1 Lu'siku' lu'mo, Dina, mwaniki' wamwa Yakobo u'yo waku'v'yalwa na Leya, wafumaga ku'ya ku'kav'ayu'mbi'la v'aniki' v'a nsi' yeni'yo ya Kanaani. 2 Yav'aga Shekemu, mwana wamwa Hamoli, Muhivi, muhanya wa nsi', aho wamuwonaga wamudimaga na ku'lala nawe lwa nguzu. 3 Ali'vi Shekemu watogeziv'agwa muno na Dina, mwaniki' wamwa Yakobo, wamutogagwa, haho walamulaga ku'yomba nawe lwa ku'mwinonela. 4 Ku'nguno yeni'yo, Shekemu wasu'nsu'mu'laga na ise na ku'muwi'la ati', "V'av'a, nu'ku'lomba u'ntozye mwaniki' mwenu'yu'."

5 Yakobo wapandi'kaga mmola ku'v'a mwana wakwe Dina wav'ezeziv'agwa zoma na Shekemu. Ali'vi v'aane v'a ki'gosya v'asangwa v'ali' ku' idi'ma, ku'nguno yeni'yo wahu'li'kaga mpaka aho v'asu'v'aga.

6 Haho Hamoli, ise wamwa Shekemu, wayaga ku'kasu'nsu'mu'la na Yakobo. 7 Itungo lyeni'lo v'asu'mbana v'amwa Yakobo v'asangwa v'asu'v'aga ku'fuma ku' idi'ma. Aho v'igagwa ati' Shekemu wamuv'ezezyaga zoma ilu'mbu' lyav'o, v'asayaga na v'agayaga muno, ku'nguno Shekemu wav'av'ezezyaga igambo lya nsoni ku' ku'lala na mwaniki' wamwa Yakobo ku' nguzu. Igambo lyeni'lo gwav'age muzilo ku'v'eziwa vyeni'vyo ku' V'aizilaeli.

8 Ali'vi Hamoli wav'awi'laga ati', "Mwana wanne Shekemu amutogilwe muno mwaniki' mwenu'yu'. Nu'mwikonga mumuzumi'zye amutoole. 9 Leki kwitoolele, iswe ku'toole v'aniki' v'inywe, na inywe mutoole v'aniki' v'iswe. 10 Mwikale niswe mu nsi' yeni'yi', nsi' yeni'yi' yi'ku'v'a yinywe. Mwiyagalu'le mwikale henanha, muye ki'la hene, na inywe mupandi'ke nsawo."

11 Hangi' Shekemu mweni'ki'li' wamuwi'laga ise wamwa Dina haki'mo na v'adu'gu'ye ati', "Nu'mulomba mpandi'ke wu'soga ha mbele yinywe! Nku'fumya ki'la ki'ntu' i'cho muku'yomba. 12 Mumbwi'le lu'v'alo lwa nkwanwa na lu'holo u'lo muku'tonda, ninga mukoov'e ki'ntu' ki'hanya vihe, ene nku'fumya, ki'tale du' mwaniki' mwenu'yu' av'e muki' wanne."

13 Ali'vi v'asu'mbana v'amwa Yakobo, ku'nguno ilu'mbu' lyav'o Dina wav'ezeziv'agwa zoma na Shekemu, v'eni'ki'li' v'asu'v'yaga ku' wu'yengani, ku'v'awi'la Shekemu haki'mo na ise Hamoli ati', 14 "Ku'kakowola ku'mutozya ilu'mbu' liswe ku' muntu' u'yo akaputilwe nyu'nzu'! Ku'v'ezya vyeni'vyo yi'li' nsoni ku' wiswe! 15 Ku'kwizumi'li'zya ku' igambo li'mo du': Ki'la mugosya mugati' na inywe, aputwe nyu'nzu' ki'gele av'e ki'ti' iswe. 16 Hu' hene ku'lamutozye v'aniki' v'iswe, niswe ku'lav'atoole v'aniki' v'inywe. Ku'likale haki'mo na ku'v'a ki'ntu' ki'mo. 17 Ali'vi u'lu' mukaane ku'putwa nyu'nzu', ku'ku'musola ilu'mbu' liswe na ku'wu'ka."

18 Hohene, mihayo zyeni'zyo zyav'atogezyaga Hamoli na mwane Shekemu. 19 Musu'mbana mwenu'yo Shekemu, u'yo wav'age aku'ziv'ilwe mugati' na v'ose v'a mu lu'go lwamwa ise, akatagile itungo ku'v'ezya ago gayombagwa, ku'nguno wav'age amutogilwe muno mwaniki' wamwa Yakobo.

20 Hohene Hamoli na Shekemu mwane, v'ayaga ha wingi'li'lo wa kaya, ha nsangi'zyo ya v'antu'. Kwenu'ko v'asu'nsu'mu'laga na v'ichav'o na ku'yomba ati', 21 "V'antu' v'enav'a v'ali' v'anwani v'iswe. Ku'v'azumi'zye kwikala mu nsi' yiswe na ku'v'ezya wu'su'lu'zya. Nsi' yi'li' na ha kwikala hagali'nhu muno ha ku'v'agelani'la. Haho ku'lav'e ku'li'witoolela. 22 Ali'vi v'aku'zumya kwikala niswe na ku'v'a ki'ntu' ki'mo, u'lu' ku'ku'zumya igambo lyav'o. V'ali'koov'a ki'la mugosya mugati' niswe aputwe nyu'nzu' ki'ti' i'vyo v'aputilwe v'eni'ki'li'. 23 Vihe, mukawona ku'v'a nsawo zyav'o na mitugo zyav'o zyose zilav'e ziswe? Haya, kwizumani'zye nav'o ki'gele v'ikale haki'mo niswe henanha." 24 V'agosya v'ose av'o v'av'age v'ikunganiaga ha wingi'li'lo wa kaya yeni'yo, v'izumani'zyaga na Hamoli na Shekemu. Haho ki'la mugosya wa mu kaya yeni'yo waputagwa nyu'nzu'.

25 Aho zyav'i'taga nsiku' idatu', v'agosya v'enav'o v'asangwa v'akaali' v'ali' na wu'satu. Hohene v'ana v'av'i'li' v'amwa Yakobo, Simiyoni na Lawi, v'alu'mbu'ye v'amwa Dina, v'asolaga mpanga na ku'yi'titu'ki'zya kaya i'yo yi'kiiv'angile ku' wu'lu'gu', na v'av'awu'lagaga v'agosya v'ose mwenu'mo. 26 Hamoli na mwana wakwe Shekemu nav'o v'awu'lagagwa ku' lu'panga. Hangi' v'amusolaga Dina mu nnumba yamwa Shekemu, na ku'wu'ka nawe.

27 Aho v'av'awu'laga v'enav'o, v'ana v'angi' v'a ki'gosya v'amwa Yakobo v'ingi'laga mu kaya yeni'yo na ku'yi'sampa, ku'nguno ilu'mbu' lyav'o ndi' wav'ezeziv'agwa zoma! 28 V'asolaga nkolo, mbu'li, ng'ombe, mpunda, na vyose i'vyo vyav'age vili'mo mu kaya haki'mo na vya mu migu'nda. 29 V'asampaga nsawo zyav'o zyose, v'ana na v'aki'ma v'ose, na ki'la ki'ntu' i'cho chav'age mu nnumba zyav'o.

30 Hohene Yakobo wav'awi'laga Simiyoni na Lawi, "Inywe mwandetelaga lu'duko na ku'v'av'ezya v'ikazi v'a nsi' yeni'yi' ya V'akanaani na V'apelizi mbafufume. Iswe ku'li' v'adoo. V'enav'a u'lu' v'ikunganie ku'v'ezya wu'lu'gu' nanne, ene na mugana gwanne v'ose ku'lazimangu'ziwe." 31 Ali'vi v'enav'o v'asu'mbana v'asu'v'yaga ati', "Vihe, yi'li' visoga ku'muv'ezezya ilu'mbu' liswe ki'ti' mulav'a?"