1 Hohene V'aisumaili v'enav'o aho v'afikaga ku' Misili, v'amugu'zyaga Yosefu ku' Mumisili yu'mo lina lyakwe Potifa. Mwenu'yu' wav'age muhanya wa v'asilikale v'alindi'li'zi v'amwa Falao.

2 Ali'vi Gu'ku' Mulungu wav'age haki'mo na Yosefu, nawe wamuv'ezezyaga tu'soga. Yosefu wikalaga mu nnumba yamwa gu'ku' wakwe Mumisili. 3 Yav'aga mwenu'yo gu'ku' wakwe wawonaga ku'v'a Gu'ku' Mulungu ali' haki'mo na Yosefu, na hu' mwene ali'mugelani'zi'zya ku' magambo gose ago ali'gav'ezya. 4 Hohene, Yosefu wapandi'kaga wu'soga ha mbele yamwa Potifa. Haho wamusogolaga ku'v'a mugwasya wakwe, hangi' wamuv'ezyaga ku'v'a mwi'mi'li'zi wa mu lu'go lwakwe na mwangali'zi wa nsawo yakwe yose. 5 Ku'fumi'i'la itungo lyamwa Potifa ku'muv'ezya Yosefu av'e mwi'mi'li'zi wa nsawo yakwe yose, Gu'ku' Mulungu wahadosyaga ha lu'go lwa Mumisili mwenu'yo ku'nguno yamwa Yosefu. Lu'v'ango lwamwa Gu'ku' Mulungu lwav'aga ha igu'lya na ki'la ki'ntu' i'cho wav'age nacho mu lu'go na mu migu'nda. 6 Ku'nguno yeni'yo Mumisili mwenu'yo wamuv'ezyaga Yosefu ku'v'a muhanya ku' ki'la ki'ntu' chakwe, na ku' itungo lyeni'lo akawine nguno ya ku'lawa magambo gakwe sumbwa ki'liwa chakwe du'.

Ali'vi Yosefu wav'age musu'mbana mugololoku na wa kwiv'elelwa. 7 Aho lyav'i'taga itungo, muki' wamwa gu'ku' wakwe wamwigomelagwa Yosefu, na ku'muwi'la ati', "Izu'u' u'lale nanne." 8 Ali'vi Yosefu wakaanaga na ku'muwi'la mwenu'yo muki' wamwa gu'ku' wakwe ati', "Lingaga! Gu'ku' wanne wampile wu'hanya ku' ki'la ki'ntu' mu nnumba yakwe. Hohene akav'ile ku'lawa hangi' ki'ntu' ninga ki'mo, ku'nguno vyose wamalile ku'vitu'u'la mu makono ganne. 9 Mu lu'go lwenu'lu' hadu'hu' muhanya ku'ki'la ene. Gu'ku' wanne akangizizye ki'ntu' ninga ki'mo sumbwa ev'e du', ku'nguno ev'e u'li' muki' wakwe. Nku'kowola vihe ku'v'ezya wu'kenagu'zi wu'v'i ki'ti' wenu'wu' na kwikoov'ela musango ku'mwa Mulungu?" 10 Ali'vi muki'ma mwenu'yo walambaga ku'mwigongela Yosefu ki'la lu'siku', ki'gele azumye ku'lala nawe. Sumbwa Yosefu akazumizye ku'lala nawe ninga kwiegela nawe.

11 Yav'aga lu'siku' lu'mo, Yosefu wingi'laga mu nnumba ku'tu'mama mili'mo zyakwe ki'ti' i'vyo yi'li' ki'ti'le chakwe. Itungo lyeni'lo hasangwa hadu'hu' mukumba ninga yu'mo mu nnumba. 12 Haho muki'ma mwenu'yo wadimaga ki'zwalo chamwa Yosefu na ku'muwi'la ati', "Izu'u' u'lale nanne!" Ali'vi Yosefu wamulekelaga ki'zwalo cheni'cho mu makono gakwe, na wapeelelaga ha ibala.

13 Muki'ma mwenu'yo aho wawonaga ku'v'a Yosefu wamulekelaga ki'zwalo chakwe mu makono gakwe, na ku'peelela ha ibala, 14 wav'itanaga v'akumba v'a mu lu'go lwakwe na ku'v'awi'la ati', "Lingagi! U'yu' Muebulania wakaletwa hano ki'gele aku'pondensoni! Wingi'laga mu nnumba ki'gele alale nanne lwa nguzu, ali'vi nabu'bu'zya muno. 15 Aho wawona nu'bu'bu'zya na ku'lomba wu'gwasya, wapeelelaga ha ibala na ku'leka ki'zwalo chakwe ku' wanne!"

16 Hohene muki'ma mwenu'yo waki'tu'u'laga ki'zwalo cheni'cho mpaka mugosi aho wasu'v'aga ha lu'go. 17 Haho wamutentemuli'laga mihayo zyeni'zyo ati', "U'yu' mukumba Muebulania u'yo waku'letelile ha lu'go lwiswe, wali' wingi'laga ku' wanne ki'gele ampondensoni! 18 Ali'vi aho nabu'bu'zya ku'lomba wu'gwasya, wapeelelaga ha ibala na ku'leka ki'zwalo chakwe ha wanne!"

19 Yav'aga gu'ku' wamwa Yosefu aho wigagwa mihayo zya muki' wakwe ku'v'a hu' vyene mukumba wakwe wamuv'ezezyaga, haho ki'sila chakwe chapanki'laga. 20 Wamudimaga Yosefu na ku'mulugali'la mu igelezya, i'lo v'av'agemo v'atungwa v'a mutemi. Nawe Yosefu wav'agamo.

21 Ali'vi ninga mwenu'mo mu igelezya, Gu'ku' Mulungu wav'aga haki'mo na Yosefu. Wamuv'ezezyaga chelu' cha ku'muv'ezya apandi'ke wu'soga ha mbele ya muhanya wa igelezya. 22 Ku'nguno yeni'yo muhanya wa igelezya wamuv'ezyaga Yosefu av'e muhanya wa v'atungwa v'ose, na av'e mwi'mi'li'zi wa magambo gose ga mwenu'mo. 23 Mwenu'yo muhanya wa igelezya akalawile hangi' ki'ntu' ninga ki'mo i'cho chav'age ha wi'mi'li'zi wamwa Yosefu, ku'nguno Gu'ku' Mulungu wav'age ali' haki'mo nawe, na ku'mugelani'zi'zya ku' ki'la igambo i'lo wali'v'ezyage.