1 Haho v'amalaika v'enav'o v'av'i'li' av'o v'afumaga ku'mwa Abalahamu, v'afikaga ku' kaya ya Sodoma mu lyu'v'a lya mpi'ndi'. Ha itungo lyeni'lo Loto wav'age ikalile bi'hi' na wingi'li'lo wa kaya, aho wav'awonaga wayaga ku'v'asu'mbi'la na ku'v'asukambi'la ku' isima. 2 Nawe wayombaga, "V'agu'ku' v'anne, nu'mulomba mwingi'le mu lu'go lwanne ene mukumba winywe, mukuse magu'lu' ginywe, mulale henanha. Haho ndiyu' muwu'ke muyile na musi'nzo gwinywe." Ali'vi v'eni'ki'li' v'asu'v'yaga, "Ayi', iswe ku'ku'lala henanha ha isesa."

3 Ali'vi Loto wav'ikongaga muno ku'v'a v'ingi'le mu lu'go lwakwe, nav'o v'azumyaga. Haho Loto wav'atekelaga viliwa vingi na migate i'zyo zikatumba nav'o v'alyaga.

4 Yav'aga aho v'akaali' ku'lala, v'agosya v'ose v'a kaya ya Sodoma, v'asu'mbana na v'anamala, ku'fumi'i'la ki'la lwandi' v'izaga henanho na v'ayi'zyemaga nnumba yamwa Loto. 5 Nav'o v'amwitanaga Loto na ku'muwu'zya, "V'ali'he v'agosya av'o v'izaga henanha ha wako mpi'ndi' yeni'yi'? V'afumye ha ibala, ku'li'koov'a ku'lala nav'o."

6 Loto wafumaga ha ibala, na wagu'lugalaga muzigo ha nnuma yakwe. 7 Haho wav'awi'laga, "V'adu'gu' v'anne nu'mulomba, muleke ku'v'ezya wu'kenagu'zi wenu'wo! 8 Lingagi, mu lu'go lwanne ni'nav'o v'ana v'anne v'a ki'ki'ma v'av'i'li' av'o v'akaali' ku'manya mugosya. Lekagi mupe v'enav'o v'aniki' muv'av'ezye ki'ti' i'vi mutogilwe. Ali'vi v'antu' v'enav'a muleke ku'v'av'ezezya mav'i, ku'nguno yi'li'ndima ku'v'alanhana."

9 Nav'o v'asu'v'yaga, "Hafume hano! Ev'e wizile kwikala henanha ki'ti' mugeni, ku' ki' u'li'koov'a ku'v'a muyangu'zi wiswe? Ku'ku'ku'v'ezezya mav'i mahanya ku'ki'la v'ageni v'ako." Hene haho v'alamulaga ku'mutenkela ku' nnuma na v'egelaga ku'gu'v'ela muzigo gwa nnumba yakwe.

10 Ali'vi v'ageni v'amwa Loto av'o v'av'age mu nnumba v'agololaga makono gav'o na ku'mudima Loto, v'amukweselaga mu nnumba, na ku'gu'lugala muzigo. 11 Hangi' v'av'ahofuzyaga v'antu' v'ose av'o v'av'age ha ibala, v'asu'mbana na v'anamala, nav'o v'atukaga ku'gu'koov'a muzigo, ali'vi v'akagu'wine hangi'.

12 V'amalaika v'enav'o v'amuwu'zyaga Loto, "Vihe, u'li' na muntu' u'yo ali' wa bi'hi' nanho, ki'ti' v'ana v'a ki'gosya na v'a ki'ki'ma ninga v'akwi'li'ma? V'ose av'o u'li'nav'o mu kaya yeni'yi' v'afumye wangu'. 13 Ku'li' na ndaka ya ku'hazimangu'zya ku'nguno ki'li'lo i'cho chamufiki'i'laga Gu'ku' Mulungu ki'li' ki'hanya muno ku'nguno ya wu'kenagu'zi wa v'ikazi v'a kaya yeni'yi'. Nawe waku'tu'maga ku'hazimangu'zye henanha."

14 Haho Loto wayaga ku'kav'awi'la v'alahwa v'a v'ana v'akwe ati', "Wu'kagi wangu' henanha, ku'nguno Gu'ku' Mulungu ali'yi'zimangu'zya kaya yeni'yi'!" Ali'vi v'eni'ki'li' v'amuwonaga ki'ti' muntu' u'yo ali'sekya mu minso gav'o.

15 Aho lyafikaga ikingilima, v'amalaika v'enav'o v'amwangu'hyaga Loto na ku'muwi'la ati', "V'ezya wangu', u'musole muki' wako na v'ana v'ako av'a v'aniki' v'av'i'li', ki'gele muleke ku'zimangu'ziwa aho kaya yeni'yi' yi'li'piwa lu'duko."

16 Loto wav'aga ali'wikendelezya ku'wu'ka. Ali'vi ku'nguno Gu'ku' Mulungu wamuwonelaga ki'sa, v'amalaika v'enav'o v'amudimaga Loto makono gakwe na makono ga muki' wakwe na v'aniki' v'av'i'li' v'ana v'amwa Loto, v'av'afumyaga ha ibala na kaya ya Sodoma. 17 Yav'aga aho v'afikaga ha ibala na kaya, malaika yu'mo wav'awi'laga, "Muyi'pi'zye myoyo yinywe, muleke kwikev'ela, ninga ku'du' mwi'me ninga hadoo mugati' na iwonde lyeni'lo! Peeleli ku' ngu'lu' ki'gele muleke ku'zimangu'ziwa."

18 Ali'vi Loto wasu'v'yaga, "Gu'ku' wanne, yi'kav'ile vyene! 19 Yi'li' nhana ene mukumba winywe nawonelagwa ki'sa ha mbele ya minso ginywe, na inywe mwalagi'laga chelu' ki'hanya ku' wanne ku'nguno mwampi'zyaga na lu'fu, ali'vi nkakowola ku'peelela ku' ngu'lu' ku'nguno hakaali' katanalo. Mav'i genaga gaku'mpadi'ka nkaali' ku'fika kwenu'ko nanne nku'fwa. 20 Lingagi, aha bi'hi' yi'li'ho kaya ndo i'yo nkowolile ku'peelela. Yi'li' kaya ndo du'. Nu'mulomba mundeke mpeelele mwenu'mo, nanne nku'v'a na wu'panga mwenu'mo."

21 Nawe malaika wamuwi'laga, "Endita! Nazumyaga ku'lomba kwako, na kaya yeni'yo i'yo wayi'temulaga nku'leka ku'yi'zimangu'zya. 22 Ali'vi yi'li'ku'dima u'peelele mwenu'mo wangu', ku'nguno nkakowola ku'v'ezya ki'ntu' u'lu' u'ku'v'a u'kaali' ku'fika mwenu'mo." Hu' nguno ya kaya yeni'yo kwitanwa Soali*.

23 Ha itungo lyamwa Loto ku'fika mu kaya yeni'yo ya Soali lyasangwa lyu'v'a lyadodomokaga. 24 Haho Gu'ku' Mulungu wasosyaga moto mudaki gwa ki'biliti ku'fuma ku' ilunde ha igu'lya na kaya ya Sodoma na Gomola. 25 Wazizimangu'zyaga kaya zyeni'zyo iv'i'li', iwonde lyose, v'ikazi v'ose v'a mwenu'mo na mimelo zyose.

26 Ha itungo lyeni'lo aho kaya zyeni'zyo zili'v'aka moto, muki' wamwa Loto wav'age amulondile mugosi ku' nnuma, haho wikev'elaga na hene haho wav'aga iwe lya munyu.

27 Yav'aga ha lu'siku' lwa wu'v'i'li' mu ikingilima, Abalahamu wasu'v'aga aho aki'i'mile haki'mo na Gu'ku' Mulungu. 28 Nawe walolaga ku' lwandi' lwa Sodoma na Gomola haki'mo na iwonde lyose lya kaya zyeni'zyo, haho wawonaga, kasinaga lyonsi itimbu li'liinile ku' ilunde ki'ti' lyonsi lya itanuli ihanya. 29 Yav'aga aho Mulungu ali'zizimangu'zya kaya zya mu iwonde, wamulawaga Abalahamu, ku' ku'mufumya Loto mu li'silanda lyeni'lo.

30 Ali'vi Loto haki'mo na v'ana v'akwe v'a ki'ki'ma v'av'i'li' v'afumaga ku' Soali, v'aliinaga ku' ngu'lu' na v'ikalaga kwenu'ko ku'nguno v'ogohaga kwikala ku' Soali. V'ikalaga ku' ipilinga, mweni'ki'li' haki'mo na v'aniki' v'akwe v'av'i'li'.

31 Lu'siku' lu'mo, u'yo mwaniki' muhanya wamuwi'laga muzunaye ati', "V'av'a wiswe wanamalu'kaga na u'ku' ku'li' ku'du'hu' mugosya wa ku'lala niswe, ki'ti' i'vi yi'li' ki'ti'le cha v'antu' v'ose mu welelo. 32 Yi'li'ku'dima iswe ku'mukozye malwa ga muzabibu, ki'gele ku'lale nawe haho ku'pandi'ke v'ana ku'v'i'ti'la ku' wakwe."

33 Haho wu'ziku' wenu'wo v'amukozyaga sav'o malwa, na aho wakolwaga mwaniki' muhanya wayaga ku'kalala nawe. Ali'vi ise akamanyile ku'v'a alalile na mwana wakwe ninga aho wahafumaga henanho.

34 Yav'aga mu lu'siku' lwa wu'v'i'li', mwaniki' muhanya wamuwi'laga muzunaye ati', "Lingaga, wu'ziku' u'wu' wav'i'taga ene nalalaga na v'av'a. Ku'mukozye hangi' malwa, nanho u'kalale nawe ki'gele ku'pandi'ke v'ana na wu'v'yalwa ku'fuma ku' wakwe."

35 Haho v'amukozyaga hangi' malwa sav'o, na wu'ziku' wenu'wo, mwaniki' mudo wayaga ku'kalala nawe. Ali'vi ise akamanyile ku'v'a alalile na mwane ninga aho wahafumaga henanho.

36 I'vi hu' vyene v'aniki' v'enav'o v'ana v'amwa Loto v'apandi'kaga mwitungo v'ose v'av'i'li' ku'fuma ku'mwa sav'o. 37 Yav'aga u'yo mwaniki' muhanya wav'yalaga mwana wa ki'gosya nawe wamupaga lina Mowabu, na hu' mwene sav'o lya V'amowabu ninga walelo. 38 Mwaniki' mudo na mwene wav'yalaga mwana wa ki'gosya, na wamupaga lina Benami, na hu' mwene sav'o lya V'aamoni v'ose ninga walelo.