1 Haho Mulungu wamulawaga Nowa, haki'mo na vitundwa vyose vya myu'ye ya wu'panga vya mu ipolu na vya ku'sav'a i'vyo vyav'age mu safina haki'mo nawe. Haho wagu'tu'maga muyaga ha igu'lya na nsi', nago gwayumaga na minzi' galamulaga ku'doha. 2 Nzwi'lo zya ha nsi' zyalugalagwa, na malunde ga nvula gahangagwa, nayo nvula yalekaga ku'tonya. 3 Nago minzi' gendeleyaga ku'kama hado hado mu nsi'. Ku'fiki'la nsiku' igana na maku'mi atano ku'fuma aho yalamuli'la kamilamasenga, minzi' gadohaga muno. 4 Lu'siku' lwa iku'mi na mupungati' mwezi gwa mupungati' safina yahagaga ha ngu'lu' zya nsi' ya Alalati. 5 Minzi' gav'aga gali'doha hado hado ku'fiki'la lu'siku' lwa kwandya lwa mwezi gwa iku'mi, nsoto zya ngu'lu' zingi' zyalamulaga kwigela.

6 Aho zyav'i'taga nsiku' maku'mi ane hangi' Nowa walugu'laga idilisya i'lo ndi' wav'ezya ku' safina yeni'yo, 7 wali'fumyaga iku'ngu'u'lu' ha ibala, nalyo lyav'aga li'li'ya u'ko na u'ko na ku'su'v'a, mpaka aho gakamaga minzi' mu nsi'. 8 Hangi' wayi'fumyaga nkunda ki'gele awone u'lu' minzi' gadohaga mu nsi'. 9 Ali'vi minzi' gav'age gakaali' gayi'kumbile nsi' yose, nayo nkunda yi'kawine ha ku'dema, yasu'v'aga ku'mwa Nowa. Nawe wagololaga mukono gwakwe na ku'yi'pokela nkunda na wayi'su'v'yaga mu safina.

10 Nowa walindi'laga hangi' nsiku' mupungati', haho wayi'fumyaga nkunda yeni'yo. 11 Mu itungo lya mpi'ndi', kasinaga nkunda yasu'v'aga yi'lumile idu'tu' itoto lya muti' gwa muzeituni mu mulomo gwayo. Haho Nowa wamanyaga ku'v'a minzi' gadohaga mu nsi'. 12 Walindi'laga hangi' nsiku' mupungati', na aho zyav'i'taga hu' wayi'lugu'li'laga nkunda, ali'vi lu'gendo lwenu'lu' yi'kasu'v'ile hangi'.

13 Yav'aga Nowa aho wafikyaga myaka magana mukaga na gu'mo ha mwezi gwa kwandya lu'siku' lwa kwandya lwa mwezi, gasangwa minzi' gakakama mu nsi'. Haho wayi'fundu'ku'laga nfundi' ya safina, nawe wawonaga nhana nsi' yalamulaga ku'u'ma. 14 Mu mwezi gwa wu'v'i'li' lu'siku' lwa maku'mi av'i'li' na mupungati' nsi' yasangwa yamalile ku'u'ma.

15 Haho Mulungu wamuwi'laga Nowa, 16 "U'fume mu safina, ev'e na muki' wako, v'ana v'ako na v'aki' v'av'o. 17 U'fumye ki'la ki'tundwa i'cho chali' ki'li' haki'mo nanho, ki'gele vikiwu'te vingi'he na ku'kwi'la mu welelo: nnoni, ndimu na vitundwa vingi' vyose vya ku'yu'mba ha igu'lya na nsi'." 18 Hohene Nowa wafumaga mu safina haki'mo na muki' wakwe, v'ana v'akwe na v'aki' v'av'o. 19 Ndimu, nnoni haki'mo na vitundwa vingi' vya ku'yu'mba ha igu'lya na nsi', vyose ku' wu'tundwa wavyo hekeheke vyafumaga mu safina.

20 Haho Nowa wamuzyengelaga Gu'ku' Mulungu ihozezyo, na wasolaga mugati' na ndimu nsoga na nnoni nsoga, wafumyaga ki'taambo cha ku'zigya ku'mwa Mulungu. 21 Haho Gu'ku' Mulungu watogeziv'agwa na wu'motu wa kalu'mbi'lo, na wiyombelaga mu moyo gwakwe, "Nkasye nji'fwizi'i'le hangi' nsi' ku'nguno ya v'antu', ninga i'vi ndaka ya miganiko gav'o nsiku' zyose gav'aga ga wu'kenagu'zi ku'fuma wu'yanda wav'o. Hangi' nkasye nzimangu'zye vitundwa vyose vya myu'ye ya wu'panga ki'ti' i'vyo nav'ezizye.

22 "Ku' itungo i'lo welelo yi'lav'e yi'li'ho,

matungo ga ku'hamba na kwi'mbu'la,

matungo ga mbeho na idu'ta,

matungo ga ki'pwa na ki'diku',

na matungo ga wu'ziku' na lyu'v'a gakasye gaduge."