1 Ali'vi nzoka yav'age mbeleganu ku'ki'la vitundwa vyose vya mu ipolu i'vyo Gu'ku' Mulungu wavitundaga. Nzoka yeni'yo yamuwi'laga muki'ma, "Angu', yi'li' nhana Mulungu wayombile ati', ku'du' mwize mulye visumo vya ki'la muti' gwa mu mugu'nda?" 2 Nawe muki'ma wasu'v'yaga ati', "Ayi', ku'kowolile ku'lya visumo mu miti' zya mu mugu'nda gwenu'gu', 3 sumbwa visumo vya muti' gwa hagati' na mugu'nda Mulungu wayombile, ‘Ku'du' mwize mulye ninga ku'gu'kuumya. U'lu' mwize mulye, ninga ku'gu'kuumya, mulafwe.’ " 4 Haho nzoka yamuwi'laga muki'ma mwenu'yo, "Mukakowola ku'fwa! 5 Ku'nguno Mulungu amanyile ku'v'a lu'siku' mulalye visumo vya muti' gwenu'go, minso ginywe galakundu'ku'lwe, na inywe mulav'e ki'ti' Mulungu, mulamanye tu'soga na tu'v'i."

6 Nawe muki'ma mwenu'yu' aho wawonaga ku'v'a visumo vya muti' gwenu'go vili' visoga ku'liwa, na vya kwiv'elela mu minso, hangi' vili' vya ku'tamani'lwa na ku'mupa muntu' wu'manyi, haho wayav'aga visumo vyago, walyaga, na wamupaga mugosi wakwe, nawe walyaga. 7 Hene haho minso gav'o v'ose v'av'i'li' gakundu'ku'lagwa, nav'o v'imanyaga ku'v'a v'ali' du'u'hu'. Haho v'asolaga madu'tu' ga muti' gwa mutini, v'isumi'laga vizwalo na v'ikumbi'laga mu miki'mbi'li' zyav'o.

8 Yav'aga mu mafuulo ga mpi'ndi', mugosya mwenu'yo haki'mo na muki' wakwe aho v'igagwa Gu'ku' Mulungu ali'yu'mbayu'mba mu mugu'nda, haho v'ayaga ku'kiv'isa mu miti' zya mu mugu'nda, ki'gele Gu'ku' Mulungu aleke ku'v'awona. 9 Ali'vi Gu'ku' Mulungu wamwitanaga mugosya na ku'muwu'zya, "Adamu, u'li' ku'he?" 10 Nawe Adamu wasu'v'yaga ati', "Nakwigagwa u'li'yu'mbayu'mba mu mugu'nda, nali' nogoha, na niv'isaga ku'nguno ene ni' du'u'hu'." 11 Haho Gu'ku' Mulungu wamuwu'zyaga, "Nde u'yo waku'wi'laga ku'v'a u'li' du'u'hu'? Mbela, walyaga visumo vya muti' u'go naku'kaani'zya?" 12 Nawe Adamu wasu'v'yaga, "Muki'ma mwenu'yu' wampile av'e haki'mo nanne mwene wampaga visumo vya muti' gwenu'go nanne navilyaga."

13 Haho Gu'ku' Mulungu wamuwu'zyaga muki'ma mwenu'yo, "Wav'ezyaga vihe ev'e?" Muki'ma wasu'v'yaga, "Nzoka yene yanhu'mbyaga nanne nalyaga."

14 Hangi' Gu'ku' Mulungu wayi'wi'laga nzoka,

"Ku' ki' wav'ezyaga genaga, wafwizi'i'lagwa ev'e

mugati' na vitundwa vyose vya ku'sav'a na zya mu ipolu.

Ku'yu'mba kwako u'ku'v'a u'li'yu'mbi'la nda,

lu'wuwu lwa nsi' lu'ku'v'a ki'liwa chako,

mugati' na nsiku' zya wikalo wako wose.

15 Nanne nu'tu'u'la wanisi ku' wako na ku' muki'ma mwenu'yu',

ku' wu'v'yalwa wako na wu'v'yalwa wakwe,

ev'e alaku'tune mutwe gwako,

nanho u'lamulume kasinsila kakwe."

16 Haho wamugalu'ki'laga muki'ma na ku'muwi'la,

"Nku'kwingi'hi'zya wu'su'ngu' wingi mu itungo lya ku'v'yala kwako,

u'lav'yale v'ana ku' wu'su'ngu'.

Ninga vyeni'vyo u'ku'mutamani'lwa mugosi wako

nawe alaku'teme."

17 Hangi' wamuwi'laga mugosya,

"Ku'nguno ev'e wamuzumani'zyaga muki' wako,

na ku'lya visumo vya muti' u'go naku'kaani'zya ku'du' u'lye,

nsi' yafwizi'i'lagwa ku'nguno yako,

na ku'lya kwako ku'ku'v'a ku' mili'mo mitimbu

mu wikalo wako mu nsiku' zyako zyose.

18 Nsi' yeni'yi' yi'ku'ku'v'yali'la minvwa na mbi'gi'li',

na yi'ku'ku'dima ku'lya mimelo zya mu migu'nda zya nsi' yeni'yo.

19 Ku' lu'yi'lo lwa wu'syu' wako yi'ku'v'a hu' ku'lya kwako,

mpaka aho u'lasu'v'e ha nsi' aho wafumi'i'la,

na ku'nguno u'li' lu'wuwu ev'e, ku' lu'wuwu u'lasu'v'eko."

20 Haho Adamu wamupaga lina muki' wakwe, "Eva"* ku'nguno aku'v'a mayu' wa v'antu' v'ose v'a wu'panga. 21 Hangi' Gu'ku' Mulungu wav'av'ezezyaga Adamu na muki' wakwe vizwalo vya ndi'li', na wav'azwi'kaga.

22 Ali'vi Gu'ku' Mulungu wayombaga, "Lingaga, mwenu'yu' muntu' wav'aga ki'ti' iswe, mu ku'manya tu'soga na tu'v'i. Yi'li'ku'dima ku'mugizya ku'du' ize ayav'e visumo vya muti' gwa wu'panga, ku'nguno u'lu' ize alye alav'e na wikalo wa nhananhana." 23 Haho Gu'ku' Mulungu wav'asagaga ku'fuma mu mugu'nda gwa Edeni, ki'gele Adamu aye akayi'li'me nsi' i'yo watundi'lwa. 24 Aho wav'asagaga v'antu' v'enav'a, wav'atu'u'laga v'amalaika v'akelubi mu lwandi' lwa mu ki'ya ya mugu'nda gwa Edeni, na lu'panga lwa moto u'lo lu'li'galu'ka kosekose ku'yi'lindi'li'zya nzi'la ya ku'ya ku' muti' gwa wu'panga.