1 Lu'siku' lu'mo, Mulungu wamuwi'laga Yakobo ati', "Wu'ka u'ye ku' lwandi' lwa Beteli, u'kikale kwenu'ko, u'kanzyengele ihozezyo. Ene hu' ni' Mulungu u'yo ndi' wakwifumi'i'la aho wav'age u'mupeelile muku'lu'yo Esau."

2 Hohene Yakobo wav'awi'laga v'antu' v'a mu lu'go lwakwe haki'mo na v'ose av'o wav'age nav'o ati', "Muvitage vimbulimbuli vya ki'geni i'vyo vili' hagati' na inywe. Mugalu'zye vizwalo vinywe na mwiv'ezezye wu'soso. 3 Hangi' ku'wu'ke ku'ye ku' Beteli, nanne nkamuzyengele Mulungu ihozezyo kwenu'ko, u'yo ndi' wanyigwa lu'siku' lwa lu'duko lwanne, na ku'v'a haki'mo nanne ki'la u'ko ndi' naya." 4 Hohene v'amupaga Yakobo vimbulimbuli vya ki'geni vyose i'vyo vyav'age mu makono gav'o, na vipini vya mu matwi i'vyo v'av'age v'azwalile, nawe Yakobo waviv'isaga ha nsi'li'li' na muti' muhanya gwa mwaloni u'go gu'li' ku' lwandi' lwa Shekemu.

5 Hangi' Yakobo na mugana gwakwe aho v'awu'kaga musi'nzo, Mulungu wav'atu'u'li'laga wov'a wu'hanya v'ikazi v'a kaya zyose i'zyo zyav'age ziv'apilimile, nav'o v'akagemile ku'v'alondezya. 6 Yakobo na mugana gwakwe v'afikaga ku' Luzu, lina li'ngi' Beteli, ku' nsi' ya Kanaani. 7 Aho wafikaga kwenu'ko, wazyengaga ihozezyo na wahitanaga henanho "El-beteli*," ku'nguno henanho hu' Mulungu ndi' wamwifumi'i'la aho wav'age amupeelile muku'lu'ye Esau. 8 Itungo lyeni'lo Debola, muzya u'yo wav'age musu'ngi wamwa Lebeka, wagulalaga. Nawe wazyi'ki'lagwa ha nsi'li'li' na muti' gwa mwaloni, ku' lwandi' lwa dakama ya Beteli. Henanho Yakobo wahitanaga "Aloni-bakuti*."

9 Aho Yakobo wasu'v'aga ku'fuma ku' Padani-alamu, Gu'ku' Mulungu wamwifumi'i'laga hangi' na ku'mudosya. 10 Mulungu wamuwi'laga ati', "Lina lyako u'li' Yakobo, ali'vi u'kasye witanwe hangi' Yakobo, sumbwa u'kwitanwa Izilaeli." I'vi hu' vyene wamupaga lina Izilaeli. 11 Hangi' Gu'ku' Mulungu wamuwi'laga ati', "Ene ni' Gu'ku' Mulungu wa Nguzu*. U'v'e na wu'v'yalwa wingi muno. Mukingi'he, ku'nguno ku' wako ev'e nsi' na mbuto ya makabi'la, haki'mo na v'atemi v'alafumi'i'le ku' wu'v'yalwa wako. 12 Nsi' i'yo nav'apile Abalahamu na Isaka, nku'ku'pa ev'e na wu'v'yalwa wako." 13 Aho Mulungu wamali'laga ku'yomba na Yakobo, wamulekaga haho.

14 Haho Yakobo waki'ndi'kaga nhi'ngi' ya iwe ha lwandi' lwenu'lo aho wasu'nsu'mu'laga na Mulungu, hangi' wapu'ngu'li'laga kalu'mbi'lo ka ki'neneko haki'mo na maguta ha igu'lya na nhi'ngi' yeni'yo. 15 Yakobo wahitanaga henanho lina "Beteli," aho Mulungu wasu'nsu'mu'laga nawe.

16 Hangi' Yakobo haki'mo na v'antu' v'akwe v'awu'kaga mu Beteli. Aho v'av'age v'akaali' katanalo ku'fika ku' Efulati, Lahele wadimagwa na wu'su'ngu' wu'daki muno wa ku'v'yala. 17 Yav'aga aho akaali' ali'tuka na wu'su'ngu' wu'daki, mwingi' wakwe wamuwi'laga ati', "Ku'du' wogohe, ku'nguno wapandi'ka mwana yu'ngi' wa ki'gosya." 18 Lahele aho myu'ye yakwe yi'li'mali'si'ka ku'nguno ndi' ali'fwa, haho wamupaga lina mwana mwenu'yo Benoni*. Ali'vi ise wamupaga lina Benyamini*. 19 Hohene Lahele wagulalaga na wazyi'ki'lagwa ha mpelo na nzi'la i'yo yi'yile ku' Efulati, i'yo gi'si' yi'li'witanwa Betelehemu. 20 Yakobo waki'ndi'kaga nhi'ngi' ya iwe ha igu'lya na ki'v'i'mbi', na yeni'yo hu' yi'li'lagi'la ki'v'i'mbi' chamwa Lahele mpaka walelo.

21 Izilaeli wendeleyaga na musi'nzo gwakwe. Aho waki'v'i'taga chamba cha Edeli, watu'u'laga nkambi' yakwe henanho. 22 Mugati' na wikalo wakwe Izilaeli mu nsi' yeni'yo, lu'siku' lu'mo mwana wakwe Lubeni wamusolaga Biliha isuli'la wamwa ise walala nawe, Izilaeli nawe wigagwa igambo lyeni'lo.

Yakobo wav'age na v'ana iku'mi na v'av'i'li':

23 V'ana v'a ki'gosya v'amwa Leya v'av'age:

Lubeni, muv'yalwa wa mbele wamwa Yakobo, Simiyoni, Lawi, Yuda, Isakali na Sebuloni.

24 V'ana v'a ki'gosya v'amwa Lahele v'av'age:

Yosefu na Benyamini.

25 V'ana v'a ki'gosya v'amwa Biliha, muzya wamwa Lahele, v'av'age:

Dani na Nafutali.

26 V'ana v'a ki'gosya v'amwa Zilipa, muzya wamwa Leya, v'av'age:

Gadi na Asheli.

V'enav'a hu' v'ana v'amwa Yakobo av'o v'av'yalagwa ku' Padani-alamu.

27 Yakobo wasu'v'aga ku' Mamule ku'mwa ise Isaka, bi'hi' na Kiliati-aliba, lina li'ngi' Hebuloni, u'ko v'av'age v'ikalile Abalahamu na Isaka ki'ti' v'ageni v'izi'li'zi. 28 Wikalo wakwe wose mu welelo Isaka wikalaga myaka igana li'mo na maku'mi munane. 29 Nawe wagulalaga, ali' na wu'kiku'lu' wu'soga wa lu'v'ango, walondaga nzi'la ya v'antu' v'akwe av'o v'amalile ku'tongela, na v'ana v'akwe Esau na Yakobo v'amuzyi'kaga.