1 I'yi' hu' mmola ya mina ga v'av'yalwa v'amwa Adamu. Itungo i'lo Mulungu wav'atundaga v'antu', wav'atundaga ku' wikole wakwe. 2 Wav'atundaga mugosya na muki'ma, haho wav'adosyaga na wav'apaga lina "V'antu'."

3 Adamu aho wafikyaga musimo gwa myaka igana li'mo na maku'mi adatu', hangi' wapandi'kaga mwana wa ku'mwikola, ku' wikole wakwe, wamupaga lina Seti. 4 Ku'fuma aho wav'yalagwa Seti, Adamu wikalaga myaka magana munane. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 5 Wikalo wakwe wose mu welelo Adamu wikalaga myaka magana kenda na maku'mi adatu', haho wagulalaga.

6 Nawe Seti aho wafikyaga musimo gwa myaka igana li'mo na itano, haho wapandi'kaga mwana lina Enoshi. 7 Ku'fuma aho wav'yalagwa Enoshi, Seti wikalaga myaka magana munane na mupungati'. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 8 Wikalo wakwe wose mu welelo Seti wikalaga myaka magana kenda na iku'mi na iv'i'li', haho wagulalaga.

9 Nawe Enoshi aho wafikyaga musimo gwa myaka maku'mi kenda, haho wapandi'kaga mwana lina Kenani. 10 Ku'fuma aho wav'yalagwa Kenani, Enoshi wikalaga myaka magana munane na iku'mi na itano. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 11 Wikalo wakwe wose mu welelo Enoshi wikalaga myaka magana kenda na itano, haho wagulalaga.

12 Nawe Kenani aho wafikyaga musimo gwa myaka maku'mi mupungati', haho wapandi'kaga mwana lina Mahalaleli. 13 Ku'fuma aho wav'yalagwa Mahalaleli, Kenani wikalaga myaka magana munane na maku'mi ane. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 14 Wikalo wakwe wose mu welelo Kenani wikalaga myaka magana kenda na iku'mi, haho wagulalaga.

15 Nawe Mahalaleli aho wafikyaga musimo gwa myaka maku'mi mukaga na itano, haho wapandi'kaga mwana lina Yaledi. 16 Ku'fuma aho wav'yalagwa Yaledi, Mahalaleli wikalaga myaka magana munane na maku'mi adatu'. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 17 Wikalo wakwe wose mu welelo Mahalaleli wikalaga myaka magana munane na maku'mi kenda na itano, haho wagulalaga.

18 Nawe Yaledi aho wafikyaga musimo gwa myaka igana na maku'mi mukaga na iv'i'li', haho wapandi'kaga mwana lina Enoki. 19 Ku'fuma aho wav'yalagwa Enoki, Yaledi wikalaga myaka magana munane. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 20 Wikalo wakwe wose mu welelo Yaledi wikalaga myaka magana kenda na maku'mi mukaga na iv'i'li', haho wagulalaga.

21 Nawe Enoki aho wafikyaga musimo gwa myaka maku'mi mukaga na itano, haho wapandi'kaga mwana lina Metusela. 22 Ku'fuma aho wav'yalagwa Metusela, Enoki wikalaga myaka magana adatu'. Nawe walondaga nzi'la yamwa Mulungu. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 23 Wikalo wakwe wose mu welelo, Enoki wikalaga myaka magana adatu' na maku'mi mukaga na itano. 24 Enoki wav'age ali' bi'hi' na Mulungu, haho walekaga kwigela ku'nguno Mulungu wamusolaga.

25 Nawe Metusela aho wafikyaga musimo gwa myaka igana li'mo na maku'mi munane na mupungati', haho wapandi'kaga mwana lina Lameki. 26 Ku'fuma aho wav'yalagwa Lameki, Metusela wikalaga myaka magana mupungati' na maku'mi munane na iv'i'li'. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 27 Wikalo wakwe wose mu welelo, Metusela wikalaga myaka magana kenda na maku'mi mukaga na kenda, haho wagulalaga.

28 Nawe Lameki aho wafikyaga musimo gwa myaka igana li'mo na maku'mi munane na iv'i'li', haho wapandi'kaga mwana wa ki'gosya. 29 Wamupaga lina Nowa* na ku'yomba, "Mwenu'yu' hu' aku'ku'lembezya ku' mili'mo ziswe milambu haki'mo na lu'duko lwa makono giswe, i'yo ku'tu'mama ku' nsi' i'yo yafwizi'i'lwa na Gu'ku' Mulungu." 30 Ku'fuma aho wav'yalagwa Nowa, Lameki wikalaga myaka magana atano na maku'mi kenda na itano. Mugati' na myaka zyeni'zyo wapandi'kaga hangi' v'ana, v'a ki'gosya na v'a ki'ki'ma. 31 Wikalo wakwe wose mu welelo, Lameki wikalaga myaka magana mupungati' na maku'mi mupungati' na mupungati', haho wagulalaga.

32 Nawe Nowa aho wafikyaga musimo gwa myaka magana atano, haho wapandi'kaga mwana lina lyakwe Shemu, hangi' wapandi'kaga v'ana v'angi' Yafeti na Hamu.