1 Aho lyav'i'taga itungo, muhayo gwamwa Gu'ku' Mulungu gwamwizi'i'laga Abulamu ki'ti' ndoti ati', "Abulamu! Ku'du' wogohe, ene ni' lu'hi'gi' lwako. Na wu'syokeziwa wako wu'lav'e wu'hanya muno." 2 Ali'vi Abulamu wayombaga, "Gu'ku' Mulungu ev'e Katema, u'ku'mpa ki' u'lu' ene nikalile ni' wu'du'hu' mwana, sumbwa mwenu'yu' Eliezeli, Mudamasiko, hu' mwene wa ku'nsaala? 3 Lingaga! U'kandosizye ku'mpa mwana, sumbwa mukumba u'yo wav'yali'lilwe mu lu'go lwanne hu' mwene aku'v'a musaali'ki wanne!"

4 Haho muhayo gwamwa Gu'ku' Mulungu gwamwizi'i'laga ati', "Muntu' mwenu'yu' akasye aku'saale sumbwa mwana wa kwiv'yali'la ev'e mweni'ki'li' hu' mwene alaku'saale" 5 Haho Gu'ku' Mulungu wamufumyaga Abulamu ha ibala na wamuwi'laga, "Langami'la ku' ilunde na u'zisolozye nsonda u'lu' u'ku'kowola ku'zisolozya." Wamuwi'laga, "I'vi Hu' vyene wu'lav'e wingi wa wu'v'yalwa wako."

6 Hohene Abulamu wamusani'zyaga Gu'ku' Mulungu, nawe Mulungu wamuv'azi'zyaga Abulamu ku'v'a ali' wa lole.

7 Haho wamuwi'laga, "Ene ni' Gu'ku' Mulungu u'yo naku'fumizye ku' kaya ya Ulu ya V'akalidayo, ki'gele nku'pe nsi' yeni'yi' yi'v'e isaalo lyako."

8 Ali'vi Abulamu wawu'zyaga, "Gu'ku' Mulungu ev'e Katema, nku'manya vihe ati' nku'yi'saala nsi' yeni'yi'?" 9 Haho Gu'ku' Mulungu wamuwi'laga, "Ndetele ndogosa ya ng'ombe, ng'ondi na mbu'li nki'ma, ki'la ki'mo ki'v'e cha myaka idatu', haki'mo na ipu'u'la na ikune lya nkunda." 10 Abulamu wamuletelaga vyose, wayi'tandu'laga ki'la ndimu mav'ale av'i'li', wagatu'u'laga ki'la li'mo li'lole ku' liye, sumbwa tu'noni twene akatu'tandu'lile. 11 Yav'aga manoni malyanyama aho gademaga ha igu'lya na malimbo ki'gele galye, Abulamu wagapeezyaga.

12 Ha itungo lya ku'loka lyu'v'a, tu'lo tu'timbu twamuv'i'ti'laga Abulamu, kasinaga giti nhanya ya kogohya yamukumbaga. 13 Haho Gu'ku' Mulungu wamuwi'laga ati', "Yi'li'ku'dima u'manye ku'v'a wu'v'yalwa wako v'alikale ku' nsi' ya wu'geni ki'ti' v'ageni v'izi'li'zi, nav'o v'alav'e v'asese na v'alatukiwe kwenu'ko ku' itungo lya myaka magana ane. 14 Ali'vi nsi' yeni'yo i'yo v'alayi'tu'mami'le ki'ti' v'asese, ndayi'pe lu'duko, nav'o v'alafume na nsawo nyingi. 15 Sumbwa ev'e u'ku'v'a na wikalo wu'lihu, u'lafwe na ku'hola, na u'lazyi'kwe visoga. 16 Mu v'av'yalwa v'ako, wu'v'yalwa wa wu'ne* hu' wene wu'lasu'v'e henanha, ku'nguno wu'kenagu'zi wa V'aamoli, v'ikazi v'a henanha, wu'kaali' ku'gelani'la."

17 Aho lyu'v'a lyalokaga na giti kwingi'la, kasinaga lyafumi'i'laga ki'ti' lyavya lya lyonsi na ilambi' lya moto na ku'v'i'ta hagati' na viv'alango vya nyama zyeni'zyo. 18 Lu'siku' lwenu'lo, Gu'ku' Mulungu waki'ndi'kaga ilagano na Abulamu ku' ku'muwi'la, "Wu'v'yalwa wako nav'apaga nsi' yeni'yi', ku'fumi'i'la ha mongo gwa Misili mpaka ku' mongo muhanya gwa Efulate. 19 Nav'apaga nsi' ya V'akeni, V'akenizi, V'akadimoni, 20 V'ahiti, V'apelizi, V'alefai, 21 V'aamoli, V'akanaani, V'agiligashi na V'ayebusi."