Gênesis 32

Yakobo ali’wiv’anga ku’poma na Esau

1 Yakobo nawe wendeleyaga na musi’nzo gwakwe. Yav’aga aho wav’age ali' mu nzi’la, haho wav’ipami’ki’zyaga v’amalaika v’amwa Mulungu. 2 Yakobo aho wav’awonaga wayombaga ati', "Yeni’yi' yi’li' nkambi' ya v’asilikale yamwa Mulungu!" Hu' nguno wahitanaga henanho "Mahanaimu*32:2 Muhayo "Mahanaimu" ku' Ki’ebulania nguno yayo "nkambi' iv’i’li' zya v’asilikale."."

3 Hohene wav’atu’maga v’akombe v’amutongelele ku' muku’lu’ye Esau, u’yo wav’age ikalile ku' lwandi' lwa ngu’lu' zya Seili ku' nsi' ya Edomu. 4 Wav’awi’laga ati', "Yagi mukamuwi’le gu’ku' wanne Esau i’vi: Mukumba wako Yakobo ali’yomba ati', ‘Ku' itungo lyose nikalaga wu’geni ku’mwa Labani mpaka lelo. 5 Ni’nazyo ng’ombe, mpunda, nkolo, mbu’li na v’akumba v’a ki’ki’ma na v’a ki’gosya. Gi’si' nu’ku’tu’mi’la nkombe, ev’e gu’ku' wanne, ki’gele u’nanuku’le mpandi’ke wu’soga ha mbele ya minso gako.’ "

6 V’akombe v’enav’o v’ayaga ku’mwa Esau. Aho v’amali’laga ku’mupa mmola, v’asu’v’aga ku’mwa Yakobo na ku’yomba, "Kwafikaga ku' muku’lu’yo Esau na ku’mufiki’zya mmola i’yo wali' waku’tu’maga, nawe Esau ali' mu nzi’la. Izile ku’ku’su’mbi’la na mbuto ya v’agosya magana ane." 7 Haho Yakobo wogohaga na ku’nywagala muno. Hohene wav’agawu’laga v’antu' v’akwe av’o v’av’age haki’mo nawe, na madale ga nkolo, mbu’li, ng’ombe na ntwangawu’lende, gose gafumaga madale av’i’li' av’i’li'. 8 Wiganikaga ati', "U’lu' ize Esau, ali’gwi’li’le idale li’mo, hohene idale li’ngi' li’ku’pu’lu’gu’ka."

9 Hangi' Yakobo wamulombaga Mulungu ati', "Ev’e Mulungu wamwa gu’ku' wanne Abalahamu na Mulungu wamwa v’av’a wanne Isaka, ev’e Gu’ku' Mulungu u’yo ndi' wambwi’la nsu’v’e ku' nsi' yanne, na ku' igongo lyanne, ndi' wayomba u’lambezezye wu’soga, 10 ene nkafiki’i’lile chelu' na nhana yose i’yo wambezezizye ene mukumba wako. Aho nav’age nu’ki’lania mongo gwenu’gu' gwa Yolodani nav’age ni’na mulanga du' mu makono ganne, ali’vi gi’si' ni’nago madale av’i’li'. 11 Nu’ku’lomba u’mpi’zye ku’fuma mu makono ga muku’lu' wanne Esau, ku’nguno nu’wogoha, akowolile kwiza ku’ku’gwi’li’la ene, v’aki' v’anne, haki’mo na v’ana v’anne. 12 Ali’vi ev’e wayombile ati', ‘Nhana ndaku’v’ezezye wu’soga, na wu’v’yalwa wako ndawingi’hye ki’ti' musengasenga gwa mu nyanza, u’go gu’kakowoleka ku’v’azyi’ka.’ "

13 Hohene Yakobo walalaga henanho wu’ziku' wenu’wo. Hangi' wakomaga lwandi' lwa nsawo yakwe, ki’gele yi’v’e lu’holo ku' muku’lu’ye Esau. 14 Wasogolaga mbu’li nki’ma magana av’i’li' na ngulati' maku’mi av’i’li', nkolo nki’ma magana av’i’li' na ng’ondi maku’mi av’i’li', 15 ntwangawu’lende maku’mi adatu' i’zyo zili’wonsya haki’mo na ndama zyazyo, ng’ombe nki’ma maku’mi ane na nzagamba iku’mi, mpunda nki’ma maku’mi av’i’li' na ngosya iku’mi. 16 Haho wav’apaga v’akumba v’akwe, ki’la yu’mo na idale lyakwe, na wav’awi’laga ati', "Muntongelele na muv’e muli’leka lyelemo hagati' ya idale na idale." 17 Wamuwi’laga u’yo atongelile, "U’lu' wapoma na muku’lu' wanne Esau nawe mbe waku’wu’zya, ‘Ev’e u’li' mukumba wamwa nde? U’yile ku’he? Mitugo zyeni’zi zyamwa nde?’ 18 Hohene u’ku’su’v’ya, ‘Yeni’yi' nsawo ya mukumba wako Yakobo, na lwenu’lu' hu' lu’li' lu’holo ku' wako, ev’e gu’ku' wanne Esau. Nawe Yakobo mweni’ki’li' ali' ku' nnuma izile.’ "

19 Hangi' wamuwi’laga mukumba wa idale lya wu’v’i’li', na lya wu’datu', na v’ose av’o v’av’age v’alondile madale na ku’yomba, "I’vi hu' i’vyo muku’muwi’la Esau u’lu' mwapoma nawe. 20 Ku’du' mulav’i’le ku’muwi’la ati', ‘Mukumba wako Yakobo ali' ku' nnuma, aku’londile.’ " Yakobo wayombaga vyeni’vyo, ku’nguno wiganikaga ati', "U’lu' natongezyaga lu’holo, itungo i’lo ku’ku’v’a kwiwona nawe minso ku' minso hamo aku’v’a watekanaga na aku’nanuku’la." 21 Hohene watongezyaga lu’holo lwakwe, ali’vi mweni’ki’li' walalaga henanho ha nkambi' wu’ziku' wenu’wo.

Wikinde wamwa Yakobo na Mulungu

22 Wu’ziku' wenu’wo Yakobo watunu’laga, wav’asolaga v’aki' v’akwe v’av’i’li', masuli’la v’akwe v’av’i’li', na v’ana v’akwe iku’mi na yu’mo, nawe wav’av’i’tyaga ha muv’i’to gwa mongo gwa Yaboki. 23 Aho wav’av’i’tyaga ha muv’i’to, wav’i’tyaga hangi' na nsawo zyakwe zyose. 24 Yakobo wasigalaga inene henanho. Hohene wizaga muntu' yu’mo, haho v’idimaga miv’anda mpaka ndiyu'. 25 Muntu' mwenu’yo aho wawonaga ku’v’a akakowola ku’mukinda Yakobo, wamukumyaga ha kafyu’fyu' ka ha itango, haho Yakobo watyegu’kaga kafyu’fyu' ka itango lyakwe. 26 Hohene muntu' mwenu’yo wamuwi’laga Yakobo ati', "Ndeku’li’le nje ku’nguno yi’li' ikingilima." Ali’vi Yakobo wasu’v’yaga ati', "Nkakowola ku’ku’leku’li’la u’ye mpaka u’ndosye." 27 Haho muntu' mwenu’yo wamuwu’zyaga, "Lina lyako u’li' nde?" Nawe wasu’v’yaga ati', "Ene ni' Yakobo." 28 Muntu' mwenu’yo wamuwi’laga ati', "U’kav’e u’li’witanwa hangi' Yakobo, ali’vi u’ku’v’a u’li’witanwa Izilaeli*32:28 Lina "Izilaeli" ku' Ki’ebulania nguno yayo "Mulungu ali’wigu’maga." , ku’nguno wikindaga na Mulungu na v’antu' v’angi' nanho wakindaga." 29 Haho Yakobo wayombaga, "Nu’ku’lomba chaki’sa mbwi’le lina lyako u’li' nde?" Ali’vi muntu' mwenu’yo wasu’v’yaga, "ku' ki' u’li’mbu’zya lina lyanne?" Haho wamudosyaga kwenu’ko.

30 Hohene Yakobo wahitanaga henanho "Penueli*32:30 Lina "Penueli" ku' Ki’ebulania nguno yayo "wu’syu' wa Mulungu."," ku’nguno wayombaga, "Nawu’wonaga wu’syu' wamwa Mulungu ku' minso ganne ali’vi nkafwile!" 31 Aho Yakobo wav’age ali’wu’ka henanho ha Penueli na ku’v’i’ta mongo, lyu’v’a lyasangwa lyadodomoka, nawe wav’age ali’sunta ku’nguno ya ku’tyegu’ka kafyu’fyu' ka itango lyakwe. 32 Yeni’yo hu' nguno ya V’aizilaeli mpaka walelo v’akalyaga musipa gwa itango ha kafyu’fyu', ku’nguno muntu' mwenu’yo wakuumya kafyu’fyu' kamwa Yakobo henanho.