Gênesis 36

Wu’v’yalwa wamwa Esau

1 I’yi' hu' mmola ya v’av’yalwa v’amwa Esau, ku' lina li’ngi' Edomu. 2 Esau watoolaga v’aki’ma v’a Ki’kanaani na mina gav’o v’itanagwe Ada na Oholibama. Ada wav’age mwana wamwa Eloni, Muhiti. Oholibama nawe wav’age mwana wamwa Ana, mwizu’ku’lu' wamwa Sibeoni, Muhivi. 3 Hangi' wamutoolaga Basemati, mwana wamwa Isumaili, ilu’mbu’ye na Nebayoti. 4 Ada wamuv’yali’laga Esau mwana, na lina lyakwe witanagwe Elifazi. Basemati nawe wamuv’yali’laga mwana na lina lyakwe witanagwe Leueli. 5 Ali’vi Oholibama wamuv’yali’laga v’ana v’adatu', na mina gav’o v’itanagwe Yeushi, Yalamu na Kola. V’ana v’ose v’enav’a, v’av’yali’lagwa ku' nsi' ya Kanaani.

6 Hohene Esau wav’asolaga v’aki' v’akwe, v’ana v’akwe v’a ki’gosya na v’a ki’ki’ma, haki’mo na v’antu' v’ose v’a mu lu’go lwakwe. Hangi' wasolaga mitugo zyakwe zyose, na ki’la ki’ntu' i’cho wasangwa wapandi’kile ku' nsi' ya Kanaani. Haho wasami’laga ku' lwandi' lu’ngi' lwa ku’le na mudu’gu’ye Yakobo. 7 Esau wav’ezyaga vyeni’vyo ku’nguno ya wingi wa mitugo zyav’o, na nsawo zyav’o mweni’ki’li' na muzunaye zyav’age nyingi muno. Nsi' i’yo v’av’age v’ikalile ki’ti' v’ageni v’izi’li’zi, yali' yi’li' vilambu ku’v’agelani’la kwikala v’ose v’av’i’li' haki’mo na mitugo zyav’o. 8 Ku’nguno yeni’yo, Esau, ku' lina li’ngi' Edomu, wayaga ku’kikala ku' ngu’lu' zya Seili.

9 I’yi' hu' mmola ya wu’v’yalwa wamwa Esau, sav’o lya V’aedomu ku' ngu’lu' zya nsi' ya Seili, 10 na genaga hu' mina ga v’ana v’amwa Esau: Elifazi wav’yalagwa na muki' wakwe Ada, na Leueli wav’yalagwa na muki' wakwe Basemati.

11 Aga hu' mina ga v’ana v’a ki’gosya v’amwa Elifazi: V’itanagwe Temani, Omali, Sefo, Gatamu na Kenazi. 12 Elifazi wav’age na isuli’la na lina lyakwe witanagwe Timuna. Mwenu’yu' wamuv’yali’laga mwana wa ki’gosya lina lyakwe Amaleki. V’enav’a v’ose hu' v’izu’ku’lu' v’amwa Esau ku' muki' wakwe Ada.

13 Aga hu' mina ga v’ana v’a ki’gosya v’amwa Leueli: V’itanagwe Nahati, Zela, Shama na Miza. V’enav’a hu' v’izu’ku’lu' v’amwa Esau ku' muki' wakwe Basemati.

14 Aga hu' mina ga v’ana v’a ki’gosya v’amwa Esau ku' muki' wakwe Oholibama, mwana wamwa Ana, u’yo wav’age mwizu’ku’lu' wamwa Sibeoni: V’itanagwe Yeushi, Yalamu na Kola.

15 Av’a hu' v’ahanya v’a magongo ago gafumi’i’laga ku' v’av’yalwa v’amwa Esau:

Elifazi hu' mwene wav’age muv’yalwa wa mbele ku’mwa Esau, nawe wamuv’yalaga Temani, Omali, Sefo, Kenazi, 16 Kola, Gatamu na Amaleki. V’enav’a v’av’age hu' v’ahanya, ki’la yu’mo mu igongo lyakwe kwenu’ko ku' nsi' ya Edomu. V’enav’a v’ose v’av’age v’ana v’amwa Elifazi, mwana wamwa Ada.

17 Aga hu' mina ga v’ana v’amwa Leueli, mwana wamwa Esau: V’itanagwe Nahati, Zela, Shama na Miza. V’enav’a v’av’age hu' v’ahanya, ki’la yu’mo mu igongo lyakwe kwenu’ko ku' nsi' ya Edomu. V’enav’a hu' v’av’yalwa v’amwa Leueli, mwana wamwa Basemati, muki' wamwa Esau.

18 Aga hu' mina ga v’ana v’a ki’gosya v’amwa Oholibama muki' wamwa Esau: V’itanagwe Yeushi, Yalamu na Kola. V’enav’a v’av’age hu' v’ahanya v’a magongo av’o v’afumi’i’laga ku’mwa Oholibama, muki' wamwa Esau, mwaniki' wamwa Ana.

19 V’enav’o v’ose hu' v’av’age v’av’yalwa v’amwa Esau, ku' lina li’ngi' Edomu. V’enav’a hu' v’av’age v’ahanya v’a magongo gav’o.

Wu’v’yalwa wamwa Seili

20 Av’a hu' v’ana v’a ki’gosya v’amwa Seili, u’yo Muholi, na hu' v’ikazi v’a nsi' yeni’yo ya Edomu: V’itanagwe Lotani, Shobali, Sibeoni, Ana, 21 Dishoni, Eseli, na Dishani. V’enav’a hu' v’av’age v’ahanya v’a V’aholi.

22 V’ana v’a ki’gosya v’amwa Lotani v’av’age: Holi na Hemamu, na ilu’mbu’ye na Lotani witanagwe Timuna. 23 V’ana v’amwa Shobali v’a ki’gosya v’av’age: Aluvani, Manahati, Ebali, Shefo na Onamu. 24 V’ana v’amwa Sibeoni v’a ki’gosya v’av’age: Aya na Ana. Ana hu' mwene ndi' waligu’la nzwi’lo zya minzi' masewu ku' ibalangu', aho wav’age ali’di’ma mpunda zyamwa ise Sibeoni. 25 V’ana v’amwa Ana v’av’age: Dishoni na muku’lu’ye witanagwe Oholibama. 26 V’ana v’a ki’gosya v’amwa Dishoni v’av’age: Hemudani, Esibani, Italani na Kelani. 27 V’ana v’a ki’gosya v’amwa Eseli v’av’age: Bilihani, Zaawani na Akani. 28 V’ana v’a ki’gosya v’amwa Dishani v’av’age: Usi na Alani.

29 Av’a v’ene v’av’age hu' v’ahanya v’a magongo ga V’aholi: Lotani, Shobali, Sibeoni, Ana, 30 Dishoni, Eseli na Dishani. V’enav’a v’av’age hu' v’ahanya v’a V’aholi ku' nsi' ya Seili.

V’atemi v’a nsi' ya Edomu

31 Yeni’yi' hu' mmola ya v’atemi av’o v’av’age v’atemile mu nsi' ya Edomu, aho V’aizilaeli v’av’age v’akaali' ku’temwa na mutemi, ninga yu’mo. 32 Hohene Bela mwana wamwa Beoli, walamulaga ku’tema nsi' ya Edomu. Kaya yakwe yitanagwe Dinhaba. 33 Aho wagulalaga Bela, Yobabu, mwana wamwa Zela, ku’fuma ku' kaya ya Bosila, wasaalaga ha lwandi' lwa wu’temi wakwe. 34 Aho wagulalaga Yobabu, Hushamu, ku’fuma ku' nsi' ya V’atemani, wasaalaga ha lwandi' lwa wu’temi wakwe. 35 Aho wagulalaga Hushamu, Hadadi, mwana wamwa Bedadi, wasaalaga ha lwandi' lwa wu’temi wakwe, na kaya yakwe yitanagwe Avati. Mwenu’yu' hu' mwene walasanaga wu’lu’gu' na V’amidiani na ku’v’akinda ku' nsi' ya Mowabu. 36 Aho wagulalaga Hadadi, Samula, ku’fuma ku' kaya ya Masileka, wasaalaga ha lwandi' lwa wu’temi wakwe. 37 Aho wagulalaga Samula, Shauli, ku’fuma ku' kaya ya Lehoboti i’yo yav’age yi’li' bi’hi' na mongo gwa Efulate, wasaalaga ha lwandi' lwa wu’temi wakwe. 38 Aho wagulalaga Shauli, Baal-hanani, mwana wamwa Akiboli, wasaalaga ha lwandi' lwa wu’temi wakwe. 39 Aho wagulalaga Baal-hanani, mwana wamwa Akiboli, Hadadi, wasaalaga ha lwandi' lwa wu’temi wakwe. Kaya yakwe Hadadi yitanagwe Pau. Lina lya muki' wakwe witanagwe Mehetabeli, mwana wamwa Matiledi, mwizu’ku’lu' wamwa Mezahabu.

40 V’enav’a v’av’age hu' v’ahanya av’o v’afumi’i’laga ku’mwa Esau, ku’londa na magongo gav’o na wikalo wav’o. Mina gav’o v’av’age: Timuna, Aliva, Yeteti, 41 Oholibama, Ela, Pinoni, 42 Kenazi, Temani, Mibisali, 43 Magidieli na Ilamu. V’enav’o hu' v’av’age v’ahanya v’a magongo ago gafumi’i’laga ku’mwa Esau, ku' lina li’ngi' Edomu, sav’o lya V’aedomu. V’atemulilwe ku’londana na wikalo wav’o mugati' na lwandi' u’lo v’av’age v’ali’tema.