanho v'asu'lu'zya av'o V'aisumaili, ku' lina li'ngi' V'amidiani, v'adu'gu'ye v'amwa Yosefu v'amufumyaga mu liina, v'amugu'zyaga ku' vipande maku'mi av'i'li' vya feza. V'aisumaili v'amuwu'kanaga mpaka ku' Misili.

29 Itungo lyeni'lo Lubeni wav'age ali'hadu'hu', aho wasu'v'aga ha liina kasinaga, wasangaga Yosefu ali'mudu'hu'! Hene haho wazemulaga myenda zyakwe ku' misayo. 30 Wasu'v'aga ku' v'adu'gu'ye, wav'awi'laga ati', "Yosefu ali'mudu'hu' mu liina! Lelo ene nku'v'ezya vihe?"

31 Hohene v'asi'nzaga mbu'li, v'asolaga nhanzo yamwa Yosefu na ku'yi'dobya mu magazi. 32 Hangi' v'ayi'filaga nhanzo yeni'yo ku'mwa sav'o na ku'muwi'la ati', "Kwaku'gaga nhanzo i'yi', yi'linge visoga u'yi'manye u'lu' ya mwano." 33 Sav'o wayi'manyaga, wali'laga ati', "I'yi' nhanzo ya mwana wanne! Waliwagwa na idimu idaki lya mu ipolu. Nhana Yosefu watambagu'ziv'agwa mav'ale mav'ale!"

34 Hangi' Yakobo wazemulaga vizwalo vyakwe ku' misayo, wazwalaga maguni'la mu muki'mbi'li' na wamuli'laga mwana wakwe ku' nsiku' nyingi. 35 V'ana v'akwe v'ose, v'a ki'gosya na v'a ki'ki'ma, v'ayaga ku'kamuhu'li'kya, ali'vi wakaanaga ku'hu'li'kiwa. Wayombaga, "Ndeki, ene nku'muli'la mwana wanne nsiku' zyose mpaka aho ndamufiki'le ku' v'afwile u'ko ali'." Hu' vyene ise wendeleyaga ku'muli'la.

36 Itungo lyeni'lo, av'o v'asu'lu'zya v'afikaga ku' Misili, v'amugu'zyaga Yosefu ku' muhanya wa v'asilikale v'alindi'li'zi v'amwa Falao*, lina lyakwe witanagwe Potifa.