1 Yav'aga aho Adamu walalaga na muki' wakwe Eva, nawe wapandi'kaga mwitungo, na wav'yalaga mwana wa ki'gosya nawe wamupaga lina Kaini. *Eva wayombaga, "Napandi'ka mwana ku' wu'kowozi wamwa Gu'ku' Mulungu." 2 Aho lyav'i'taga itungo, wav'yalaga hangi' mwana wa ki'gosya, mudu'gu' wamwa Kaini, na wamupaga lina lyakwe Habele. Habele wav'age mudi'mi wa nkolo na mbu'li na Kaini wav'age muli'mi. 3 Yav'aga lu'siku' lu'mo, Kaini wamufumi'zyaga Gu'ku' Mulungu kalu'mbi'lo ka viliwa ku'fuma ku' mugu'nda gwakwe. 4 Nawe Habele wafumyaga kalu'mbi'lo ku'fuma ku' tu'di'lana twa mbele na maguta gato. Nawe Gu'ku' Mulungu watogeziv'agwa na Habele na kalu'mbi'lo kakwe. 5 Ali'vi akatogeziv'ilwe na Kaini ninga kalu'mbi'lo kakwe. Haho Kaini wagayaga muno na wu'syu' wakwe wasininkalaga. 6 Gu'ku' Mulungu wamuwu'zyaga Kaini, "Wagayi'laga ki'? Na ku' ki' wu'syu' wako wasininkalaga? 7 Vihe, u'lu' u'v'ezye visoga u'kakowolile ku'zumiwa? Ali'vi u'lu' u'kav'ile ku'v'ezya visoga, wu'kenagu'zi wu'li'kwitegela ha muzigo. Wu'li'kwigomelwa, ali'vi yi'li'ku'dima u'wu'kinde."

8 Aho lyav'i'taga itungo Kaini wamuwi'laga muzunaye Habele, "Ku'yage ku' mugu'nda." Yav'aga aho v'av'aga kwenu'ko Kaini wamugwi'li'laga Habele na wamuwu'lagaga. 9 Haho Gu'ku' Mulungu wamuwu'zyaga Kaini, "Mudu'gu'yo Habele ali' ku'he?" Kaini wasu'v'yaga, "Ene nkamanya. Vihe, ene hu' ni' musu'ngi wa muzuna wanne?" 10 Gu'ku' Mulungu wamuwu'zyaga, "Wav'ezyaga vihe ev'e? Magazi ga muzunayo gali'ndi'li'la ku'fuma ha nsi'. 11 Gi'si' ev'e wafwizi'i'lagwa u'ku'v'a ku'le na nsi' i'yo yapokelaga magazi ga mudu'gu'yo na ku'ganywa ku'fuma mu makono gako. 12 Aho u'lav'e u'li'yi'li'ma nsi' yi'laleke ku'ku'fumi'zya hangi' viliwa vingi. U'ku'v'a muntu' wa ku'yegayega na ku'gayiwa wikalo mu welelo."

13 Kaini wamuwi'laga Gu'ku' Mulungu, ati', "Lu'duko lwanne lu'li' lu'hanya muno ku'lu'kowola ng'o!

14 "Lingaga, walelo wansagaga ku'fuma mu nsi' yeni'yi' nikale ku'le nanho, nanne nku'v'a wa ku'yegayega mu welelo, na muntu' u'yo alambone alambu'lage." 15 Ali'vi Gu'ku' Mulungu wasu'v'yaga ati', "Ayi', yi'kav'ile vyene. U'yo alaku'wu'lage ev'e alali'pi'ki'ziwe kali' mupungati' yakwe." Haho Gu'ku' Mulungu wamutu'u'li'laga lu'manyi'lo ki'gele u'yo alamuwone aleke ku'muwu'laga.

16 Hangi' Kaini wahafumaga ha mbele yamwa Gu'ku' Mulungu, na wayaga ku'kikala ku' nsi' ya Nodi* ku' lwandi' lwa ku' ki'ya ya Edeni.

17 Kaini walalaga na muki' wakwe, nawe wapandi'kaga mwitungo na ku'v'yala mwana u'yo wamupaga lina Enoki. Ha itungo lyeni'lo Kaini wasangwa ali'zyenga kaya na ku'hapa lina lya mwana wakwe Enoki. 18 Nawe Enoki wapandi'kaga mwana lina Iladi, Iladi wapandi'kaga mwana lina Mehuyaeli, Mehuyaeli wapandi'kaga mwana lina Metushaeli, na Metushaeli wapandi'kaga mwana lina Lameki. 19 Lameki watoolaga v'aki'ma v'av'i'li', yu'mo witanagwe Ada na wa wu'v'i'li' Sila. 20 Ada wamuv'yalaga Yabali u'yo wav'age sav'o lya v'asav'i v'a mitugo, av'o v'av'age v'ikazi v'a mu mbaga. 21 Lina lya mudu'gu'ye witanagwe Yubali, na mwenu'yo hu' wav'age sav'o lya v'ose v'agomba tu'dono na minyonge. 22 Nawe Sila wamuv'yalaga Tubali-kaini u'yo wav'age musuli wa viseme vyose vya shaba na chu'ma. Na ilu'mbu'ye na Tubali-kaini witanagwe Naama.

23 Lu'siku' lu'mo, Lameki wav'awi'laga v'aki' v'akwe,

"Ada na Sila mumpu'li'ki'zye muzwi gwanne,

inywe v'aki' v'amwa Lameki degeleki i'cho nu'yomba,

ene nawu'lagile muntu' u'yo ndi' wanvulazya,

nawu'lagile musu'mbana ku'nguno ya ku'nsatya.

24 U'lu' muntu' u'yo alamuwu'lage Kaini,

alali'pi'ki'ziwe kali' mupungati' yakwe,

sumbwa ku'mwa Lameki u'yo alamuwu'lage,

alali'pi'ki'ziwe kali' maku'mi mupungati' na mupungati' yakwe."

25 Hohene Adamu walalaga na muki' wakwe, nawe wav'yalaga hangi' mwana wa ki'gosya, na wamupaga lina Seti.* Wayombaga ati', "Nayali'lagwa na Mulungu ku'pandi'ka mwana yu'ngi' ha lwandi' lwamwa Habele u'yo Kaini wamuwu'lagile." 26 Nawe Seti wapandi'kaga mwana wa ki'gosya, na wamupaga lina Enoshi. Na hene haho v'antu' v'asangwa v'alamulaga ku'mwisenga Gu'ku' Mulungu ku' lina lyakwe Yahweh*.