Gênesis 23

Ku’fwa kwamwa Sala

1 Wikalo wamwa Sala mu welelo, wikalaga myaka igana li’mo na maku’mi av’i’li' na mupungati'. 2 Sala wagulali’laga ku' kaya ya Kiliati-aliba, lina li’ngi' Hebuloni, ku' lwandi' lwa Kanaani. Nawe Abalahamu wamuli’laga na ku’mugongolezya muki' wakwe.

3 Haho Abalahamu wawu’kaga ku’fuma aho gu’li' muv’i’li' gwa muki' wakwe, wayaga ku’kasu’nsu’mu’la na V’ahiti, v’ikazi v’a nsi' yeni’yo, na ku’v’awi’la ati', 4 "Ene nikalile henanha mugati' na inywe ki’ti' mugeni mwizi’li’zi. Nu’lomba mungu’zi’zye lwandi' lwa nsi' yinywe, ki’gele mpandi’ke ha ku’muzyi’ki’la muyagi muki' wanne." 5 V’ahiti nav’o v’asu’v’yaga ati', 6 "Ev’e gu’ku' wiswe, u’ku’degeleke! Ev’e u’li' ki’ti' mutemi muhanya muno mugati' niswe. Sogola ki’v’i’mbi' ki’soga i’cho u’ku’togwa, u’zyi’ki’le muv’i’li' gwa muki' wako. Ku’du’hu' muntu' u’yo aku’ku’gizya ki’v’i’mbi' chakwe, u’leke ku’zyi’ka muv’i’li' gwa muki' wako."

7 Haho Abalahamu wawu’kaga na wasukambaga ha mbele ya V’ahiti v’enav’o. 8 Wav’awi’laga ati', "U’lu' mwanzumi’zyaga ku’zyi’ka muv’i’li' gwa muki' wanne, nu’mulomba, kandombeli ku’mwa Efuloni mwana wamwa Sohali, 9 ki’gele angu’zi’zye ipilinga i’lo li’li' ha Makipela, ku’nguno li’li' nsawo yakwe, nalyo li’li' ha lu’v’i’mbi' lwa ilale lyakwe. Muwi’lagi angu’zi’zye ku' wu’gu’zi wa lole ha mbele ya minso ginywe, ki’gele yi’v’e lwandi' lwanne lwa ku’zyi’ki’la."

10 Itungo lyeni’lo Efuloni, Muhiti, wav’age ikalile henanho ha wingi’li’lo wa kaya haki’mo na idale lya V’ahiti av’o ndi' v’ikumingaga henanho. Efuloni wasu’v’yaga ku’mwa Abalahamu ha mbele ya V’ahiti v’ichakwe ati', 11 "Gu’ku' wanne, yi’kav’ile vyeni’vyo, nu’ku’lomba u’ndegeleke. Nu’ku’pa ilale lyeni’lo haki’mo na ipilinga i’lo li’li' mugati' yalyo gele. Nu’ku’pa ha mbele ya v’ikazi v’ichane, ki’gele u’zyi’ki’le muv’i’li' gwa muki' wako."

12 Haho Abalahamu wasukambaga hangi' ha mbele ya v’ikazi v’a henanho. 13 Wamuwi’laga Efuloni katwipandu' ku’no v’antu' v’ose v’adegelekile ati', "Nu’ku’lomba u’ndegeleke. Nku’ku’li’pa ku' wu’gu’zi wa ku’gelani’la ilale lyeni’lo. Zumyaga ku’zipokela feza zyeni’zi ki’gele mmuzyi’ke muki' wanne." 14 Nawe Efuloni wamusu’v’i’zyaga Abalahamu, ati', 15 "Gu’ku' wanne, ndegeleke! Mupango gwa ilale lyeni’lo li’li' na lu’v’alo lwa vipande magana ane du' vya feza, ali’vi zyeni’zyo hu' ki’ntu' ki' ku' wu’sav’i wanne nanho? Ev’e yagaga u’kamuzyi’ke muki' wako."

16 Haho Abalahamu na Efuloni v’izumi’li’zyaga. Abalahamu wamupimi’laga Efuloni ki’pimo cha feza i’cho ndi' v’izumi’li’zyaga ha mbele ya V’ahiti v’ose. Wav’ezyaga ku’londana na ki’ti’le cha v’asu’lu’zya v’a itungo lyeni’lo.

17 Hu' vyene ilale lyose lyamwa Efuloni i’lo lyav’age ku' Makipela bi’hi' na Mamule, haki’mo na ipilinga i’lo lyav’age mu ilale, na miti' zyose zya mu ilale, zyose zyav’aga nsawo yamwa Abalahamu. 18 Igambo lyeni’lo lyav’ezyekaga ha mbele ya V’ahiti v’ose, av’o v’av’age v’ikumingaga henanho ha wingi’li’lo wa kaya yeni’yo. 19 Aho lyamalaga igambo lyeni’lo, Abalahamu wamuzyi’kaga muki' wakwe mu ipilinga lya mu ilale lyeni’lo lya Makipela bi’hi' na Mamule, lina li’ngi' Hebuloni, ku' lwandi' lwa Kanaani. 20 I’vi hu' vyene V’ahiti v’amuv’azi’zyaga Abalahamu ilale lyeni’lo haki’mo na ipilinga i’lo lyav’age mugati' yakwe, ku’v’a nsawo yakwe, ki’gele av’e na lwandi' lwa ku’zyi’ki’la v’antu' v’akwe.