1 Hangi' yagwaga nzala ndaki mu nsi', ku'leka i'yo ndi' yagwa ha itungo lyamwa Abalahamu. Ku'nguno yeni'yo Isaka wayaga ku' kaya ya Gelali ku'mwa Abimeleki mutemi wa V'afilisiti.

2 Gu'ku' Mulungu wamwifumi'i'laga Isaka na ku'muwi'la, "Ku'du' u'ye ku' Misili, sumbwa u'ye ku'kikala ku' nsi' i'yo ndaku'wi'le. 3 Wikale mu nsi' yeni'yi' ya wu'geni, nanne nku'v'a haki'mo nanho na nku'ku'dosya. Nanne nku'gelani'zya mulahi' u'go nalahi'lile ku'mwa so Abalahamu, na nku'ku'pa ev'e na wu'v'yalwa wako nsi' zyose zyeni'zi. 4 Ndav'ingi'hye v'av'yalwa v'ako v'av'e v'ingi ki'ti' nsonda zya mu ilunde, na ndav'ape nsi' zyeni'zi zyose. Ku'v'i'ti'la ku' v'av'yalwa v'ako v'antu' v'a makabi'la gose ga mu welelo v'aladosiwe. 5 Nku'ku'dosya ku'nguno Abalahamu wav'age anku'zizye na ku'doonoka milagi' zyanne, nhama zyanne, wu'yangu' wanne, na nzi'la zya nhana yanne."

6 Hohene Isaka wikalaga kwenu'ko ku' Gelali. 7 V'antu' v'a kwenu'ko aho v'amuwu'zi'li'zyaga ku' mmola ya muki' wakwe, nawe wasu'v'yaga ati', "Mwenu'yu' ali' ilu'mbu' lyanne." Wogoha ku'yomba ati' muki' wakwe ki'gele v'azengano v'a kaya yeni'yo ku'du' v'amuwu'lage wenge wamwa Lebeka, ku'nguno wav'age musoga wa kwiv'elela.

8 Yav'aga aho Isaka wikalaga kwenu'ko nsiku' nyingi, lu'siku' lu'mo Abimeleki mutemi wa V'afilisiti wasunu'ki'laga ha ibala, haho wawonaga, kasinaga Isaka ali'munega Lebeka muki' wakwe. 9 Abimeleki wamwitanaga Isaka, na wamuwu'zyaga ati', "Nhana mwenu'yu' ali' muki' wako! Ku' ki' wayombile ati' ilu'mbu'yo?" Isaka wasu'v'yaga ati', "Ndi' nayomba vyeni'vyo, ku'nguno ya kogoha ku'wu'lagwa wenge wakwe." 10 Haho Abimeleki wayombaga, "Waku'v'ezezyaga igambo ki' lyeni'li'? Vihe, muntu' yu'mo mugati' niswe wali' alale nawe ku' ku'leka ku'manya ku'v'a ali' muki' wako, ev'e u'kav'ile ku'wona wali' u'ku'ku'lengela wu'kenagu'zi?" 11 Haho Abimeleki wav'akaani'zyaga v'antu' v'ose ati', "U'yo alamukuumye muntu' mwenu'yu' ninga muki' wakwe, nhana alawu'lagwe!"

12 Mwaka gwenu'go, Isaka wali'maga mu nsi' yeni'yo, na kwi'mbu'la viliwa vingi muno, ku'nguno Gu'ku' Mulungu wamudosyaga. 13 Nawe Isaka wadamalu'kaga, nsawo yakwe yakwi'laga mpaka wav'aga musav'i muhanya. 14 Wav'aga na madale ga ng'ombe, nkolo na mbu'li na v'akumba v'ingi, mpaka V'afilisiti v'amuwonelaga iwu'v'a. 15 Hohene V'afilisiti v'agafuli'i'laga malwinzi' gose ago ndi' v'asi'mba v'akumba v'amwa Abalahamu ise, itungo i'lo wav'age akaali' ali'zuwu'ka. 16 Hangi' Abimeleki wamuwi'laga Isaka ati', "U'hafume ha wiswe ku'nguno ev'e u'ku'kindizye nguzu."

17 Haho Isaka wawu'kaga henanho, walondaga ku' iwonde lya Gelali, na kwenu'ko watu'u'laga nkambi' yakwe na wikalaga ku'ko. 18 Isaka wagafulu'laga malwinzi' ga lwandi' lwenu'lo ago ndi' gasi'mbwa ha itungo lyamwa Abalahamu ise, ku'nguno V'afilisiti ndi' v'agafuli'i'la aho Abalahamu wagulala. Aho wamali'laga ku'gafulu'la wagapaga mina gene gago ki'ti' i'vyo ise ndi' wagapa.

19 Lu'siku' lu'mo, v'akumba v'amwa Isaka v'asi'mbaga ha iwonde lyeni'lo, na v'apandi'kaga lwinzi' lwa minzi' ga kasela. 20 Ali'vi v'adi'mi v'a henanho ha Gelali, v'ikeniaga na v'adi'mi v'amwa Isaka nav'o v'ayombaga ati', "Minzi' genaga ga ku' wiswe." Haho Isaka walwitanaga lwinzi' lwenu'lo "Eseki*," ku'nguno v'ikeniaga nawe. 21 V'adi'mi v'amwa Isaka v'asi'mbaga hangi' lwinzi' lu'ngi', ali'vi nalo v'alwikenezyaga. Isaka walwitanaga lwinzi' lwenu'lo "Sitina*." 22 Haho Isaka wayaga lwandi' lu'ngi' na ku'si'mba lwinzi' lu'ngi', sumbwa lwene v'akalwikenezizye. Walwitanaga "Lehoboti*" na ku'yomba ati', "Gi'si' Gu'ku' Mulungu waku'paga hagali'nhu, niswe ku'ku'damalu'ka mu nsi' yeni'yi'."

23 Ku'fuma kwenu'ko wayaga lwandi' lwa ku' Beeli-sheba. 24 Wu'ziku' wene wu'wo Gu'ku' Mulungu wamwifumi'i'laga na ku'muwi'la, "Ene ni' Mulungu wamwa so Abalahamu. Ku'du' wogohe, ku'nguno ene ni' haki'mo nanho, nku'ku'dosya na ku'v'ingi'hya v'av'yalwa v'ako ku'nguno yamwa Abalahamu mukumba wanne." 25 Haho Isaka wazyengaga ihozezyo kwenu'ko, walisengaga lina lyamwa Gu'ku' Mulungu. Hene haho watu'u'laga nkambi' yakwe kwenu'ko, na v'akumba v'akwe v'asi'mbaga lwinzi' lu'ngi'.

26 Lu'siku' lu'mo, Abimeleki haki'mo na Ahuzati, muyangu' wakwe, na Fikoli, muhanya wa v'asilikale, v'aku'fumaga ku' Gelali na ku'ya ku'mwa Isaka. 27 Nawe Isaka wav'awu'zyaga ati', "Mwiza ku' wanne ku'v'ezya ki'? Si mwangayile na ku'nsaga ku' winywe?" 28 Nav'o v'asu'v'yaga ati', "Nhana kwawine ku'v'a Gu'ku' Mulungu ali' haki'mo nanho. Ku'nguno yeni'yo kwawonaga yi'li' visoga ku'v'ezye ilagano lya ku'hola, ev'e niswe kwilahi'li'zye 29 ati', u'kasye u'ku'v'ezezye mav'i ki'ti' i'vyo iswe ku'kaku'v'ezezizye mav'i. Kwaku'v'ezezizye masoga na ku'ku'leka u'ye na ku'hola. Nhana ev'e u'li' mudosiwa wamwa Gu'ku' Mulungu."

30 Hohene Isaka wav'av'ezezyaga mwanya, nav'o v'alyaga na ku'nywa. 31 Wangalu'ke ndiyu' v'ipunaga na kwilahi'li'zya mulahi'. Haho wav'afili'li'zyaga na kwidahya nav'o na ku'hola.

32 Lu'siku' lwene lu'lo v'akumba v'akwe v'amuletelaga mmola ya lwinzi' u'lo v'av'age v'ali'si'mba, na v'amuwi'laga ati', "Kwapandi'kaga minzi'!" 33 Lwinzi' lwenu'lo Isaka walwitanaga "Sheba*." Ku'nguno yeni'yo, kaya yeni'yo yi'li'witanwa Beeli-sheba ninga walelo.

34 Esau aho wafikyaga musimo gwa myaka maku'mi ane, watoolaga v'aki'ma v'av'i'li' V'ahiti: Yudisi, mwaniki' wamwa Beeli, na Basemati, mwaniki' wamwa Eloni. 35 V'aki'ma v'enav'a hu' yav'aga nnandyo ya misayo ku'mwa Isaka na Lebeka.