Gênesis 48

Yakobo ali’v’adosya v’ana v’amwa Yosefu

1 Aho lyav’i’taga igambo lyeni’lo, Yosefu wawi’lagwa ati', "Lingaga so alwalile." Hohene wav’asolaga v’ana v’akwe v’av’i’li', Manase na Ifulaimu, wayaga nav’o ku’mwa ise. 2 Haho Yakobo wawi’lagwa ati', "Lolaga mwano Yosefu wiza ku’ku’wona." Yakobo, ku' lina li’ngi' Izilaeli, widugumaga kwiwu’ki’li’zya na kwikala ha wu’li’li'. 3 Haho Yakobo wamuwi’laga Yosefu ati', "Gu’ku' Mulungu wa Nguzu ndi' wanifumi’i’la aho nav’age ku' Luzu, ku' nsi' ya Kanaani, na kwenu’ko wandosya. 4 Wambwi’la i’vi: ‘Lingaga, nku’ku’v’ezya u’v’e na wu’v’yalwa wingi, na ku’kwingi’hya muno, hangi' nku’ku’v’ezya u’v’e mbuto ya makabi’la. Nsi' yeni’yi' ndawu’pe wu’v’yalwa wako wu’yi’teme ku’fuma ku' wako nhananhana.’ "

5 Yakobo walambaga ku’yomba, "Hohene gi’si', v’ana v’ako av’a Ifulaimu na Manase, av’o wapandi’kile ku’no ku' Misili ha itungo i’lo ndi' nkaali' kwiza ku’no, v’aku’v’aziwa ku’v’a v’ana v’anne, ki’ti' i’vi v’ali' Lubeni na Simiyoni. 6 Ali’vi v’ana av’o u’lapandi’ke ha itungo lya mbele v’alav’aziwe ku’v’a v’ana v’ako. Ku' nsi' i’yo v’alasaale, v’alitanwe ku' lina lya v’adu’gu' v’av’o. 7 Nu’v’ezya vyeni’vyo ku’nguno ya ku’mongezezya wu’v’yazi nnoko Lahele. Aho nav’age nsu’v’ile ku’fuma ku' lwandi' lwa Padani-alamu, mu nzi’la ya ku' nsi' ya Kanaani bi’hi' na lwandi' lwa Efulati, hu' aho wagulali’laga. Hohene nadimagwa na misayo, na ku’muzyi’ki’la hene haho ha mpelo na nzi’la ya ku’ya ku' Efulati." Gi’si' yi’li’witanwa Betelehemu.

8 Yav’aga Izilaeli aho wav’awonaga v’ana v’amwa Yosefu, wamuwu’zyaga ati', "Ali' v’enav’a v’a nde?" 9 Yosefu wasu’v’yaga ku’mwa ise ati', "V’enav’a v’ana v’anne av’o Mulungu wampile aho nav’aga kwenu’ku'." Haho Izilaeli wamuwi’laga, "V’egezye hano ki’gele mbadosye." 10 Itungo lyeni’lo Izilaeli wasangwa wakiku’la, na ku’nguno yeni’yo minso gakwe gasangwa gakali' ku’wona visoga. Haho Yosefu wav’egezyaga v’aane ku’mwa ise. Hohene Izilaeli wav’asu’naga na ku’v’awungati’la.

11 Hangi' Izilaeli wamuwi’laga Yosefu ati', "Mwana wanne, nav’age nkav’ile kwiganika ku’v’a ndaku’wone wu’syu' wako hangi'. Ali’vi gi’si', kasinaga nayali’lagwa na Mulungu ninga ku’v’awona v’ano!" 12 Haho Yosefu wav’asiniaga v’aane ha magu’lu' gamwa ise, nawe wamuku’v’i’i’laga. 13 Hangi' wav’ahelaga v’enav’o v’aane v’av’i’li', Ifulaimu ku' mukono gwa mulyi’la, wamulondolaga ku' mukono gwa mumoso gwamwa Izilaeli, na Manase ku' mukono gwa mumoso, wamulondolaga ku' mukono gwa mulyi’la gwamwa Izilaeli. Haho wav’egezyaga ku’mwa gu’ku' wav’o. 14 Ali’vi Izilaeli wapu’ganiaga makono gakwe. Mukono gwakwe gwa mulyi’la, wagu’tu’u’laga ku' mutwe gwamwa Ifulaimu u’yo wav’age mudo, na mukono gwakwe gwa mumoso, wagu’tu’u’laga ku' mutwe gwamwa Manase, ninga i’vi hu' mwene wav’age muv’yalwa wa mbele. 15 Haho wamudosyaga Yosefu ku' ku’yomba,

"Mulungu u’yo v’agu’ku' v’anne Abalahamu na Isaka v’av’age v’alondile nzi’la yakwe,

Mulungu u’yo hu' mudi’mi wa wikalo wanne ku’fiki’la walelo,

16 Malaika u’yo wampi’zyaga na mav’i gose,

mwenu’yu' av’adosye v’asu’mbana av’a.

Lina lyanne haki’mo na mina ga v’agu’ku' Abalahamu na Isaka gatemulwe ku' v’enav’a,

na v’ingi’he muno mu welelo."

17 Ali’vi Yosefu aho wawonaga ku’v’a ise watu’u’laga mukono gwakwe gwa mulyi’la ha igu’lya na mutwe gwamwa Ifulaimu, akatogeziv’ilwe. Hohene wagu’dimaga mukono gwamwa ise, ki’gele agu’tu’u’le ha igu’lya na mutwe gwamwa Manase. 18 Hangi' wamuwi’laga ise ati', "V’av’a wanne, yi’kav’ile vyeni’vyo! Ku’nguno u’yu' hu' mwene muv’yalwa wanne wa mbele. Nu’ku’lomba chaki’sa, u’tu’u’le mukono gwako gwa mulyi’la ku' mutwe gwakwe." 19 Ali’vi ise wakaanaga na ku’yomba, "Manyile, mwana wanne, manyile. Mwenu’yu' nawe aku’v’a kabi’la nhanya, na ku’v’a muntu' muhanya. Sumbwa muzunaye mwene alav’e muhanya ku’muki’la mwiye, na wu’v’yalwa wakwe wu’lav’e makabi’la mingi."

20 I’vi hu' vyene lu’siku' lwenu’lo Izilaeli wav’adosyaga ku' ku’yomba,

"V’aizilaeli v’alatu’mi’lage mina ginywe mu ku’dosya v’antu'.

V’alayombage ati', ‘Mulungu aku’v’ezye u’v’e ki’ti' Ifulaimu na Manase!’ "

I’vi hu' vyene Izilaeli wamutongezyaga Ifulaimu ku' mbele yamwa Manase.

21 Hangi' Izilaeli wamuwi’laga Yosefu ati', "Lolaga, ene negelaga ku’fwa. Ali’vi Mulungu alav’e haki’mo na inywe, na ku’musu’v’ya ku' nsi' ya v’agu’ku' v’inywe. 22 Ku’nguno yeni’yo, nu’ku’gawu’li’la ev’e lwandi' lu’mo lwa ku' ngu’lu', u’lo nkav’apile v’adu’gu’yo. Nu’ku’gawu’li’la lwandi' u’lo nasampaga lwa lu’panga na wu’ta wanne, ku’fuma mu makono ga V’aamoli."