Gênesis 20

Abalahamu na Abimeleki

1 Hohene Abalahamu wawu’kaga ku’fuma ku' Mamule, walondaga lwandi' lwa dakama ku' ibalangu' lya Negebu. Yav’aga aho wafikaga kwenu’ko, wav’ezyaga wikalo wakwe hagati' ya Kadeshi na Shuli, hangi' wayaga ku’kikala ku' kaya ya Gelali ki’ti' mugeni mwizi’li’zi. 2 Aho wav’aga kwenu’ko Abalahamu, wav’awi’laga v’antu' ati', "Sala ali' ilu’mbu' lyanne." Ku’nguno yeni’yo Abimeleki, mutemi wa Gelali, wamusolaga Sala av’e muki' wakwe.

3 Ali’vi Mulungu wamwizi’i’laga Abimeleki mu ndoti wu’ziku' na ku’muwi’la ati', "Lingaga, ev’e u’ku’fwa ku’nguno ya muki’ma u’yo wamusolile ali' muki' wa muntu'!" 4 Itungo lyeni’lo Abimeleki wasangwa akaali' ku’lala na Sala. Ku’nguno yeni’yo wasu’v’yaga ati', "Gu’ku', u’ku’wu’laga v’antu' ninga v’akav’ile na musango? 5 Abalahamu mweni’ki’li' wambwi’lile ati', mwenu’yu' ali' ilu’mbu’ye, hangi' ninga Sala mweni’ki’li' wambwi’lile ati' mwenu’yu' ali' mudu’gu’ye. Ene nav’ezyaga vyeni’vyo ku' moyo mugololoku na makono gape."

6 Haho Mulungu wamuwi’laga hangi' mu ndoti yeni’yo, "Nanne manyile ku’v’a ku' moyo mugololoku wav’ezizye vyeni’vyo. Hu' hene naku’hangi’li’zizye ku’du' u’nkenagu’li’le ku' ku’mukuumya muki’ma mwenu’yo. 7 Gi’si' u’musu’v’ye muki’ma mwenu’yo ku' mugosi wakwe. Abalahamu ali' mufumbu’zi, aku’ku’lombela u’v’e na wu’panga. U’lu' u’leke ku’musu’v’ya u’manye nhana u’ku’fwa, ev’e na v’antu' v’ako v’ose."

8 Abimeleki wipunaga, wav’itanaga v’akumba v’akwe v’ose, na ku’v’alotoolela gose ago wawonaga mu ndoti, nav’o v’ogohaga muno. 9 Hangi' Abimeleki wamwitanaga Abalahamu na ku’muwu’zya, "Waku’v’ezezizye ki'? Ninga naku’kenizye ki' mpaka waku’lengelaga wu’kenagu’zi, ene na wu’temi wanne? Wambezezizye igambo i’lo li’kakowola ku’v’eziwa." 10 Abimeleki walambaga ku’muwu’zya, "Wali' u’li' na ndaka ki' ku’v’ezya vyeni’vi?"

11 Abalahamu wasu’v’yaga ati', "Nav’ezizye vyeni’vyo ku’nguno ndi' nawona henanha hadu’hu' u’yo amogohile Mulungu, hene ndi' nogoha ku’v’a mulambu’lage ki’gele mumusole muki' wanne. 12 Nawe nhana ali' ilu’mbu' lyanne, ali' mwana wamwa v’av’a, ku’kav’ile v’a nda yi’mo nanne, hu' nguno wav’a muki' wanne. 13 Yav’aga ku’fuma aho Mulungu wambezizye ku’hafuma ha lu’go lwamwa v’av’a, haho ndi' namuwi’la muki' wanne, ‘Nu’ku’lomba ki’la aho ku’lakaye u’yomba du' ati' ene ni' ilu’mbu’yo. I’vi hu' vyene u’lav’e walagi’la chelu' chako ku' wanne.’ "

14 Haho Abimeleki wamusu’v’yaga Sala ku' mugosi wakwe Abalahamu. Hangi' wamupaga madale ga ng’ombe, nkolo na mbu’li haki’mo na v’akumba v’a ki’gosya na v’a ki’ki’ma. 15 Hangi' Abimeleki wamuwi’laga Abalahamu, "Lingaga, nsi' yanne yose yi’li' ha mbele yako, sogolaga aho u’togilwe wikale."

16 Hangi' wamuwi’laga Sala, "Lingaga, namupaga mudu’gu’yo vipande ki’hu’mbi' ki’mo vya feza. Nav’ezyaga vyeni’vyo ha mbele ya v’antu' v’ose, ki’gele v’amanye ati' u’kav’ezizye kav’i, nanho u’ku’v’a na lole ha v’antu' v’ose."

17 Haho Abalahamu wamulombaga Mulungu, nawe wav’api’zyaga Abimeleki, muki' wakwe, na v’azya v’akwe, nav’o v’apandi’kaga hangi' v’ana. 18 Ku’nguno Gu’ku' Mulungu wasangwa wav’atungile ku’v’yala v’aki’ma v’ose v’a mu lu’go lwamwa Abimeleki, ku’nguno yamwa Sala muki' wamwa Abalahamu.