1 Ha itungo lyeni'lo kwav'age na idale li'mo lya v'atemi v'ane: Amulafeli mutemi wa ku' Shinali, Alioko mutemi wa ku' Elasali, Kedolaoma mutemi wa ku' Elamu na Tidali mutemi wa ku' Goimu, 2 v'ose ku' haki'mo v'ayaga ku'kalasana wu'lu'gu' na idale lya wu'v'i'li' lya v'atemi v'atano: Bela mutemi wa ku' Sodoma, Bilisha mutemi wa ku' Gomola, Shinabu mutemi wa ku' Adima, Shemebeli mutemi wa ku' Seboimu na mutemi wa ku' Bela. Lina li'ngi' lya Bela hu' Soali. 3 V'ose v'agasangyaga madale gav'o ga v'asilikale ku' haki'mo ku' Iwonde lya Sidimu, ku' lina li'ngi' Iwonde lya Nyanza ya Munyu. 4 I'li' idale lya v'enav'a v'atemi v'atano v'av'ezyaga vyeni'vyo ku'nguno ku' itungo lya myaka iku'mi na iv'i'li' v'av'age v'atemilwe na mutemi Kedolaoma, ali'vi ha mwaka gwa iku'mi na idatu' v'amutalaga. 5 Mwaka gwa iku'mi na ine Kedolaoma na v'atemi v'iye, av'o v'a idale lya v'atemi v'ane, v'ayaga ku'kigu'ma wu'lu'gu' na idale lyeni'li' lya v'atemi v'atano.

Aho wav'age akaali' ku'lasana wu'lu'gu' nav'o, mutemi Kedolaoma haki'mo na v'atemi v'iye v'ayaga mbela ku'kigu'ma wu'lu'gu' na ku'v'akinda V'alefai ku' Ashitaloti-kalinaimu, V'azuzi ku' Hamu, V'aemi ku' Shawe-kiliataimu, 6 na V'aholi v'a ku' ngu'lu' zyav'o zya Seili. V'av'apeezyaga mpaka ku' El-palani, ku' ndugo ya ibalangu'. 7 Haho v'asu'v'aga ku' nnuma, na v'afikaga ku' En-mishipati, lina li'ngi' hu' Kadeshi, v'avikindaga vyalo vyose vya V'aamaleki, na V'aamoli av'o v'av'age v'ikazi v'a Hasason-tamali.

8 Haho v'atemi av'o v'ane v'a Sodoma, Gomola, Adima, Seboimu, na Bela, lina li'ngi' Soali, v'awonaga v'iv'ange wu'lu'gu' kwenu'ko ku' iwonde lya Sidimu, 9 ki'gele v'alasane wu'lu'gu' na Kedolaoma mutemi wa Elamu, Tidali wa Goimu, Amulafeli wa Shinali, na Alioko wa Elasali. Wav'age wu'lu'gu' wa v'atemi v'ane ku' v'atemi v'atano. 10 Nsi' ya Iwonde lya Sidimu yav'age na miina mingi ago gokalile lami, nav'o v'atemi v'a Sodoma na Gomola aho v'apeelaga wu'lu'gu', v'amo v'adumbu'ki'laga mu miina genago na v'angi' v'apeelelaga mu ngu'lu'. 11 V'enav'o v'atemi v'ane aho v'akindaga v'asampaga nsawo zyose zya kaya zya Sodoma na Gomola haki'mo na viliwa vyav'o vyose, haho v'awu'kaga ku'ya ku' wav'o. 12 V'amusampaga na Loto, mwana wa mudu'gu'ye na Abulamu, u'yo wav'age mwikazi wa Sodoma, v'ayaga nawe haki'mo na nsawo zyakwe.

13 Muntu' yu'mo watyegaga na wamufili'laga mmola Abulamu, Muebulania, itungo lyeni'lo wav'age mwikazi wa bi'hi' na miti' mihanya zyamwa Mamule, Muamoli, u'yo wav'age mudu'gu'ye na Eshikoli na Aneli. V'ose v'av'age na lu'sangi' na Abulamu. 14 Abulamu aho wigagwa mmola ku'v'a mwana wa mudu'gu'ye wasampagwa, wav'av'ilingaga v'antu' magana adatu' na iku'mi na munane av'o v'av'yali'lilwe ha wakwe na v'ahembekilwe kwigu'ma wu'lu'gu', haho v'av'alondaga v'anisi mpaka ku' kaya ya Dani. 15 Ha wu'ziku', Abulamu wagagawu'laga madale ga v'asilikale ki'gele v'av'agwi'li'le v'anisi v'av'o. Nav'o v'av'agu'maga, v'av'akindaga, na ku'v'apeezya mpaka ku' kaya ya Hoba, ku' sukuma ya kaya ya Damasiko. 16 Haho Abulamu wasu'v'yaga nsawo zyose zya Sodoma na Gomola i'zyo ndi' zyasampwa na v'anisi, na wamusu'v'yaga Loto, mwana wa mudu'gu'ye, na nsawo zyakwe haki'mo na v'aki'ma na v'antu' v'angi'.

17 Abulamu aho wasu'v'aga ku'fuma ku' wu'lu'gu' na ku'mukinda mutemi Kedolaoma haki'mo na v'atemi v'iye, mutemi wa Sodoma wafumaga ku'kamusu'mbi'la ku' Iwonde lya Shawe, lina li'ngi' Iwonde lya Mutemi. 18 Haho Melikizedeki mutemi wa kaya ya Salemu, u'yo wav'age muhozya wa Mulungu wa ha igu'lya muno, waletaga mugate na ki'neneko. 19 Haho wamudosyaga ku' ku'yomba,

"Abulamu adosiwe na Mulungu wa ha igu'lya muno,

Matunda wa ilunde na welelo.

20 Na akumu'kiwe Mulungu wa ha igu'lya muno,

u'yo wav'atu'u'laga v'anisi v'ako mu makono gako."

Nawe Abulamu wamupaga Melikizedeki ifungu lya iku'mi lya vintu' i'vyo wasampaga ku' wu'lu'gu'.

21 Haho Mutemi wa Sodoma wamuwi'laga Abulamu, "Mpage v'antu' v'anne, ali'vi nsawo zyeni'zyo zyose u'sole ev'e mweni'ki'li'." 22 Sumbwa Abulamu wasu'v'yaga, "Nu'wu'sya mukono gwanne na ku'lahi'la ku' lina lyamwa Gu'ku' Mulungu wa ha igu'lya muno, matunda wa ilunde na welelo, 23 nkav'ile ku'sola wu'zi, ninga mukov'a gwa ki'latu' ninga ki'ntu' ki'mo cha ku' wako, ku'du' wize wifune ati' wakansav'ya. 24 Nkav'ile ku'sola ki'ntu' ninga ki'mo sumbwa du' i'vyo v'antu' v'anne v'alile. Hangi' Aneli, Eshikoli na Mamule, v'antu' av'o v'isangizye nanne ku' wu'lu'gu', v'apiwe ifungu ki'ti' i'vi yi'li'koov'iwa."