1 Nawe Abalahamu watoolaga muki'ma yu'ngi', na lina lyakwe witanagwe Ketula. 2 Mwenu'yu' wamuv'yali'laga Abalahamu v'ana, na mina gav'o v'itanagwe: Zimulani, Yokishani, Medani, Midiani, Ishibaki na Shua. 3 Yokishani nawe wapandi'kaga v'ana, na mina gav'o v'itanagwe: Sheba na Dedani. Dedani hu' mwene wav'age sav'o lya V'aashuli, V'aletushi na V'aleumi. 4 Midiani nawe wapandi'kaga v'ana, na mina gav'o v'itanagwe: Efa, Efeli, Hanoki, Abida na Elidaa. V'ose v'enav'a v'av'age hu' wu'v'yalwa wamwa Ketula.

5 Abalahamu wamusali'kyaga mwane Isaka nsawo yakwe yose i'yo wav'age nayo. 6 Ali'vi Abalahamu aho wav'age akaali' ali'zuwu'ka, wav'apaga lu'holo v'aane av'o wapandi'kile ku' masuli'la v'akwe, na wav'asagaga ha lwandi' lwamwa Isaka mwane ku' ku'v'awi'la v'aye ku'le ku' lwandi' lwa mu ki'ya ki'gele v'akikale kwenu'ko.

7 Wikalo wakwe wose mu welelo Abalahamu wikalaga myaka igana li'mo na maku'mi mupungati' na itano. 8 Haho Abalahamu wagulalaga mugati' na wu'kiku'lu' wu'soga wa lu'v'ango, na wav'age mukiku'lu' wa nsiku' nyingi, nawe walondaga nzi'la ya v'antu' v'akwe av'o v'amalile ku'tongela. 9 V'aane Isaka na Isumaili, v'amuzyi'kaga sav'o Abalahamu ku' ipilinga lya ku' Makipela, bi'hi' na Mamule ku' ilale i'lo ndi' lyamwa Efuloni, mwana wamwa Sohali, Muhiti. 10 Ilale lyeni'lo Abalahamu wasangwa wali'gu'lile ku' V'ahiti. Henanho hu' aho wazyi'ki'lilwe muki' wakwe Sala, nawe Abalahamu wazyi'ki'lagwa haho. 11 Yav'aga ku'fuma aho wagulalaga Abalahamu, Mulungu wamudosyaga Isaka mwana wakwe. Nawe Isaka wav'ezyaga wikalo wakwe bi'hi' na lwinzi' lwa ku' Beeli-lahai-loi.

12 I'yi' hu' mmola ya wu'v'yalwa wamwa Isumaili mwana wamwa Abalahamu, u'yo wamuv'yali'laga Hajili, Mumisili, muzya wamwa Sala.

13 Genaga hu' mina ga v'ana v'amwa Isumaili, ku'londa na wu'v'yalwa wav'o: Muv'yalwa wa mbele wamwa Isumaili witanagwe Nebayoti, na v'alondelezi v'akwe v'av'age, Kedali, Adibeeli, Mibusamu, 14 Mishima, Duma, Masa, 15 Hadadi, Tema, Yetuli, Nafishi na Kedema. 16 V'enav'a hu' v'ana v'amwa Isumaili, na ku' v'enav'a kwav'aga na magongo iku'mi na tu'v'i'li', na ki'la yu'mo wav'aga mutemi ku' lwandi' lwakwe. Wikalo wav'o na magu'ngu'li gav'o gamanyi'kaga ku'londa na mina gav'o.

17 Wikalo wakwe wose mu welelo Isumaili, wikalaga myaka igana li'mo na maku'mi adatu' na mupungati', haho wagulalaga. Walondaga nzi'la ya v'antu' v'akwe av'o v'amalile ku'tongela. 18 Wikalo wa v'av'yalwa v'amwa Isumaili wav'age ku'lamuli'la ku' lwandi' lwa Havila mpaka Shuli, ku' ki'ya ya nsi' ya Misili ku'londa ku' Ashulu. Kwenu'ko v'ikalaga ki'bagu' na v'av'yalwa v'ichav'o v'ana v'amwa Abalahamu.

19 I'yi' hu' mmola ya wu'v'yalwa wamwa Isaka mwana wamwa Abalahamu. 20 Isaka aho wamutoolaga Lebeka, wasangwa ali' na musimo gwa myaka maku'mi ane. Lebeka wav'age mwaniki' wamwa Betueli, Mualamu, ku'fuma ku' kaya ya Padani-alamu. Lebeka wav'age ilu'mbu'ye na Labani.

21 Ali'vi Lebeka wav'age mugu'mba, ku'nguno yeni'yo Isaka wamulombaga Gu'ku' Mulungu. Nawe Gu'ku' Mulungu wazumyaga ku'lomba kwakwe, haho Lebeka wapandi'kaga mwitungo. 22 Sumbwa mwitungo gwenu'go gwav'age gwa mav'asa. V'ana v'av'age v'ali'wikindya mu nda yakwe, nawe wayombaga, "ku' ki' genaga gali'wigelisya ku' wanne?" Haho wayaga ku'kawu'zya ku'mwa Gu'ku' Mulungu. 23 Gu'ku' Mulungu wasu'v'yaga ati',

"Wu'li'ho wu'temi wu'v'i'li' mu nda yako,

na makabi'la av'i'li' ga v'antu' av'o u'lav'yale galalekane.

Wu'temi wu'mo wu'lav'e na nguzu ku'ki'la wiye,

na muhanya alav'e mukumba wa mudo."

24 Yav'aga aho zyagelani'laga nsiku' zyakwe zya kwipeku'la, lingaga! Lebeka wipeku'laga mav'asa. 25 Mwana wa kwandya kwipeku'la, muv'i'li' gwakwe gose wav'age wazaa, na wu'yenze muv'i'li' gose. Yeni'yo hu' nguno v'amupaga lina Esau*. 26 Mu itungo lyeni'lo, mwana wa wu'v'i'li' wav'yalagwa u'ku' amudimile kasinsila mudu'gu'ye Esau. Yeni'yo hu' nguno v'amupaga lina Yakobo*. Itungo lya ku'v'yalwa Esau na Yakobo sav'o Isaka wasangwa wafikyaga musimo gwa myaka maku'mi mukaga.

27 Aho v'ana v'enav'a v'aku'laga, Esau wav'age muhi'gi musoga, amani'lile ku'ya mu masenga. Sumbwa Yakobo wav'age mutekanu wa kwikala ha lu'go. 28 Hohene Isaka wamutogagwa Esau, ku'nguno wav'age atogilwe ku'lya nyama zya mu isenga, sumbwa Lebeka wav'age amutogilwe Yakobo.

29 Lu'siku' lu'mo, Yakobo watekaga ki'liwa cha dengu, nawe Esau wasu'v'aga ku'fuma ku' ihi'ga, ku'no azov'ile muno. 30 Esau wamuwi'laga Yakobo, "Nu'ku'lomba, u'mpe ki'liwa cheni'cho chazaa nchoyangi'zye, ku'nguno ni'na nzala ndaki muno." Yeni'yo hu' nguno v'amupaga lina Edomu*. 31 Yakobo nawe wasu'v'yaga ati', "Ngu'zi'zye mbela lwandi' lwa lole yako ya wu'v'yalwa wa mbele." 32 Haho Esau wayombaga, "Lingaga, ene ni' bi'hi' ku'fwa! Yi'ku'ngwasya ki' ku'v'a na lole ya wu'v'yalwa wa mbele?" 33 Yakobo wamuwi'laga, "Lahi'la mbela." Haho Esau walahi'laga, na ku'mugu'zi'zya lwandi' lwa lole yakwe ya wu'v'yalwa wa mbele. 34 Haho Yakobo wamupaga Esau mugate na ki'liwa cha dengu. Nawe Esau walyaga, wanywaga, na wawu'kaga henanho. I'vi hu' vyene Esau wanyataga lwandi' lwa lole ya wu'v'yalwa wa mbele.