Êxodo 19

V’aizilaeli ku' lu’gu’lu' lwa Sinai

1 Lu’siku' lwa mbele lwa mwezi gwa wu’datu' ku’fuma aho V’aizilaeli ndi' v’awu’ka ku' nsi' ya Misili, lu’siku' lwenu’lo hu' ndi' v’afika ku' ibalangu' lya Sinai. 2 Ku’fuma ku' Lefidimu, v’ingi’laga ku' ibalangu' lya Sinai na kwenu’ko v’atu’u’laga nkambi' ha mbele ya lu’gu’lu' lwa Sinai. 3 Hangi' Mose waliinaga ku' igu’lya na lu’gu’lu', ki’gele akapome na Mulungu. Haho Gu’ku' Mulungu wamwitanaga ku’fuma ku' lu’gu’lu' lwenu’lo na ku’muwi’la, "I’vi hu' vyene u’ku’v’awi’la v’av’yalwa v’amwa Yakobo, av’o V’aizilaeli: 4 ‘Inywe v’eni’ki’li' mwawonile i’vi nav’av’ezezizye V’amisili, na i’vi namusolile inywe ki’ti' nyanda i’vyo yi’li’wu’syaga v’ana v’ayo mu manana gayo, na ku’muleta ku' wanne. 5 Gi’si' u’lu' mugu’degeleke muzwi gwanne ku' lu’doono, na ku’li’dima ilagano lyanne, haho inywe mulav’e v’antu' v’anne v’asogolwa mugati' na makabi’la gose, ninga i’vi welelo yose yi’li' nsawo yanne. 6 Inywe mulav’e ku' wanne wu’temi wa v’ahozya na nsi' nsondo. Zyeni’zyo hu' mihayo i’zyo u’ku’v’awi’la V’aizilaeli.’ "

7 Haho Mose wasu’v’aga na wav’itanaga v’anamala v’a Izilaeli na ku’v’awi’la mihayo zyose i’zyo Gu’ku' Mulungu wamulagi’li’zyaga av’awi’le. 8 Nav’o v’antu' v’ose v’asu’v’yaga ku' haki’mo ati', "Ku’ku’v’ezya magambo gose ki’ti' i’vyo Gu’ku' Mulungu wayombaga." Haho Mose wasu’v’yaga mihayo zyav’o ku’mwa Gu’ku' Mulungu. 9 Gu’ku' Mulungu wamuwi’laga Mose ati', "Lingaga, ene nku’v’a nu’wiza mugati' na ilunde itimbu, ki’gele v’antu' v’enav’a v’av’e v’ali’wigwa i’vyo nu’yomba nanho, nav’o v’aku’ku’sani’zya mu nsiku' zyav’o zyose."

Hangi' Mose wamuwi’laga Gu’ku' Mulungu mihayo zya v’antu'. 10 Nawe Gu’ku' Mulungu wamuwi’laga Mose ati', "Yaga u’kav’asondohye v’antu' v’enav’a walelo na igolo. U’v’awi’le v’avikanze vizwalo vyav’o, 11 na ku’fiki’i’la lu’siku' lwa wu’datu' v’av’e v’igelani’zyaga, ku’nguno lu’siku' lwa wu’datu', ene Gu’ku' Mulungu ndasooke ha igu’lya na lu’gu’lu' lwa Sinai ha mbele ya minso ga v’antu' v’ose. 12 Nanho u’v’atu’u’li’le v’antu' lu’v’i’mbi' ku' ki’la lwandi' ku’pilima lu’gu’lu'. U’ku’v’agizya v’iangali’le v’aleke ku’liina lu’gu’lu' lwenu’lu' ninga ku’lu’kuumya. U’yo alalu’kuumye lu’gu’lu' nhanayene alawu’lagwe. 13 Muntu' ninga yu’mo ku’du' ize amukuumye muntu' mwenu’yo, ali’vi alagu’mwe na mawe, ninga ku’laswa na masonga. Av’e muntu' ninga ndimu, akasye azuwu’ke. Sumbwa itungo i’lo milangale zilali’le kayawaya, haho v’antu' v’ose v’alegele ha lu’gu’lu'."

14 Hohene Mose wasookaga ku’fuma ku' lu’gu’lu', na wav’ayi’laga v’antu' na ku’v’asondohya. Haho nav’o v’avikanzaga vizwalo vyav’o. 15 Hangi' wav’awi’laga ati', "Mwiv’ange ku' lu’siku' lwa wu’datu'. Ki’la mugosya ku’du' amwegele muki’ma."

16 Yav’aga mu lu’siku' lwa wu’datu', itungo lya ndiyu', hav’age na ngilimo, wu’meku’le wa nku’v’a, haki’mo na ilunde itimbu ha igu’lya na lu’gu’lu', na muzwi gwa milangale gwali’laga kayawaya. Haho v’antu' v’ose av’o v’av’age ha nkambi' v’atetemaga. 17 Hangi' Mose wav’alondolaga v’antu' ku’fuma ha nkambi', ki’gele v’aye v’akiwone na Mulungu. V’ose v’ayaga ku’ki’i’ma ha nsi’li’li' ya lu’gu’lu' lwenu’lo.

18 Nalo lu’gu’lu' lose lwa Sinai lwakumbi’lagwa na lyonsi, ku’nguno Gu’ku' Mulungu ndi' ali’sooka ha igu’lya nalo mugati' na moto. Nalyo lyonsi lya moto gwenu’go gwaliinaga ku' igu’lya ki’ti' lyonsi lya itanuli ihanya, na lu’gu’lu' lose lwatetemaga ku' nguzu muno. 19 Itungo lyeni’lo muzwi gwa milangale gwaku’laga muno. Hangi' Mose wayombaga na Mulungu, Mulungu nawe wasu’v’yaga ku' muzwi gwa ngilimo.

20 Gu’ku' Mulungu wasookaga ha igu’lya na nsoto na lu’gu’lu' lwa Sinai. Haho wamwitanaga Mose aliine kwenu’ko ku' nsoto na lu’gu’lu'. Hohene Mose waliinaga ku' igu’lya. 21 Nawe Gu’ku' Mulungu wamuwi’laga Mose ati', "Sooka ha nsi’li’li' u’kav’ahane v’antu' v’ose ku’du' v’asyepe ku’no ku’ndola ene Gu’ku' Mulungu. U’lu' v’av’ezye vyeni’vyo v’ingi mugati' nav’o v’aku’fwa. 22 Ninga v’ahozya av’o v’ali’v’a v’ali’negela yi’li’v’adima v’isondohye, ki’gele ndeke ku’v’apa lu’duko." 23 Mose nawe wasu’v’yaga ku’mwa Gu’ku' Mulungu ati', "V’antu' v’enav’a v’akakowola ku’liina ku' lu’gu’lu' lwa Sinai, ku’nguno ev’e mweni’ki’li' waku’gizizye na ku’yomba, ‘Tu’u’li lu’v’i’mbi' mu ngiligili na lu’gu’lu' na ku’lu’leka lu’sondo.’ " 24 Haho Gu’ku' Mulungu wamuwi’laga ati', "Sooka ha nsi’li’li' u’kamulete Aloni ize haki’mo nanho. Ali’vi v’ahozya haki’mo na v’antu' v’angi' ku’du' v’asyepe ku’negela ene, ki’gele ndeke ku’v’apa lu’duko." 25 Hohene Mose wasookaga ku' v’antu' na ku’v’awi’la magambo gose ago walagi’li’ziv’agwa.