1 Lu'siku' lu'mo mu lyu'v'a, ha itungo lya idu'ta, Abalahamu wav'age ikalile ha muzigo gwa ikutu lyakwe. Haho Gu'ku' Mulungu wamwifumi'i'laga Abalahamu, bi'hi' na miti' mihanya zya Mamule. 2 Aho wawu'syaga minso gakwe, kasinaga wav'awonaga v'antu' v'adatu' v'i'mile katanalo hado ha mbele yakwe. Haho wav'apeelelaga ku'v'asu'mbi'la, na aho wav'afiki'i'laga wasungamaga ku' isima na ku'yomba, 3 "V'agu'ku' v'anne, ene mukumba winywe nu'mulomba, u'lu' napandi'kaga wu'soga ha mbele yinywe muleke ku'mbi'ti'i'la, sumbwa mudi'le mu lu'go lwanne. 4 Leka galetwe minzi' madoo, ki'gele mukuse magu'lu' ginywe v'ose na musuuhe ha mutaka gwa muti' gwenu'gu'. 5 Ku'nguno mwafikaga mu lu'go lwanne, itungo muku'v'a musuuhile nku'v'ezya ki'liwa ki'doo. Mulye, ki'gele mwidibe ku'ya na musi'nzo gwinywe." Nav'o v'asu'v'yaga "Haya, v'ezyaga ki'ti' i'vi wayombaga."

6 Haho Abalahamu wangu'haga ku'su'v'a mu ikutu na ku'muwi'la muki' wakwe Sala ati', "V'ezya wangu' ngelo nhanya idatu' zya wu'fuma wu'nelezu, u'wu'kanye, na u'v'ezye migate." 7 Hangi' wangu'haga wangu' ku'ya ku' idale lya ng'ombe, wasogolaga ndogosa yi'mo nsoga na nnonu, wamupaga mukumba wakwe nawe wangu'haga ku'yi'si'nza na ku'yi'teka. 8 Aho ki'liwa chagelani'laga, Abalahamu wasolaga mbowoto, masyu'syu' na nyama yeni'yo, wav'atengelaga v'ageni v'enav'o. Aho v'av'aga v'ali'lya mweni'ki'li' wi'maga bi'hi' nav'o ha nsi'li'li' na muti'.

9 V'ageni v'enav'o v'amuwu'zyaga Abalahamu, "Muki' wako Sala ali' ku'he?" Abalahamu wasu'v'yaga, "Ali' mu ikutu."

10 Yu'mo mugati' nav'o wayombaga, "Nhana ndaku'su'v'i'le mu itungo ki'ti' lyeni'li' mwakizo, nawe Sala alav'e na mwana wa ki'gosya." Itungo lyeni'lo Sala wav'age i'mile ha muzigo gwa ikutu i'lo lyav'age ku' mpi'ndo gwav'o, apu'li'ki'zizye. 11 Abalahamu na Sala v'asangwa v'akakiku'la, na mu ki'ti'le cha v'aki'ma Sala wav'age wapelile ku'v'yala. 12 Ali'vi Sala wisekelaga mu moyo gwakwe na ku'yomba, "Ene ni' mukiku'lu', na mugosi wanne mukiku'lu', nku'togeziwa vihe ku'lala nawe?"

13 Henanho Gu'ku' Mulungu wamuwu'zyaga Abalahamu, "Ku' ki' Sala waseka na kwiwu'zya ati', ‘Yi'ku'kowoleka vihe ku'v'yala mwana ku' wu'kiku'lu' wanne?’ 14 Vihe, li'li'ho igambo ki' ilambu lya ku'mupota Gu'ku' Mulungu? Ndasu'v'e mu itungo ki'ti' lyeni'li' mwakizo, na Sala alav'e na mwana wa ki'gosya."

15 Ali'vi Sala ku'nguno ya kogoha wayombaga wu'fi ati', "Nkasekile!" Gu'ku' Mulungu wamuwi'laga, "Ku'du' u'kaane wasekaga."

16 V'ageni v'enav'o aho v'amali'laga ku'lya v'awu'kaga, nawe Abalahamu wav'afili'li'zyaga mpaka ha lwandi' lwa igu'lya u'lo v'akowolile ku'yi'wona kaya ya Sodoma.

17 Haho Gu'ku' Mulungu wiganikaga, "Vihe, muv'ise Abalahamu igambo lya ndaka yanne i'yo nu'koov'a ku'v'ezya? 18 Ku'nguno mwenu'yu' alav'e sav'o lya nsi' nhanya na ya nguzu na ku' wakwe makabi'la gose ga mu welelo galadosiwe. 19 Namusogolile mweni'ki'li' ki'gele av'ahembeke v'ana v'akwe na wu'v'yalwa wakwe ku'yi'londa nzi'la yanne, v'av'e v'atekanu na ku'v'ezya magambo ga lole ki'gele nanne mugelani'zi'zye ilagano lyanne ki'ti' i'vyo nayombile."

20 Haho Gu'ku' Mulungu wamuwi'laga Abalahamu, "Ku'li' na ki'li'lo ki'hanya ku'nguno ya v'antu' v'a kaya zya Sodoma na Gomola, na wu'kenagu'zi wav'o wingi muno. 21 Ku'nguno yeni'yo nku'sooka ki'gele mbone u'lu' wu'kenagu'zi u'wo v'ali'v'ezya wu'gelani'lile na ki'li'lo i'cho chakansanga. U'lu' yi'kav'ile vyene nku'manya."

22 Mugati' na v'antu' v'enav'o, v'av'i'li' v'adimaga nzi'la ku'ya ku' Sodoma, ali'vi Abalahamu wasigalaga henanho i'mile haki'mo na Gu'ku' Mulungu.

23 Nawe Abalahamu wamwegelaga Mulungu, na wamuwu'zyaga, "Nhana u'ku'v'azimangu'zya v'antu' v'a lole haki'mo na v'akenagu'zi? 24 Hamo v'akowolile ku'v'a v'ali'mo v'antu' maku'mi atano v'a lole mu kaya. Vihe, u'ku'yi'zimangu'zya ninga u'ku'leka wenge wa v'enav'o v'ali' mwenu'mo? 25 Nkav'ile kwiganika ku'v'a u'kowolile ku'v'ezya vyeni'vyo, ku'v'awu'laga v'antu' v'a lole haki'mo na v'akenagu'zi, v'a lole ku'v'a haki'mo na v'akenagu'zi! Ayi' ng'o! Muyangu'zi wa welelo akalekaga ku'v'ezya ga lole!" 26 Gu'ku' Mulungu wasu'v'yaga ati', "U'lu' nasanga v'antu' maku'mi atano v'a lole mu kaya ya Sodoma, nku'leka ku'zimangu'zya kaya yose ku'nguno yav'o."

27 Abalahamu wayombaga hangi' ati', "Nagimaga ku'yomba nanho ev'e Gu'ku' wanne ninga i'vi ene ni' lu'wuwu na matunde du'. 28 Hamo v'akowolile kwigela v'antu' v'a lole maku'mi ane na v'atano, vihe, u'ku'yi'zimangu'zya ku'nguno v'angi'laga v'atano ku' av'o maku'mi atano?" Gu'ku' Mulungu wasu'v'yaga, "U'lu' nasanga v'enav'o v'a lole nku'leka ku'zimangu'zya."

29 Abalahamu walambaga ku'yomba hangi', "Hamo v'akowolile kwigela maku'mi ane mwenu'mo?" Gu'ku' Mulungu wasu'v'yaga, "Ku'nguno yav'o, nku'leka ku'zimangu'zya kaya."

30 Abalahamu walambaga ku'mwikonga, "Ev'e Gu'ku', ku'du' u'gaye, nu'yomba hangi', hamo v'akowolile kwigela v'antu' v'a lole maku'mi adatu'?" Gu'ku' Mulungu wasu'v'yaga, "Ku'nguno ya v'enav'o v'a lole nku'leka ku'v'ezya vyeni'vyo."

31 Abalahamu wayombaga ati', "Nagimaga ku'yomba na Gu'ku' wanne, hamo v'akowolile kwigela v'antu' v'a lole maku'mi av'i'li'?" Gu'ku' Mulungu wasu'v'yaga, "Ku'nguno ya v'enav'o maku'mi av'i'li' nku'leka ku'zimangu'zya kaya."

32 Ndahi'lo Abalahamu wayombaga ati', "Ev'e Gu'ku', nakwikonga ku'du' u'gaye, sumbwa nu'yomba hangi' kamo du'. Vihe, u'lu' v'akowolile kwigela v'antu' v'a lole iku'mi yi'ku'v'a vihe?" Gu'ku' Mulungu wasu'v'yaga, "Ku'nguno ya v'enav'o iku'mi nku'leka ku'zimangu'zya kaya yeni'yo."

33 Haho Gu'ku' Mulungu wamali'laga ku'yomba na Abalahamu, wahafumaga. Abalahamu nawe wasu'v'aga ku' lu'go lwakwe.