Êxodo 2

Ku’v’yalwa kwamwa Mose

1 Wav’age ali’ho muntu' yu’mo wa igongo lya V’alawi, wamutoolaga muki’ma u’yo nawe wav’age wa igongo lya V’alawi. 2 Muki’ma mwenu’yo wav’aga na mwitungo, wipeku’laga mwana wa ki’gosya. Aho wawonaga ku’v’a mwana mwenu’yu' mukeke ali' musoga, wamuv’isaga ku' itungo lya myezi idatu'. 3 Ali’vi aho wawonaga ku’v’a akakowola ku’muv’isa ku' itungo ilihu, wasolaga ki’sege cha wu’loolo na ku’ki’v’ila lami. Haho wamutu’u’laga mwana mwenu’yo mu ki’sege, na waki’v’isaga hagati' na makumbo, ha ngiligili na mongo gwa Naili. 4 Ilu’mbu’ye na mwana mwenu’yo wiv’isaga bi’hi' na henanho, ki’gele awone ago gakamupandi’ka mudu’gu’ye.

5 Hohene mwaniki', mwana wamwa Falao, wakulumunkaga ku' mongo ku’ya ku’koga, na v’azya v’akwe v’av’aga v’ali’yu’mbayu’mba ha ngiligili na mongo. Haho mwaniki' mwenu’yo waki’wonaga ki’sege mu makumbo, na wamutu’maga muzya wakwe akaki’lete. 6 Waki’funduku’laga ki’sege, lingaga, wamuwonaga mwana mukeke ali’li’la! Wamusayi’laga na ku’yomba ati', "Mwenu’yu' ali' yu’mo mugati' na v’ana v’a Ki’ebulania."

7 Hene haho ilu’mbu’ye na mwana mwenu’yo wifumbu’laga, na wamuwu’zyaga mwaniki', mwana wamwa Falao, ati', "Vihe, nje nkaku’koov’ele wa ku’konsezya mwana mugati' na v’aki’ma v’a Ki’ebulania?" 8 Mwaniki' mwenu’yo wasu’v’yaga ati', "Ee, yaga." Hohene ilu’mbu’ye na mwana mwenu’yo wayaga na wamuletaga nnina. 9 Haho mwaniki', mwana wamwa Falao, wayombaga ati', "U’sole mwana mwenu’yu' u’kanosezye, nanne ndaku’li’pe wu’tenensya wako." Hohene muki’ma mwenu’yu' wamusolaga mwana na ku’monsya.

10 Aho mwana waku’laga, nnina wamufili’laga mwaniki', mwana wamwa Falao, nawe wamusolaga av’e mwana wakwe. Mwaniki' mwenu’yo wayombaga, "Namufumizye mu minzi'," hohene wamupaga lina Mose.