1 Aho lyav'i'taga itungo, muteki muhanya wa migate na mugawu'zi muhanya wa vinywiwa ku'mwa Falao, mutemi wa Misili, v'amukeniaga gu'ku' wav'o. 2 Falao wav'agayi'laga v'ahanya v'enav'o v'av'i'li', 3 nawe wav'alugali'laga mu igelezya i'lo lyav'age mu ngomwa ya muhanya wa v'asilikale, u'mo wav'age alugali'lilwe Yosefu. 4 Muhanya mwenu'yo wa v'asilikale wamusogolaga Yosefu av'e munyapala wav'o. Nav'o v'ikalaga v'alugali'lilwe ku' matungo.

5 Hohene lu'siku' lu'mo wu'ziku', muhanya wa vinywiwa na muteki muhanya wa migate v'a mutemi wa Misili, v'alotaga ndoti mwenu'mo mu igelezya, na ki'la ndoti yav'age na nguno yakwe heke.

6 Ndiyu' Yosefu wayaga ku'kav'awona, ali'vi wav'asangaga v'anywagalile. 7 Haho Yosefu wav'awu'zyaga v'enav'o v'ahanya v'a hamwa Falao, av'o v'av'age v'alugali'lilwe haki'mo nawe mu ngomwa yamwa gu'ku' wakwe, ati', "ku' ki' mwanywagalaga?" 8 V'asu'v'yaga ati', "Iswe kwanywagalaga ku'nguno kwalotaga ndoti na hadu'hu' wa ku'ku'lotoolela!" Ali'vi Yosefu wav'awi'laga, "Vihe, ku'lotoolela ndoti gu'kav'ile muli'mo gwamwa Mulungu? Nu'mulomba mumbwi'le ndoti zinywe."

9 Hohene mugawu'zi muhanya wa vinywiwa wamugani'laga Yosefu ndoti yakwe ati', "Mu ndoti yanne nawonaga muzabibu ha mbele yanne, 10 nago gwali' gu'li' na matambi' adatu'. Aho gwalamulaga ku'fuluma madu'tu', hene haho malawu' gasansamulaga na ku'pamba nzabibu zipiile. 11 Mu makono ganne nali' ni' na ki'kombe chamwa Falao, hohene nazisolaga nzabibu na ku'zikami'la mu ki'kombe cheni'cho, na ku'mupa Falao." 12 Haho Yosefu wamuwi'laga, "Nguno ya ndoti yako yi'li' i'vi: Matambi' adatu' genago yi'li' nsiku' idatu'. 13 Mugati' na nsiku' zyeni'zyo idatu' Falao alaku'fumye mu igelezya na ku'ku'su'v'ya ku' mili'mo zyako, nanho u'lamupe hangi' ki'kombe mu makono ki'ti' kale. 14 Ali'vi nu'ku'lomba chaki'sa, igambo lyako u'lu' lyav'eela, wize u'nizu'ki'le, u'mbezezye chelu' na ku'njomba visoga ku'mwa Falao, ki'gele nanne nfume ku'no ku' igelezya. 15 Ku'nguno ene nasolwa lwa nguzu ku'fuma ku' nsi' ya V'aebulania, na henanha ha Misili nkav'ezizye igambo lya ku'mbezya ntungwe mu igelezya."

16 Hohene muteki muhanya wa migate wamwa Falao, aho wigagwa ku'lotoolelwa kwa mwiye ku'li' visoga, wamuwi'laga Yosefu ati', "Ene nanne nalotaga ndoti, nali' nitwi'kile nyu'ngo idatu' zya migate. 17 Mu lu'ngo lwa ha igu'lya mwali' muli' na migate hekeheke zyamwa Falao, ali'vi nnoni zyazilyaga ha igu'lya na mutwe gwanne." 18 Yosefu wamuwi'laga, "Nguno ya ndoti yako yi'li' i'vi: Nyu'ngo idatu' zyeni'zyo hu' nsiku' idatu'. 19 Mugati' na nsiku' zyeni'zyo idatu', Falao alaku'fumye mu igelezya, alaku'pute mutwe gwako, alakwenenie ha muti', na muv'i'li' gwako gu'laliwe na manoni."

20 Yav'aga ha lu'siku' lwa wu'datu' gwav'age mwanya gwa lu'siku' lwa ku'v'yalwa kwamwa Falao. Wav'av'ezezyaga mwanya v'atu'mami v'akwe v'ose. Wav'afumyaga mu igelezya muteki wakwe wa migate na mugawu'zi wakwe wa vinywiwa, wav'atu'u'laga ha mbele ya v'atu'mami v'akwe. 21 Haho wamusu'v'yaga mugawu'zi muhanya wa vinywiwa mu mili'mo zyakwe ki'gele amupe hangi' Falao ki'kombe chakwe. 22 Ali'vi u'yo muteki muhanya wa migate wamweneniaga ha muti'. Yav'aga ki'ti' i'vyo Yosefu wav'alotoolelile ndoti zyav'o.

23 Ninga vyeni'vyo mugawu'zi muhanya wa vinywiwa wamulav'i'laga Yosefu, na akamwizu'ki'lile.