1 Haho Gu'ku' Mulungu wamuwi'laga Nowa, "Ingi'la mu safina, ev'e haki'mo na mugana gwako gose, ku'nguno mugati' na v'antu' v'a itungo lyeni'li', naku'wonaga ev'e winene hu' u'li' wa lole ha mbele yanne. 2 U'sole na ndimu nsoga mupungati' zya ki'gosya na mupungati' zya ki'ki'ma zya hekeheke, na ndimu zya zoma iv'i'li' iv'i'li', zya ki'gosya na zya ki'ki'ma, ku' ki'la ndimu ku' wu'tundwa wayo. 3 Hangi' u'sole na nnoni mupungati' mupungati' zya hekeheke, ngosya na nki'ma, ki'gele ku'zitu'u'la mbiyu' zyazyo ku'du' zigayiwe mu welelo. 4 Ku'nguno u'lu' zyamala nsiku' mupungati' ku'fuma walelo haho ndalete nvula. Yi'latonye mu welelo yose, nsiku' maku'mi ane lyu'v'a na wu'ziku', na ki'la ki'tundwa cha myu'ye ya wu'panga i'cho naki'tundaga mu welelo ndaki'zimangu'zye." 5 Nawe Nowa wav'ezyaga ki'ti' i'vyo Gu'ku' Mulungu wamulagi'li'zizye.

6 Mu itungo lyeni'lo lya kamilamasenga mu welelo, Nowa wav'age na musimo gwa myaka magana mukaga. 7 Hu' vyene Nowa, muki' wakwe, v'ana v'akwe na v'aki' v'av'o v'ingi'laga mu safina ku'nguno ya ku'yi'hega kamilamasenga. 8 Mugati' na ndimu nsoga, zya zoma, nnoni na vitundwa vingi' vya ku'yu'mba ha igu'lya na nsi', 9 iv'i'li' iv'i'li' zya ki'gosya na zya ki'ki'ma, zizaga ku' wakwe na zingi'laga mu safina ki'ti' i'vyo Mulungu wamulagi'li'zizye Nowa. 10 Yav'aga aho zyav'i'taga nsiku' mupungati', minzi' ga kamilamasenga galamulaga kokala ha nsi'.

11 Aho Nowa wafikyaga musimo gwa myaka magana mukaga, lu'siku' lwa iku'mi na mupungati' mu mwezi gwa wu'v'i'li', lu'siku' lwenu'lo hu' zyadu'li'kaga nzwi'lo zya minzi' ha nsi' ku' nguzu, na malunde ga nvula mu igu'lya galugu'li'lagwa. 12 Nvula yatonyaga ha igu'lya na nsi', nsiku' maku'mi ane lyu'v'a na wu'ziku'. 13 Lu'siku' lwenu'lo lwa ku'lamula ku'tonya nvula, Nowa, muki' wakwe, na v'ana v'akwe v'adatu' Shemu, Yafeti na Hamu, haki'mo na v'aki' v'av'o, v'ose v'asangwa v'akiingi'la mu safina. 14 V'ingi'laga haki'mo na ndimu zya mu ipolu, ndimu zya ku'sav'a, vitundwa vingi' vya ku'yu'mba ha igu'lya na nsi', na nnoni zyose, ki'la ki'mo ku' wu'tundwa wacho. 15 Vitundwa vyose vya myu'ye ya wu'panga vizaga ku'mwa Nowa viv'i'li' viv'i'li', na vingi'laga mu safina. 16 Vitundwa vyose i'vyo vingi'laga mu safina vyav'age vya ki'gosya na vya ki'ki'ma, ki'ti' i'vyo Mulungu ndi' wafumya ilagi'li'zyo ku'mwa Nowa. Haho Gu'ku' Mulungu wagu'lugalaga muzigo.

17 Nvula ya kamilamasenga yav'aga mu welelo ku' itungo lya nsiku' maku'mi ane. Nago minzi' gayo gokalaga muno ha nsi' na gayi'wu'syaga safina mu igu'lya. 18 Minzi' genago gav'aga gali'wingi'ha ku' nguzu, nago gokalaga muno ha nsi', nayo safina yembelaga ha igu'lya na minzi'. 19 Minzi' genago gingi'haga muno ha igu'lya na nsi', mpaka gazikumbi'laga ngu'lu' zyose ndihu zya mu welelo. 20 Gingi'haga mpaka ngu'lu' zyakumbi'lagwa wu'tihu wa makono mupungati'. 21 Vitundwa vyose mu welelo vyafwaga: nnoni zyose, ndimu zya ku'sav'a na zya mu ipolu, na vitundwa vingi' vyose vya ku'yu'mba ha igu'lya na nsi', haki'mo na v'antu' v'ose. 22 Ki'la ki'tundwa cha myu'ye ya wu'panga cha ha igu'lya na nsi' chafwaga. 23 Mulungu wavizimangu'zyaga vitundwa vyose mu welelo. V'antu', ndimu, nnoni, na vitundwa vingi' vya ku'yu'mba ha igu'lya na nsi', vyose vyazimangu'ziv'agwa. V'asigalaga Nowa haki'mo na mugana gwakwe du' av'o wav'age nav'o mu safina.

24 Minzi' genago gayi'kumbaga welelo ku' nsiku' igana li'mo na maku'mi atano.