1 19 Ha mbu'ki', Mulungu watundaga ilunde na li'welelo. 2 Mu itungo lyeni'lo li'welelo lyav'age li'li' wu'du'hu' ki'ntu', ninga wu'tundwa, na giti yav'age yi'kumbile ha igu'lya na nyanza, na Loho* ya Mulungu yav'age yi'li'elela ha igu'lya na welekela wa minzi'.

3 Haho Mulungu wayombaga, "Gu'v'e mwanga," na gwav'aga mwanga. 4 Nago wagu'wonaga mwanga ku'v'a gu'li' musoga, na wagu'lekaniaga mwanga na giti. 5 Mulungu wagwitanaga mwanga "Lyu'v'a," na giti wayitanaga "Wu'ziku'." Yav'aga mpi'ndi' yav'aga ndiyu', lu'siku' lwa kwandya.

6 Hangi' Mulungu wayombaga, "Ku'v'eho na chelela hagati' na minzi', ki'gele ki'lekanie minzi' gav'e lwandi' lwa ku' igu'lya na ha nsi'li'li'." 7 Hu' vyene watundaga chelela, na wagalekaniaga minzi' ago gav'age ha igu'lya na chelela nago gav'age ha nsi'li'li' ya chelela, na yav'aga vyeni'vyo. 8 Mulungu wakitanaga chelela cheni'cho "Ilunde." Yav'aga mpi'ndi' yav'aga ndiyu', lu'siku' lwa wu'v'i'li'.

9 Haho Mulungu wayombaga, "Minzi' ago gali' ha nsi'li'li' ya ilunde gikuminge haki'mo, ki'gele yigele nsi' nkazu," na yav'aga vyeni'vyo. 10 Hohene wahitanaga hakazu "Nsi'" na ha wokale wa minzi' wahitanaga "Nyanza," nawe wawonaga ku'v'a yi'li' visoga. 11 Hangi' Mulungu wayombaga, "Nsi' yi'mezye mimelo zya ku'pambya mbiyu', na miti' zya ku'pambya visumo vya mbiyu' hekeheke ku' wu'tundwa wazyo," na yav'aga vyeni'vyo. 12 Haho, nsi' yamezyaga mimelo zya ku'pambya mbiyu' hekeheke ku' wu'tundwa wazyo na miti' zya ku'pambya visumo vya mbiyu' hekeheke ku' wu'tundwa wazyo, na Mulungu wawonaga ku'v'a yi'li' visoga. 13 Yav'aga mpi'ndi', yav'aga ndiyu', lu'siku' lwa wu'datu'.

14 Hangi' Mulungu wayombaga, "Ku'v'eho na myanga ku' chelela cha ilunde ki'gele zilekanie lyu'v'a na wu'ziku', na zyeni'zi ziku'v'a hu' lu'manyi'lo lwa ku'manyi'la matungo, nsiku' na myaka. 15 Nazyo ziv'e myanga ku' ilunde na ku'li'mu'li'ki'la li'welelo," na yav'aga vyeni'vyo. 16 Mulungu watundaga myanga iv'i'li' mihanya zya hekeheke, gu'mo gu'teme lyu'v'a, na gu'ngi' gu'teme wu'ziku'. Hangi' watundaga na nsonda. 17 Haho wazitu'u'laga myanga zyeni'zyo ku' chelela cha ilunde, ki'gele zili'mu'li'ki'le li'welelo, 18 ki'gele ziteme lyu'v'a na wu'ziku', na ku'lekania mwanga na giti. Mulungu wawonaga ku'v'a yi'li' visoga. 19 Yav'aga mpi'ndi' yav'aga ndiyu', lu'siku' lwa wu'ne.

20 Hangi' Mulungu wayombaga, "Ku'v'e na vitundwa vya myu'ye ya wu'panga vyokale mu minzi', na nnoni zibulumuke mu igu'lya mu chelela." 21 Haho watundaga vitundwa vyose vihanya vya mu minzi', na vitundwa vingi' vya ku'yu'mba mu minzi' ku' wu'tundwa wavyo, haki'mo na nnoni zyose ku' wu'tundwa wazyo, nawe wawonaga ku'v'a yi'li' visoga. 22 Mulungu wavidosyaga ku' ku'yomba ati', "Mwiwu'te, mwingi'he, mokale mu minzi' ga mu nyanza, na nnoni zingi'he ha nsi'." 23 Yav'aga mpi'ndi' yav'aga ndiyu', lu'siku' lwa wu'tano.

24 Hangi' Mulungu wayombaga, "Nsi' yi'v'yale vitundwa vya myu'ye ya wu'panga ku' wu'tundwa wavyo, ndimu zya mu ipolu na zya ku'sav'a, na vitundwa vingi' vya ku'yu'mba ha igu'lya na nsi' ku' wu'tundwa wavyo," na yav'aga vyeni'vyo. 25 Haho watundaga ndimu zya mu ipolu na zya ku'sav'a na vitundwa vingi' vyose vya ku'yu'mba ha igu'lya na nsi' ku' wu'tundwa wavyo, nawe wawonaga ku'v'a yi'li' visoga.

26 Hangi' Mulungu wayombaga, "Gi'si' ku'tunde* v'antu' ku' wikole wiswe, v'ikole niswe, ki'gele v'akateme nsonvi zya mu minzi', nnoni zya mu chelela, visawa vyose na vitundwa vyose vya ku'yu'mba ha igu'lya na nsi' mu welelo yose."

27 Hohene wav'atundaga v'antu' ku' wikole wakwe,

ku' wikole wakwe mweni'ki'li' wav'atundaga mugosya na muki'ma.

28 Mulungu wav'adosyaga ku' ku'v'awi'la, "Muv'e na wu'v'yalwa wingi muno, mwingi'he, muyokazye welelo, na muv'e ha igu'lya na vyose. Muteme nsonvi zya mu minzi', nnoni zyose na ki'la ki'tundwa cha ku'yu'mba ha igu'lya na nsi'."

29 Mulungu wayombaga, "Lingagi, namupaga ki'la mumelo gwa mbiyu' u'go gu'li' ha nsi' mu welelo yose, na ki'la muti' u'go gu'li' na visumo vya mbiyu', viku'v'a viliwa vinywe. 30 Nazyo ndimu zyose zya mu welelo, nnoni zya mu chelela, na vitundwa vingi' vyose vya ku'yu'mba ha igu'lya na nsi', ki'la ki'tundwa cha myu'ye ya wu'panga, nu'vipa mimelo zyose zya madu'tu' viv'e viliwa vyavyo." Yav'aga vyeni'vyo.

31 Yav'aga aho Mulungu wamali'laga ku'tunda, lingaga, wawonaga ki'la ki'ntu' i'cho watundaga ki'li' ki'soga muno. Yav'aga mpi'ndi' yav'aga ndiyu', lu'siku' lwa mukaga.