1 Haho Abulamu waku'fumaga ku' nsi' ya Misili na wasu'v'aga ku' ibalangu' lya Negebu haki'mo na muki' wakwe na vintu' vyav'o vyose i'vyo v'av'age navyo, hangi' Loto wayaga nav'o. 2 Ha itungo lyeni'lo Abulamu wasangwa musav'i muno wa mitugo, na mawe ga mupango ga feza na zahabu. 3 Ku'fuma kwenu'ko ku' Negebu Abulamu wawu'kaga musi'nzo ku'ya ku' mbele mpaka wafikaga ku' kaya ya Beteli, u'ko wav'age atu'u'lile nkambi' yakwe ha mbu'ki', hagati' na kaya ya Beteli na Ai. 4 Henanho hu' hene wav'age azyengile ihozezyo ku'fuma ha mbu'ki', na henanho Abulamu wamwisengaga Gu'ku' Mulungu ku' lina lyakwe.

5 Nawe Loto u'yo wawu'kaga musi'nzo haki'mo na Abulamu, wav'age na madale ga ng'ombe, nkolo na mbu'li, haki'mo na mahema. 6 Ku'nguno ya wingi wa mitugo zyav'o, lwandi' lwenu'lo lwalekaga ku'v'agelani'la kwikala haki'mo v'ose v'av'i'li'. 7 Ku'nguno yeni'yo lyawu'kaga isola mugati' na v'adi'mi v'a mitugo zyamwa Abulamu na zyamwa Loto. Hangi' mu itungo lyeni'lo V'akanaani na V'apelizi v'av'age v'ikazi v'a mwenu'mo.

8 Ali'vi Abulamu wamuwi'laga Loto, "Ku'du' ku'v'e na isola mugati' yanne nanho, ninga ku' v'adi'mi v'iswe, ku'nguno iswe ku'li' v'a wu'du'gu'. 9 Lolaga lwandi' lose lwenu'lu'. Ku'lekane. U'lu' ev'e u'ku'londa ku' mumoso ene nku'londa ku' mulyi'la, na u'lu' u'ku'londa ku' mulyi'la ene nku'londa ku' mumoso."

10 Loto wawu'syaga minso gakwe, na ku'wona iwonde lya mongo gwa Yolodani i'vi li'li' na minzi' mingi. Ku'ya mpaka kaya ya Soali wawonaga ati' li'li' na wu'soga wa minzi' mingi ki'ti' mugu'nda gwamwa Gu'ku' Mulungu, na ki'ti' nsi' ya Misili. Yeni'yi' yav'age aho Gu'ku' wav'age akaali' ku'zizimangu'zya kaya zya Sodoma na Gomola.

11 Ku'nguno yeni'yo Loto wisogolelaga iwonde lya mongo gwa Yolodani, na walondaga kwenu'ko ku' lwandi' lwa mu ki'ya. Hu' vyene yav'aga ku'lekana kwav'o.

12 Abulamu wasigalaga mu lwandi' lwa Kanaani, sumbwa Loto wayaga ku'kikala ku' kaya zya iwonde lyeni'lo, na wazyengaga nkambi' yakwe bi'hi' na Sodoma. 13 Ali'vi v'antu' v'a kaya ya Sodoma v'av'age v'akenagu'zi muno ha mbele na minso gamwa Gu'ku' Mulungu.

14 Yav'aga aho Loto wawu'kaga, Gu'ku' Mulungu wamuwi'laga Abulamu ati', "Ku'fumi'i'la henanho u'li' wu'syaga minso gako u'lole ki'la lwandi', ki'ya na mweli, sukuma na dakama. 15 Nsi' yose yeni'yi' u'yi'wine nku'ku'pa ev'e na wu'v'yalwa wako yi'v'e yinywe nhananhana. 16 Wu'v'yalwa wako nku'wu'v'ezya wu'v'e wingi ki'ti' lu'wuwu lwa nsi', ki'ti' i'vi muntu' akakowola ku'lu'solozya hu' vyene wu'v'yalwa wako ku'du'hu' u'yo alakowole ku'wu'solozya. 17 Gi'si' wu'ka u'yi'yu'mbi'le nsi' yeni'yi' ku' wu'gali'nhu wayo na wu'lihu wayo, nguno nku'ku'pa ev'e."

18 Haho Abulamu wasamyaga mahema gakwe, na wayaga ku'kikala ku' kaya ya Hebuloni bi'hi' na miti' mihanya zyamwa Mamule, na kwenu'ko wamuzyengelaga Gu'ku' Mulungu ihozezyo.