Êxodo 2

Ku’v’yalwa kwamwa Mose

1 Wav’age ali’ho muntu' yu’mo wa igongo lya V’alawi, wamutoolaga muki’ma u’yo nawe wav’age wa igongo lya V’alawi. 2 Muki’ma mwenu’yo wav’aga na mwitungo, wipeku’laga mwana wa ki’gosya. Aho wawonaga ku’v’a mwana mwenu’yu' mukeke ali' musoga, wamuv’isaga ku' itungo lya myezi idatu'. 3 Ali’vi aho wawonaga ku’v’a akakowola ku’muv’isa ku' itungo ilihu, wasolaga ki’sege cha wu’loolo na ku’ki’v’ila lami. Haho wamutu’u’laga mwana mwenu’yo mu ki’sege, na waki’v’isaga hagati' na makumbo, ha ngiligili na mongo gwa Naili. 4 Ilu’mbu’ye na mwana mwenu’yo wiv’isaga bi’hi' na henanho, ki’gele awone ago gakamupandi’ka mudu’gu’ye.

5 Hohene mwaniki', mwana wamwa Falao, wakulumunkaga ku' mongo ku’ya ku’koga, na v’azya v’akwe v’av’aga v’ali’yu’mbayu’mba ha ngiligili na mongo. Haho mwaniki' mwenu’yo waki’wonaga ki’sege mu makumbo, na wamutu’maga muzya wakwe akaki’lete. 6 Waki’funduku’laga ki’sege, lingaga, wamuwonaga mwana mukeke ali’li’la! Wamusayi’laga na ku’yomba ati', "Mwenu’yu' ali' yu’mo mugati' na v’ana v’a Ki’ebulania."

7 Hene haho ilu’mbu’ye na mwana mwenu’yo wifumbu’laga, na wamuwu’zyaga mwaniki', mwana wamwa Falao, ati', "Vihe, nje nkaku’koov’ele wa ku’konsezya mwana mugati' na v’aki’ma v’a Ki’ebulania?" 8 Mwaniki' mwenu’yo wasu’v’yaga ati', "Ee, yaga." Hohene ilu’mbu’ye na mwana mwenu’yo wayaga na wamuletaga nnina. 9 Haho mwaniki', mwana wamwa Falao, wayombaga ati', "U’sole mwana mwenu’yu' u’kanosezye, nanne ndaku’li’pe wu’tenensya wako." Hohene muki’ma mwenu’yu' wamusolaga mwana na ku’monsya.

10 Aho mwana waku’laga, nnina wamufili’laga mwaniki', mwana wamwa Falao, nawe wamusolaga av’e mwana wakwe. Mwaniki' mwenu’yo wayombaga, "Namufumizye mu minzi'," hohene wamupaga lina Mose.

Mose ali’peelela ku' Midiani

11 Aho Mose wav’aga muntu' muhanya, lu’siku' lu’mo ndi' waya ku’kav’asu’u’la V’aebulania v’iye, na ku’wona mili’mo zyav’o zya wu’sese. Wamuwonaga Mumisili yu’mo, ali’mugu’ma Muebulania yu’mo mugati' na v’adu’gu’ye. 12 Hohene Mose walingaga u’ku' na u’ko akawine muntu'. Wamugu’maga na wamuwu’lagaga Mumisili mwenu’yo na wamufuli’i’laga mu musengasenga. 13 Wangalu’ke Mose wafumaga hangi', lingaga, wav’awonaga V’aebulania v’av’i’li' v’ali’wigu’ma! Hohene wamuwu’zyaga wa ku’mulev’a mwiye ati', "Ku' ki' u’li’mugu’ma Muebulania mwiyo?" 14 Nawe wasu’v’yaga ati', "Ali' nde wakaku’tu’u’la ev’e ku’v’a mutemi na muyangu’zi wiswe? Vihe, u’li’koov’a ku’mbu’laga ki’ti' i’vyo wakamuwu’lagaga u’yo Mumisili?" Haho Mose wogohaga muno, na wiganikaga ati', "Kasinaga igambo lyeni’li' lyamanyi’kaga!" 15 Falao aho wigagwa mmola zyeni’zyo wakoov’aga ku’muwu’laga Mose. Ali’vi Mose wamupeelaga Falao, na wayaga ku’kav’ezya wikalo wakwe ku' nsi' ya Midiani.

Lu’siku' lu’mo, Mose wav’age ikalile ha mpelo ya lwinzi'. 16 Hohene v’aniki' mupungati', v’ana v’a muhozya wa ku' Midiani, nav’o v’afikaga henanho, v’adahaga minzi', na v’okazyaga mu mapango ki’gele v’azinywisye nkolo na mbu’li zyamwa sav’o. 17 V’adi’mi v’angi' v’izaga henanho na ku’v’asaga v’aniki' v’enav’o. Ali’vi Mose wawu’kaga na ku’v’agwasya v’aniki', na wazinywisyaga minzi' mitugo zyav’o. 18 V’aniki' v’enav’o aho v’asu’v’aga ku' lu’go, sav’o Leueli, ku' lina li’ngi' Yetilo, wav’awu’zyaga, "Yav’aga vihe walelo mwangu’ha ku’su’v’a?" 19 Nav’o v’asu’v’yaga ati', "Mumisili yu’mo waku’kwasyaga ku’ku’fumya mu makono ga v’adi’mi v’enav’o. Kasinaga muntu' mwenu’yo wadahaga minzi' na ku’zinywisya mitugo ku’nguno yiswe!" 20 Sav’o wav’awu’zyaga v’aniki' v’enav’o ati', "Ali' ku’he muntu' mwenu’yo? Ku' ki' mwamuleka kwenu’ko? Mwitani ize alye ki’liwa."

21 Mose wazumyaga kwikala ha muntu' mwenu’yo. Hohene, muntu' mwenu’yo wamupaga Mose mwaniki', lina lyakwe Zipola, av’e muki' wakwe. 22 Zipola wamuv’yali’laga mwana wa ki’gosya, nawe Mose wamwitanaga lina Geleshomu*2:22 Lina "Geleshomu" ku' Ki’ebulania likolile na muhayo "mugeni mwizi’li’zi kwenu’ko.", na ku’yomba, "Nav’aga mugeni mwizi’li’zi mu nsi' ya wu’geni."

Ki’li’lo cha V’aizilaeli ku' nsi' ya wu’sese

23 Aho lyav’i’taga itungo ilihu, mutemi wa Misili wagulalaga.

V’aizilaeli v’ali’laga ku' wu’satu wu’hanya ku’nguno v’akoov’age wu’gwasya ku' wu’sese wav’o, na ki’li’lo chav’o chamufiki’i’laga Mulungu. 24 Mulungu wigagwa ki’li’lo chav’o, walawagwa ilagano i’lo walagana ku’mwa Abalahamu, Isaka na Yakobo. 25 Ku’nguno yeni’yo, Mulungu wav’awonaga V’aizilaeli na wav’asayi’laga.