1 Aho lyav'i'taga itungo Mulungu wamugemaga Abalahamu. Wamwitanaga ati', "Abalahamu!" Abalahamu witawu'kaga, "Kalame! Ene aha." 2 Haho Mulungu wamuwi'laga ati', "U'musole Isaka, mwana wako somwe mutoneke, u'ye nawe ku' lwandi' lwa Molia. U'kamufumye ki'taambo cha ku'zigya ku' lu'gu'lu' u'lo ndaku'lagi'le."

3 Mu wangalu'ke ikingilima, Abalahamu watunu'laga, wati'v'aga nkwi zya ku'pemba ha ki'taambo, hangi' wayi'gelani'zyaga mpunda yakwe. Haho wawu'kaga haki'mo na v'akumba v'akwe v'av'i'li' na mwana wakwe Isaka, ku'ya ku' lwandi' u'lo wakawi'lagwa na Mulungu. 4 Yav'aga mu lu'siku' lwa wu'datu' lwa musi'nzo gwav'o, Abalahamu walingaga, wahawonelaga ka ku'le ha lwandi' lwenu'lo. 5 Haho wav'awi'laga v'akumba v'akwe ati', "Inywe musigale henanha na mpunda. Ene na mwana wanne leka ku'ye kwenu'ko, ki'gele ku'kamwisenge Mulungu. U'lu' kwamali'la ku'ku'musu'v'i'la."

6 Hohene Abalahamu wasolaga zyeni'zyo nkwi wamutwi'kaga mwana wakwe Isaka, mweni'ki'li' wasolaga moto na ki'syu', nav'o v'awu'kaga haki'mo v'ose v'av'i'li'. 7 Aho v'av'age v'akaali' v'ali' mu nzi'la Isaka wamwitanaga ise, "V'av'a wanne!" Nawe witawu'kaga ati', "Kalame! Ene aha, mwana wanne." Isaka wamuwu'zyaga ise, "Lingaga, moto na nkwi ku'li'nazyo, ali'vi kadi'lana ka ki'taambo kali' ku'he?" 8 Abalahamu wasu'v'yaga ati', "Mwana wanne, Mulungu mweni'ki'li' akwifumi'zya kadi'lana ka ki'taambo." Nav'o v'endeleyaga na musi'nzo gwav'o.

9 Aho v'afikaga ha lwandi' u'lo walagi'lagwa na Mulungu, Abalahamu wazyengaga ihozezyo na ku'hela nkwi ha igu'lya. Haho wamutungaga Isaka mwana wakwe, na ku'mulali'ki'zya ha igu'lya na nkwi zyeni'zyo. 10 Abalahamu wasolaga ki'syu', na wagololaga mukono gwakwe, ki'gele amusi'nze mwane.

11 Ali'vi malaika wamwa Gu'ku' Mulungu wamwitanaga ku'fuma ku' ilunde, "Abalahamu, Abalahamu!" Nawe witawu'kaga, "Kalame! Ene aha." 12 Malaika wamuwi'laga, "U'leke ku'muvulazya mwana ninga ku'mukuumya! Gi'si' namanya ku'v'a u'mogohile Mulungu, ku'nguno u'kamwigugi'zizye mwana wako somwe."

13 Haho Abalahamu wawu'syaga minso gakwe wikev'elaga, kasinaga mu isaka ku'li' na ng'ondi yagov'yagwa mapembe gayo. Haho wayi'yi'laga na ku'yi'sola ng'ondi yeni'yo, na ku'yi'fumya ki'taambo ha lwandi' lwa mwane. 14 Hohene Abalahamu wahitanaga henanho ati', "Gu'ku' Mulungu ali'wifumi'zya*." Ki'ti' i'vi v'antu' v'ali'yomba mpaka walelo, "Ku' lu'gu'lu' lwamwa Gu'ku' Mulungu akwifumi'zya."

15 Malaika wamwa Gu'ku' Mulungu ku'fuma ku' ilunde wamwitanaga hangi' Abalahamu, 16 wamuwi'laga ati', "Gu'ku' Mulungu ali'yomba i'vi: Nu'lahi'la ku' lina lyanne ati', ku'nguno wav'ezyaga vyeni'vi, u'kamwigugi'zizye mwana wako somwe, 17 nhana ndaku'dosye, na wu'v'yalwa wako ndawingi'hye ki'ti' nsonda zya mu ilunde, na musengasenga gwa ha mpelo na nyanza. Wu'v'yalwa wako ati' wu'lakinde v'anisi na ku'tema kaya zyav'o. 18 Ku'v'i'ti'la ku' v'av'yalwa wako v'antu' v'a makabi'la gose ga mu welelo v'aladosiwe, ku'nguno ev'e wanku'zyaga ene."

19 Hohene Abalahamu wav'asu'v'i'laga v'akumba v'akwe, v'ose ku' haki'mo v'asu'v'aga mpaka ku' Beeli-sheba. Nawe Abalahamu wendeleyaga kwikalaga kwenu'ko.

20 Aho gav'i'taga magambo genago, Abalahamu wawi'lagwa ati', "Lingaga, Milika nawe wakamuv'yali'la mudu'gu'yo Naholi v'ana." 21 Muv'yalwa wa mbele ali'witanwa Usi, na v'aku'mulonda v'ali'witanwa Busi na Kemueli, u'yo hu' ise wamwa Alamu. 22 Hu' v'alonda: Kesedi, Hazo, Pilidashi, Yidilafu na Betueli. 23 Betueli hu' ise wamwa Lebeka. Naholi mudu'gu'ye na Abalahamu wapandi'kaga v'ana munane av'o wamuv'yali'laga muki' wakwe Milika. 24 Isuli'la wamwa Naholi u'yo witanagwe Leuma, nawe wamuv'yali'laga v'ana v'angi'. Mina gav'o v'itanagwe Teba, Gahamu, Tahashi na Maaka.