1 Hangi' Yosefu wamusemuzyaga mwi'mi'li'zi wa nnumba yakwe na ku'yomba, "Okazya maguni'la ga v'antu' v'enav'a, ki'la yu'mo ngelo ya viliwa i'vyo akowolile ku'somba. U'tu'u'le hela ya ki'la muntu' ha igu'lya na iguni'la lyakwe. 2 Hangi' u'tu'u'le ki'kombe channe cha mupango* ha igu'lya na iguni'la lya u'yo mudo wav'o v'ose, haki'mo na hela zyakwe zyose i'zyo wagu'li'laga viliwa." Nawe wav'ezyaga ki'ti' i'vyo Yosefu wamuwi'laga.

3 Aho wasya ndiyu', v'antu' v'enav'o v'aleku'li'lagwa v'awu'ke haki'mo na mpunda zyav'o. 4 Hohene, v'alamulaga musi'nzo. Ali'vi itungo idoo aho v'av'age v'akaali' ku'fika ku'le ku'fuma mu kaya, Yosefu wamutu'maga mwi'mi'li'zi wa nnumba yakwe na ku'muwi'la, "V'alondezye v'antu' v'enav'a, aho u'ku'v'apandi'ka u'v'awu'zye, ‘ku' ki' mwali'pi'ki'zya wu'soga ku' wu'v'i? 5 Ku' ki' mwasolaga ki'kombe i'cho u'nywelaga gu'ku' wanne na ku'lagu'li'la? Mwapu'v'yaga muno ku' ku'v'ezya vyeni'vyo.’ "

6 Haho mwi'mi'li'zi mwenu'yo wav'alondezyaga. Aho wav'apandi'kaga wav'awi'laga mihayo zyeni'zyo. 7 Ali'vi nav'o v'asu'v'yaga ati', "Gu'ku' wiswe, ku' ki' u'li'yomba mihayo zyeni'zi? Iswe ku'li' v'akumba v'ako, ku'kakowolile ku'v'ezya igambo ki'ti' lyeni'lo! 8 Izu'ki'la gu'ku', hela i'zyo ndi' kwazisanga ha igu'lya na maguni'la giswe, lingaga kwazisu'v'izye ku'fuma ku' nsi' ya Kanaani. Yi'li'kowoleka vihe hangi' iswe kwiv'a feza ninga zahabu mu lu'go lwamwa gu'ku' wako? 9 U'yo akwigela ali'nacho ki'kombe mugati' niswe awu'lagwe, niswe v'angi' ku'ku'v'a v'asese v'ako."

10 Mwenu'yo mwi'mi'li'zi wasu'v'yaga, "Visoga muno, yi'v'e ki'ti' i'vyo mwayombaga. Muntu' u'yo aku'sangwa ali'nacho ki'kombe cheni'cho aku'v'a musese wanne. Ali'vi inywe v'angi' muku'v'a muli' wu'du'hu' musango."

11 Hohene ki'la yu'mo wasosyaga iguni'la lyakwe wangu' wangu' na ku'li'tungu'la. 12 Haho mwi'mi'li'zi walamulaga ku'gafunyu'nku'la maguni'la, walamuli'laga ku' muku'lu' wav'o na ku'mali'zi'zya ku' muzuna wav'o. Ki'kombe cheni'cho chigelelaga mu iguni'la lyamwa Benyamini. 13 Ku'nguno yeni'yo v'azemulaga vizwalo vyav'o ku' misayo. Ki'la yu'mo wayi'sombyaga mpunda yakwe muligo, nav'o v'asu'v'aga ku' kaya ku'mwa Yosefu.

14 Yuda na v'adu'gu'ye aho v'afikaga ha lu'go lwamwa Yosefu, wasangwa Yosefu akaali' ali' ha lu'go. Hohene v'amuku'v'i'i'laga ku' wov'a. 15 Yosefu wav'awi'laga ati', "Igambo ki' i'lo mwav'ezyaga? Mukamanya muntu' ki'ti' ene nkowolile ku'manya magambo ku' nzi'la ya wu'lagu'zi?"

16 Yuda wasu'v'yaga ati', "Gu'ku' wiswe, ki'mba ku'ku'wi'le ki'. Ki'mba ku'yombe ki' ki'gele ku'lagi'le ati' ku'li' wu'du'hu' musango. Mulungu walagi'laga wu'kenagu'zi wiswe v'akumba v'ako. Gi'si' iswe haki'mo na u'yo wasangagwa na ki'kombe mu iguni'la lyakwe, v'ose ku'li' v'asese v'ako."

17 Ali'vi Yosefu wayombaga ati', "Ayi' ng'o, nkakowola ku'v'ezya igambo lyeni'lo. Muntu' u'yo wasangagwa na ki'kombe channe mu iguni'la lyakwe, hu' mwene aku'v'a musese wanne. V'angi' v'ose musu'v'e na ku'hola ku'mwa sinywe."

18 Haho Yuda wamwegelaga Yosefu na ku'muwi'la, "Gu'ku' nu'ku'lomba u'ndegeleke, ene mukumba wako, njombe mihayo ninga midoo ha mbele yako. Nu'kwikonga ku'du' u'ngayi'le, ku'nguno ev'e u'li' ki'ti' Falao mweni'ki'li'. 19 Gu'ku' wanne ev'e ndi' waku'wu'zya ati', ‘Muli' na sinywe? Ninga mudu'gu' winywe yu'ngi'?’ 20 Niswe ndi' kwasu'v'ya ati', ‘V'av'a wiswe akaali' ali'zuwu'ka, ali'vi wakakiku'la. Hangi' ali'ho muzuna wiswe u'yo v'av'a wampandi'kile ku' wu'kiku'lu'. Muzuna wiswe mwenu'yo wav'age na muku'lu'ye u'yo v'av'yalilwe na nnina yu'mo, ali'vi muku'lu'ye mwenu'yo wamalile ku'gulala. Ku'nguno yeni'yo muzunaye wakasigala inene, nawe wav'ile mutoneke muno ku'mwa v'av'a.’

21 "Haho ndi' waku'wi'la iswe v'akumba v'ako, ku'mulete ki'gele u'muwone ku' minso gako. 22 Iswe kwasu'v'yaga ati', ‘Musu'mbana mwenu'yu' akakowola ku'hafuma hamwa ise, ku'nguno u'lu' amuleke, ise aku'fwa.’ 23 Ali'vi ev'e gu'ku' ndi' waku'wi'la ati', ‘U'lu' mupotwe kwiza na muzuna winywe, mukasye mumbone wu'syu' wanne hangi'.’ 24 Yav'aga aho ndi' kwasu'v'a ku' lu'go lwa mukumba wako, v'av'a wiswe, haho ndi' kwamuwi'la mihayo i'zyo ndi' waku'lagi'li'zya, ev'e gu'ku' wanne.

25 "Aho lyav'i'taga itungo v'av'a wiswe waku'wi'laga ati', ‘Musu'v'e ku' Misili mukagu'le viliwa vingi'.’ 26 Ali'vi iswe kwasu'v'yaga ati', ‘Ku'kakowolile ku'ya ku'muleke muzuna wiswe. Ku'nguno mutemi wa kwenu'ko wayombile, ku'kasye kwiwone nawe u'lu' ku'kayile haki'mo na muzuna wiswe.’

27 "Haho v'av'a wiswe mukumba wako waku'wi'laga ati', ‘Mumanyile ku'v'a muki' wanne ndi' wambyali'la v'ana v'av'i'li' du'. 28 Mugati' nav'o v'enav'a yu'mo watagi'kile, nanne nayombile, "Nhana wakatandagu'lwa na idimu idaki." Nkaali' mmuwonage hangi' mpaka walelo. 29 U'lu' mumusole mwenu'yu' ku'fuma ha wanne, nawe akavulali'ke, hohene muku'ndengela ku'ya mu ki'v'i'mbi' ku'nguno ya misayo na wu'kiku'lu' wanne.’ "

30 Yuda walambaga ku'yomba, "Gu'ku' wiswe, ene u'lu' ndeke ku'su'v'a haki'mo na musu'mbana mwenu'yu' ku'mwa v'av'a wiswe mukumba wako, aku'fwa, ku'nguno wu'zuwu'ku wamwa v'av'a wu'li' haki'mo na wu'zuwu'ku wa musu'mbana mwenu'yu'. 31 U'lu' awone musu'mbana akav'ile haki'mo niswe, iswe v'akumba v'ako ku'ku'mulengela v'av'a wiswe ku'ya mu ki'v'i'mbi' ku' misayo na wu'kiku'lu' wakwe. 32 Ene mukumba wako nalahi'lile kwi'ma ku' lwandi' lwakwe na ku'yomba, ‘U'lu' ndeke ku'musu'v'ya musu'mbana mu makono gako musango gu'v'e nanne nhananhana.’

33 "Gi'si' hohene nu'kwikonga muno, gu'ku' wanne, u'zumye ene nsigale mmbe musese wako, ali'vi musu'mbana mwenu'yu' u'muzumi'zye asu'v'e ku' lu'go haki'mo na v'aku'lu'ye. 34 Nku'su'v'a vihe ku'mwa v'av'a wiswe ku'no nkav'ile na musu'mbana mwenu'yu'? Nkakowola ku'wona i'vyo v'av'a wiswe ali'koya ku' misayo."