1 Haho Yosefu wagu'gwi'laga muv'i'li' gwamwa ise, wamuli'laga na ku'musu'na ha wu'syu'. 2 Hangi' Yosefu wav'alagi'li'zyaga v'ambeza v'akwe, v'agu'v'ile muv'i'li' gwamwa ise wu'ganga ki'gele gu'leke ku'wola. Nav'o v'av'ezyaga vyeni'vyo. 3 Muli'mo gwenu'go gwasolaga nsiku' maku'mi ane, ku'nguno hu' itungo i'lo ndi' li'li'koov'iwa lya ku'v'ila wu'ganga. V'amisili nav'o v'amuli'laga Yakobo ku' nsiku' maku'mi mupungati'.

4 Nsiku' zya ku'muli'la aho zyamala, Yosefu wav'awi'laga v'ayangu' v'amwa Falao ati', "U'lu' napandi'kaga wu'soga ha mbele yinywe, nu'mulomba musu'nsu'mu'le na Falao, mumuwi'le ati', v'av'a wanne ndi' wandahi'li'zya na ku'yomba ati', 5 ‘Ene negelaga ku'fwa. U'lu' nafwa, u'kanzyi'ki'le ku' ki'v'i'mbi' i'cho nasi'mbile ku' nsi' ya Kanaani.’ Gi'si' nu'mulomba Falao anzumi'zye nje nkamuzyi'ke v'av'a wanne hangi' ndasu'v'e." 6 Falao wasu'v'yaga ati', "Yaga u'kamuzyi'ke so ki'ti' i'vyo waku'lahi'li'zya."

7 Hohene, Yosefu wayaga ku'kamuzyi'ka ise. V'awu'kaga haki'mo na v'atu'mami v'ose v'amwa Falao, v'anamala v'a mu lu'go lwamwa Falao, na v'anamala v'ose v'a mu nsi' ya Misili. 8 Hangi' wawu'kaga na v'antu' v'ose v'a ha lu'go lwakwe, v'adu'gu'ye, haki'mo na v'antu' v'a lu'go lwamwa ise. V'ana v'ado v'ado na mitugo du' hu' i'zyo zyasigalaga ku' lwandi' lwa Gosheni. 9 Hangi' v'awu'kaga na v'aliina falasi na mikokoteni zya ku'kweswa na falasi. Nalyo lyav'aga idale ihanya muno lya v'antu'.

10 Aho v'afikaga ha lwandi' lwa Atadi ha lu'mbu'ga, bi'hi' na ngu'ka ya mongo gwa Yolodani, v'ali'laga ku' misayo mihanya. Yosefu wikalaga kwenu'ko ku' nsiku' mupungati' ku'muli'la ise. 11 V'akanaani av'o v'av'age v'ikazi v'a henanho, aho v'awonaga v'antu' v'ali'li'la ha lwandi' lwa lu'mbu'ga lwa ha Atadi, v'ayombaga ati', "Ki'li'lo cha V'amisili ki'li' ki'hanya muno!" Ku'nguno yeni'yo, henanho hitanagwa Abeli-misili*, na henanho hu' yi'li' ngu'ka ya mongo gwa Yolodani.

12 V'ana v'akwe v'amuv'ezezyaga sav'o Yakobo ki'ti' i'vyo ndi' walagi'li'zya. 13 V'agu'filaga muv'i'li' ku' nsi' ya Kanaani, na ku'muzyi'ki'la mu ipilinga ha ilale i'lo lyav'age ku' Makipela, bi'hi' na Mamule. Ilale lyeni'lo hu' i'lo ndi' wagu'la Abalahamu ku'mwa Efuloni, Muhiti, ki'gele hav'e ha ku'zyi'ki'la v'antu' v'akwe.

14 Aho Yosefu wamali'laga ku'muzyi'ka ise, wasu'v'aga ku' Misili haki'mo na v'adu'gu'ye, na v'antu' v'ose av'o ndi' v'amufili'li'zya ku'kamuzyi'ka ise.

15 Yav'aga aho ki'li'lo chamwa sav'o chamalaga, v'adu'gu' v'amwa Yosefu v'ayombaga ati', "Yi'ku'v'a vihe Yosefu u'lu' atu'u'le nsika na ku'ku'li'pi'ki'zya mav'i gose ago ndi' kwamuv'ezezya?" 16 Haho v'amutu'mi'laga nkombe Yosefu ku'yomba ati', "Aho so akaali' ku'gulala ndi' walagi'li'zya i'vi: 17 ‘Muwi'li Yosefu ati', "Nu'ku'lomba u'v'atondole v'adu'gu'yo ku' wu'kenagu'zi wav'o na magambo mav'i gose ago v'aku'v'ezezya."’ Gi'si' ku'li'ku'lomba u'ku'tondole, iswe v'akumba v'amwa Mulungu wamwa so." Yosefu wali'laga aho wigwa mihayo zyeni'zi.

18 Haho v'adu'gu'ye v'izaga na ku'muku'v'i'i'la ku' wov'a na ku'yomba, "Lingaga, iswe ku'li' v'asese v'ako." 19 Ali'vi Yosefu wav'awi'laga ati', "Ku'du' mogohe. Ene nkav'ile Mulungu. 20 Inywe ndi' muli' na ndaka ya ku'nvulazya, ali'vi Mulungu ndi' ali' na ndaka nsoga, ki'gele li'gelani'le i'li' li'li'v'ezyeka gi'si', ku'v'akomola v'antu' v'ingi ki'gele v'av'e na wu'panga. 21 Ku'nguno yeni'yo ku'du' mogohe. Ene nku'musu'nga inywe haki'mo na v'ana v'inywe." Haho wasu'nsu'mu'laga nav'o visoga na ku'zitunia myoyo zyav'o.

22 I'vi hu' vyene Yosefu wikalaga ku' nsi' ya Misili, mweni'ki'li' haki'mo na igongo lyose lyamwa ise. Wikalaga mu welelo ku' itungo lya myaka igana li'mo na iku'mi. 23 Yosefu wapandi'kaga lu'v'ango lwa ku'v'awona v'ana v'amwa Ifulaimu, ninga wu'v'yalwa wakwe wa wu'datu'. Hangi' wav'awonaga v'ana v'amwa Makili, mwana wamwa Manase, nawe wav'azumyaga v'av'e ki'ti' v'ana v'akwe.

24 Haho Yosefu wav'awi'laga v'adu'gu'ye ati', "Ene gi'si' ni' bi'hi' ku'fwa. Ali'vi nhana Mulungu alize ku'mugwasya ku' ku'mufumya mu nsi' yeni'yi', na alamufile ku' nsi' i'yo ndi' wav'alagana Abalahamu, Isaka na Yakobo ku' mulahi'." 25 Hangi' Yosefu wav'alahi'li'zyaga v'ana v'amwa Izilaeli na ku'yomba ati', "Mulungu aho alamwizi'i'le ku'mugwasya, ku'du' mwize muleke maguha ganne henanha."

26 Hohene Yosefu wagulalaga, ali' na muv'i'li' gwa myaka igana li'mo na iku'mi, nav'o v'agu'v'ilaga wu'ganga mulambo na ku'gu'tu'u'la mu ijeneza kwenu'ko ku' Misili.