1 Ha itungo lyeni'lo v'antu' v'ose mu welelo v'ayombage ki'yombele ki'mo du' na mihayo zyene zizyo. 2 V'antu' v'enav'o aho v'asamagasamaga ku'fuma lwandi' lwa mu ki'ya, v'afikaga ku' lwandi' lwa Shinali, na kwenu'ko v'awonaga nsi' ngololoku, nav'o v'ikalaga kwenu'ko. 3 Haho v'iwi'laga ati', "Izi ku'v'ezye matofali ku'gatime moto visoga." Hene v'av'age na matofali haki'mo na lami ku'leka mawe na wu'longo. 4 Haho v'ayombaga, "Ku'zyenge kaya na chamba cha ku'fika ku' ilunde, ki'gele ku'pandi'ke wu'kumalu'ku na ku'manyi'i'ka, ku'leke ku'sambala mu welelo yose."

5 Ali'vi Gu'ku' Mulungu wasookaga ki'gele awone i'yo kaya haki'mo na chamba i'cho v'ali'zyenga v'antu' v'enav'o. 6 Wayombaga "Nhana v'antu' v'enav'a v'ali' v'amo du' na ki'yombele ki'mo, nav'o v'alamulaga ku'v'ezya lyeni'li', gi'si' ki'la ndaka i'yo v'aku'loma yi'ku'gelani'la. 7 Haya niswe ku'sooke, ku'kav'asali'nkanie ki'yombele chav'o ki'gele v'aleke kwidegeleka v'av'o ku' v'av'o." 8 Hu' vyene Gu'ku' Mulungu wav'asambazyaga v'antu' v'enav'o mu welelo yose, na henanho v'alekaga ku'zyenga kaya yeni'yo. 9 Ku'nguno yeni'yo henanho v'ahitanaga "Babele*," nguno henanho Gu'ku' Mulungu wav'asali'nkaniaga ki'yombele cha v'antu' mu welelo, na ku'fuma henanho wav'asambazyaga v'aye mu welelo yose.

10 I'yi' hu' mmola yamwa Shemu na wu'v'yalwa wakwe. Ku'fuma aho yav'i'taga kamilamasenga, zyav'i'taga myaka iv'i'li', Shemu wafikyaga musimo gwa myaka igana li'mo, na wapandi'kaga mwana lina Alifakisadi. 11 Ku'fuma aho wav'yalagwa Alifakisadi, Shemu wikalaga myaka magana atano. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

12 Nawe Alifakisadi aho wafikyaga musimo gwa myaka maku'mi adatu' na itano, wapandi'kaga mwana lina Sela. 13 Ku'fuma aho wav'yalagwa Sela, Alifakisadi wikalaga myaka magana ane na idatu'. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

14 Nawe Sela aho wafikyaga musimo gwa myaka maku'mi adatu' wapandi'kaga mwana lina Ebeli. 15 Ku'fuma aho wav'yalagwa Ebeli, Sela wikalaga myaka magana ane na idatu'. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

16 Nawe Ebeli aho wafikyaga musimo gwa myaka maku'mi adatu' na ine, wapandi'kaga mwana lina Pelegi. 17 Ku'fuma aho wav'yalagwa Pelegi, Ebeli wikalaga myaka magana ane na maku'mi adatu'. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

18 Nawe Pelegi aho wafikyaga musimo gwa myaka maku'mi adatu', wapandi'kaga mwana lina Leu. 19 Ku'fuma aho wav'yalagwa Leu, Pelegi wikalaga myaka magana av'i'li' na kenda. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

20 Nawe Leu aho wafikyaga musimo gwa myaka maku'mi adatu' na iv'i'li', wapandi'kaga mwana lina Selugi. 21 Ku'fuma aho wav'yalagwa Selugi, Leu wikalaga myaka magana av'i'li' na mupungati'. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

22 Nawe Selugi aho wafikyaga musimo gwa myaka maku'mi adatu', wapandi'kaga mwana lina Naholi. 23 Ku'fuma aho wav'yalagwa Naholi, Selugi wikalaga myaka magana av'i'li'. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

24 Nawe Naholi aho wafikyaga musimo gwa myaka maku'mi av'i'li' na kenda, wapandi'kaga mwana lina Tela. 25 Ku'fuma aho wav'yalagwa Tela, Naholi wikalaga myaka igana li'mo na iku'mi na kenda. Mugati' na myaka zyeni'zyo wapandi'kaga hangi' v'ana v'a ki'gosya na v'a ki'ki'ma.

26 Nawe Tela aho wafikyaga musimo gwa myaka maku'mi mupungati', wapandi'kaga mwana wa mbele lina Abulamu, hangi' wapandi'kaga Naholi na Halani.

27 I'yi' hu' mmola yamwa Tela na wu'v'yalwa wakwe, ise wamwa Abulamu, Naholi na Halani. Halani hu' ise wamwa Loto. 28 Halani wamutongelelaga ise Tela ku'gulala kwenu'ko ku' kaya ya Ulu ku' lwandi' lwa V'akalidayo, u'ko wav'yali'lwa. 29 Yav'aga mugati' na kwikala kwav'o kwenu'ko Abulamu na Naholi v'atoolaga v'aki'ma. Muki' wamwa Abulamu witanagwe Salai, na muki' wamwa Naholi witanagwe Milika, u'yo wav'age na muku'lu'ye lina lyakwe Iska. V'ose v'av'i'li' v'av'age v'aniki' v'amwa Halani. 30 Ali'vi Salai wav'age mugu'mba, na ali' wu'du'hu' mwana.

31 Lyafikaga itungo Tela wamusolaga Abulamu, haki'mo na muki' wamwa Abulamu, Salai, na mwizu'ku'lu' wakwe Loto u'yo wav'age mwana wa mwana wakwe Halani, v'awu'kaga v'ose ku'fuma ku' kaya ya Ulu ku' lwandi' lwa V'akalidayo. V'alomaga ku'ya ku' nsi' ya Kanaani, ali'vi aho v'afikaga ku' kaya ya Halani v'ikalaga kwenu'ko. 32 Tela wagulalaga kwenu'ko ku' Halani, na wasangwa ali' na musimo gwa myaka magana av'i'li' na itano.