Gênesis 42

V’adu’gu' v’amwa Yosefu v’ali’ya ku' Misili

1 Aho Yakobo wigagwa ku’v’a ku' Misili ku’li' na viliwa, haho wav’awi’laga v’aane ati', "ku' ki' mwikalile na kwilingi’li’la du'? 2 Degeleki, nigagwa ku’v’a ku' Misili ku’li' na viliwa. Yagi kwenu’ko mukagu’le viliwa, ki’gele ku’du' ku’fwe na nzala."

3 Hohene v’adu’gu' v’amwa Yosefu iku’mi v’ayaga ku' nsi' ya Misili ku’kagu’la viliwa. 4 Ali’vi Benyamini muzunaye na Yosefu, akayile haki’mo nav’o kwenu’ko, ku’nguno Yakobo sav’o wamukaani’zyaga ku' kogoha ku’v’a akowolile ku’vulali’ka. 5 Hu' vyene v’ana v’amwa Izilaeli v’ayaga ku' Misili haki’mo na v’ahemezi v’angi', ku’nguno ku' nsi' ya Kanaani nako kwav’age na nzala.

6 Itungo lyeni’lo Yosefu wasangwa wav’ile muhanya wa ku' nsi' ya Misili. Hu' mwene wav’agu’zi’zyage v’antu' v’ose viliwa. Yav’aga aho v’adu’gu’ye v’afikaga kwenu’ko v’amuku’v’i’i’laga Yosefu ku' isima. 7 Aho Yosefu wav’awonaga v’adu’gu’ye, wav’amanyaga, ali’vi wiv’ezyaga ki’ti' akav’amanya na wayombaga nav’o ku' wu’daki na ku’v’awu’zya ati', "Inywe mufumi’i’lile ku’he?" V’asu’v’yaga ati', "Iswe ku’fumi’i’lile ku' nsi' ya Kanaani. Kwizaga ku’gu’la viliwa." 8 Ninga i’vi Yosefu wav’amanyaga v’adu’gu’ye, sumbwa v’eni’ki’li' v’akamumanyile. 9 Haho Yosefu wizu’ki’laga ndoti zyakwe zya nsiku' nyingi i’zyo wav’alotelage v’aku’lu’ye, hene wav’awi’laga, "Inywe muli' v’asu’u’zi. Mwizaga ku’su’u’la muwone aho hadu’hu' nguzu ya wi’mi’li’zi wa nsi'."

10 V’eni’ki’li' v’asu’v’yaga ati', "Yi’kav’ile vyene gu’ku' wiswe! Iswe v’akumba v’ako kwizaga ki’gele ku’gu’le viliwa. 11 Iswe v’ose ku’li' v’ana v’amwa v’av’a yu’mo, iswe ku’li' v’a lole, ku’kav’ile v’asu’u’zi." 12 Ali’vi Yosefu walambaga ku’yomba, "Ng’o! Mwizaga henanha ku’su’u’la aho hadu’hu' nguzu ya wi’mi’li’zi wa nsi' yiswe." 13 Sumbwa v’eni’ki’li' v’asu’v’yaga ati', "Iswe, v’akumba v’ako, ku’li' v’adu’gu' iku’mi na v’av’i’li', v’ana v’amwa v’av’a yu’mo wa ku' nsi' ya Kanaani. Sumbwa muzuna wiswe wa ku' mpelo ali' na v’av’a ku' lu’go, na yu’ngi' wamalile ku’gulala."

14 Haho Yosefu wav’awi’laga ati', "Ki’ti' i’vi namuwi’laga inywe muli' v’asu’u’zi! 15 Ali’vi ku’kamudimya ku' nzi’la i’yi': Nhana nu’lahi’la ku' lina lyamwa Falao ku’v’a mukawu’ke henanha mpaka ize mwenu’yo muzuna winywe. 16 Mutu’mi yu’mo mugati' na inywe aye akamulete mudu’gu' winywe mudo, na v’angi' muku’lugali’lwa mu igelezya ki’gele ku’wona mihayo zinywe u’lu' muli’yomba nhana. U’lu' yi’kav’ile vyene nu’lahi’la ku' wikalo wamwa Falao, inywe muli' v’asu’u’zi!" 17 Hangi' wav’alugali’laga v’ose mu igelezya ku' itungo lya nsiku' idatu'.

18 Mu lu’siku' lwa wu’datu' wav’awi’laga ati', "Ene nu’mogoha Mulungu. Ku’nguno yeni’yo muv’ezye i’cho nu’muwi’la ki’gele mupandi’ke wu’panga. 19 U’lu' nhana inywe muli' v’antu' v’a lole, mugati' na inywe yu’mo asigale mu igelezya, na v’angi' v’afile viliwa ku' v’antu' v’inywe av’o v’ali’tuka na nzala. 20 Ali’vi yi’li’mudima mukamulete mudu’gu' winywe mudo ha wanne. Yeni’yi' yi’ligelisye mihayo zinywe u’lu' zya nhana, na inywe mulaleke ku’wu’lagwa." Hohene v’azumyaga ku’v’ezya vyeni’vyo.

21 Haho v’eni’ki’li' v’iwi’laga ati', "Nhana ku’li’tusiwa ku’nguno ya wu’kenagu’zi wiswe u’wo kwamuv’ezezizye mudu’gu' wiswe. Ninga i’vi kwav’age ku’muwine i’vyo ali’saya mu moyo gwakwe na ku’kwikonga ali’vi ku’kamwigilwe, na yeni’yi' hu' nguno ya lu’duko lwenu’lu' lu’li’ku’pandi’ka." 22 Lubeni wasu’v’yaga ati', "Ene ndi' nkamuwi’lile ati', muleke ku’muv’ezezya kav’i muzuna wiswe? Ali’vi mukandegelekile! Gi’si' ku’li’tusiwa ku’nguno ya magazi gakwe!"

23 Aho v’av’aga v’ali’yomba vyeni’vyo v’akamanyile ku’v’a Yosefu ali’v’igwa ki’yombele chav’o, ku’nguno wayombage nav’o ku’v’i’ti’la ku' mufumbu’zi wa viyombele. 24 Haho Yosefu wayaga ku' mpelo na kwenu’ko wali’laga ku’nguno ya mihayo zyav’o. Aho walembelaga, wasu’v’aga na ku’su’nsu’mu’la nav’o hangi', na wasemuzyaga adimwe Simiyoni na ku’tungwa mpi’ngu' ha mbele ya minso gav’o.

V’adu’gu' v’amwa Yosefu v’ali’su’v’a ku' kaya

25 Hangi' Yosefu wav’alagi’li’zyaga v’akumba v’akwe v’av’okazi’zye viliwa mu maguni’la gav’o na ku’tu’u’la hela i’zyo v’ali' v’agu’li’laga, ki’la yu’mo mu iguni’la lyakwe, na v’apiwe viliwa vya mu nzi’la. Haho v’av’av’ezezyaga vyeni’vyo. 26 Hangi' v’azipekekezyaga mpunda miligo zyav’o zya viliwa, haho v’awu’kaga.

27 Aho v’av’age v’ali' mu nzi’la v’afikaga ha lwandi' lu’mo lwa ku’lala, mugati' nav’o yu’mo watungu’laga iguni’la lyakwe ki’gele ayi’pe mpunda yakwe ki’liwa. Haho wakumyaga ku’sanga, kasinaga ku’li' na hela ha igu’lya na iguni’la lyakwe! 28 Hohene wav’awi’laga v’adu’gu’ye ati', "Lingagi, hela zyanne v’azisu’v’yaga! I’zi aha ha igu’lya na iguni’la lyanne!" Aho v’igagwa vyeni’vyo v’agwaga magongofuka, ki’la yu’mo wamugalu’ki’laga mwiye ku’no ali’tetema, na kwiwu’zya ati', "Igambo ki' lyeni’li' Mulungu waku’v’ezezyaga?"

29 Yav’aga aho v’afikaga ku' nsi' ya Kanaani ku’mwa sav’o, haho v’amutentemuli’laga yose i’yo v’ayi’pandi’kaga kwenu’ko, v’amuwi’laga ati', 30 "Muhanya wa nsi' yeni’yo wav’age ali’yomba niswe ku' wu’daki muno, hangi' wav’age ali’kwiganiki’la ku’v’a iswe ku’li' v’asu’u’zi v’a nsi' yav’o. 31 Ali’vi iswe kwamuwi’lile ati', ‘Iswe ku’li' v’antu' v’a lole, na ku’kav’ile v’asu’u’zi. 32 Iswe ku’li' v’adu’gu' iku’mi na v’av’i’li', v’ana v’amwa v’av’a yu’mo. Ali’vi yu’mo wamalile ku’gulala na muzuna wiswe wa ku' mpelo kwamulekile na v’av’a ku' lu’go ku' nsi' ya Kanaani.’

33 "Haho mwenu’yo muhanya wa nsi' yeni’yo waku’wi’lile ati', ‘I’vi hu' vyene yi’kwigelisya ku’v’a nhana muli' v’a lole: Mumuleke yu’mo mugati' na inywe haki’mo nanne henanha, na v’angi' v’aye ki’gele v’afile viliwa ku’nguno ya v’adu’gu' v’inywe av’o v’ali’tuka na nzala. 34 Hangi' mumulete ku' wanne u’yo mudu’gu' winywe mudo. Ku' nzi’la yeni’yi' nku’manya ku’v’a inywe mukav’ile v’asu’u’zi, sumbwa muli' v’a lole. Haho nku’muleku’li’la mudu’gu' winywe, na muku’zumi’ziwa ku’v’ezya wu’su’lu’zya mu nsi' yeni’yi'.’ "

35 Yav’aga aho v’ali’fuki’la viliwa ku’fuma mu maguni’la gav’o, v’akumyaga ku’wona ki’la yu’mo mugati' na iguni’la lyakwe muli' na mbuguli ya hela zyakwe! Aho v’awonaga vyeni’vyo v’eni’ki’li' na sav’o v’ogohaga muno. 36 Haho sav’o Yakobo wav’awi’laga ati', "Inywe mwammali’laga v’ana v’anne! Yosefu wayile, Simiyoni nkamuwona, hangi' muli’koov’a mumusole na Benyamini. Magambo gose genaga gampandi’kaga ene!" 37 Haho Lubeni wamuwi’laga ise ati', "Muleke Benyamini nje nawe nanne nku’mwangali’la. U’lu' ndeke ku’musu’v’ya u’v’awu’lage v’ana v’anne v’av’i’li'."

38 Ali’vi Yakobo wayombaga ati', "Mwana wanne akakowola ku’ya na inywe. Mudu’gu’ye wagulalile, na mwenu’yu' hu' wasigalile inene. U’lu' akavulali’ke kwenu’ko muyile, ene muku’ndengela ku’ya mu ki’v’i’mbi' ku’nguno ya misayo na wu’kiku’lu' wanne."