1 Hangi' Gu’ku' Mulungu wamuwi’laga Mose ati', "I’li' hu' igambo i’lo u’lav’av’ezezye Aloni na v’ana v’akwe v’a ki’gosya ku' ku’v’asondohya ki’gele v’antu’mami’le ku' muli’mo gwa wu’hozya: U’lasole ng’ombe nzagamba yi’mo na ng’ondi iv’i’li' i’zyo zili' wu’du’hu' wu’lema, 2 haki’mo na migate zya mikoli idatu' i’zyo zikatumba: migate i’zyo zikaseleganiwa maguta, migate zya wu’seleganiwe na maguta ga muzeituni na migate milelemazu zya wu’v’ilwe maguta. Zyose zyeni’zyo ziv’e ziv’eziv’ilwe ku' wu’fuma wu’nelezu wa ngano. 3 Nanho u’lazitu’u’le zyeni’zyo migate mu ki’sege ki’mo, na ku’nfumi’zya haki’mo na i’zyo ng’ombe nzagamba na ng’ondi iv’i’li'.

4 "Hangi' u’lamulete Aloni haki’mo na v’ana v’akwe bi’hi' na wingi’li’lo wa Ihema lya Ku’sangi’zya, na ku’v’akusa ku' minzi'. 5 U’lasole vizwalo i’vyo vya ki’hozya na ku’muzwi’ka Aloni nhanzo, ijoho lya ku’zwali’la ki’zibao, ki’zibao, kamufuko ka ha ki’kuv’a, na ku’mutunga mukwato gwa ki’zibao gwa wu’lembwe mu muki’mbi’li'. 6 Hangi' u’lamutunge isimangi’la ku' mutwe, na ku’tunga ndezi nsondo ha igu’lya na lyeni’lo isimangi’la ku' lwandi' lwa ku' mbele. 7 Aho u’lav’e wamali’la ku’v’ezya vyeni’vyo, u’lasole ago maguta ga ku’v’ila, u’mwiti’li’le Aloni ku' mutwe gwakwe na ku’musondohya. 8 Hangi' u’lav’alete v’ana v’amwa Aloni, na u’v’azwi’ke nhanzo. 9 U’lav’atunge mikwato mu miki’mbi’li' na ku’v’azwi’ka nkofila zyav’o. Aloni haki’mo na v’ana v’akwe v’av’e v’ahozya ku' nhama ya nhananhana. I’vi hu' vyene u’lav’asimi’ke ku' muli’mo gwa wu’hozya.

10 "Hangi' u’layi’lete i’yo ng’ombe ha mbele ya Ihema lya Ku’sangi’zya. Aloni na v’ana v’akwe v’alatu’u’le makono gav’o ha igu’lya na mutwe gwa ng’ombe yeni’yo. 11 Haho u’layi’si’nze ha mbele yamwa Gu’ku' Mulungu, bi’hi' na wingi’li’lo wa Ihema lya Ku’sangi’zya. 12 U’lasole lwandi' lwa magazi ga ng’ombe yeni’yo na u’v’ile ku' mapembe ga ihozezyo lyeni’lo ku' lyala lyako, na magazi ago galasigali’le u’lagiti’le ha lwandi' lwa ha nsi’li’li' ya ihozezyo. 13 Hangi' u’lasole lu’sasa lose na lwandi' lu’soga lwa iti’ma, haki’mo na nfigo iv’i’li' na maguta gazyo, u’lavitime vyose ha igu’lya na ihozezyo. 14 Ali’vi nyama ya ng’ombe yeni’yo, haki’mo na ndi’li' na wu’se wayo, u’lavisole na ku’vitima ha ibala na nkambi' yinywe. Cheni’cho ki’lav’e ki’taambo cha ku’sini’zya wu’kenagu’zi.

15 "Hangi' u’lasole ng’ondi yi’mo mugati' na i’zyo ng’ondi, na Aloni haki’mo na v’ana v’akwe v’alatu’u’le makono gav’o ha igu’lya na mutwe gwayo. 16 U’layi’si’nze ng’ondi yeni’yo, na u’lasole magazi gayo na ku’ganyanyagi’la ku' ki’la lwandi' lwa ihozezyo lyeni’lo. 17 Hangi' u’layi’tambagu’zye yeni’yo ng’ondi mamonke mamonke, na u’kuse wu’la haki’mo na magu’lu' na vikono vyayo, u’vitu’u’le vyose haki’mo na mutwe na viv’alango vingi'. 18 Nanho u’lavizigye vyeni’vyo viv’alango vyose vya ng’ondi yeni’yo ha igu’lya na ihozezyo ku’v’a ki’taambo cha ku’zigya ku’mwa Gu’ku' Mulungu. Kenako kali' kalu’mbi’lo ka ku’zigya ako kali' na wu’motu wa ku’mutogezya Gu’ku' Mulungu.

19 "Hangi' u’layi’sole i’yo ng’ondi ya wu’v’i’li', na Aloni haki’mo na v’ana v’akwe v’alatu’u’le makono gav’o ha igu’lya na mutwe gwayo. 20 Haho u’layi’si’nze, na ku’sola magazi madoo na ku’gav’ila ku' nsoto zya matwi ga mulyi’la gamwa Aloni haki’mo na v’ana v’akwe, na ku' mankumwa ga makono gav’o ga mulyi’la, na ku' mankumwa ga magu’lu' gav’o ga mulyi’la. Magazi ago galasigali’le u’laganyanyagi’le ku' ki’la lwandi' lwa ihozezyo. 21 Hangi' u’lasole lwandi' lwa magazi ago gali' ha igu’lya na ihozezyo haki’mo na ago maguta ga ku’v’ila, na u’lamunyanyagi’le Aloni na vizwalo vyakwe. Hangi' u’lav’anyanyagi’le v’ana v’akwe haki’mo na vizwalo vyav’o. Haho Aloni haki’mo na v’ana v’akwe v’alav’e v’asondo ku' wanne, haki’mo na vizwalo vyav’o vyose.

22 "Hangi' u’lasole maguta ga i’yo ng’ondi: muki’la gwayo haki’mo na maguta gago, lu’sasa, lwandi' lu’soga lwa iti’ma, nfigo iv’i’li' na maguta gazyo, haki’mo na itango lya ku' mulyi’la. Ku’nguno ng’ondi yeni’yo yi’li' ya ku’v’asimi’ki’la ku' muli’mo gwa wu’hozya. 23 U’lasole na migate i’zyo zikatumba. Ku’fuma ku' ki’sege i’cho ki’li' ha mbele yamwa Gu’ku' Mulungu u’lasole mugate gu’mo u’go gu’kaseleganiwa na maguta, na mugate gu’mo gwa wu’seleganiwe na maguta ga muzeituni, na mugate mulelemazu gu’mo. 24 Vyose vyeni’vi u’lavitu’u’le mu makono gamwa Aloni haki’mo na v’ana v’akwe, nav’o v’alaviwu’sye viv’e lu’manyi’lo lwa ku’nfumi’zya kalu’mbi’lo ene Gu’ku' Mulungu. 25 Hangi' u’lavisole vintu' vyeni’vyo ku’fuma mu makono gav’o, na ku’vizigya ha igu’lya na ihozezyo haki’mo na i’yo ng’ondi ya ki’taambo cha mbele. Kenako kali' kalu’mbi’lo ka ku’zigya ako kali' na wu’motu wa ku’mutogezya Gu’ku' Mulungu.

26 "Hangi' u’lasole ki’dali cha yeni’yo ng’ondi ya ku’musimi’ki’la Aloni, na ku’ki’wu’sya ki’v’e lu’manyi’lo lwa ku’nfumi’zya kalu’mbi’lo ene Gu’ku' Mulungu. Nacho ki’lav’e ifungu lyako. 27 Nanho u’visondohye ki’dali i’cho chawu’siv’agwa na itango i’lo lyafumiv’agwa lya yeni’yo ng’ondi ya ku’v’asimi’ki’la, na vyeni’vyo vilav’e vyamwa Aloni na v’ana v’akwe. 28 Nsiku' zyose yi’lav’e nhama ku' V’aizilaeli ku’fumya ifungu lyeni’li' ku’fuma ku' vitaambo vya kwiswanania ku’nguno yamwa Aloni na v’ana v’akwe. Ifungu lyeni’li' li’lav’e kalu’mbi’lo kav’o ku’mwa Gu’ku' Mulungu.

29 "Aho alav’e wagulala Aloni, vizwalo vyakwe visondo v’alapiwe v’av’yalwa v’akwe, nav’o v’alavizwale lu’siku' lwav’o lwa ku’v’ilwa maguta na ku’simi’kwa ku' muli’mo gwa wu’hozya. 30 Mwana wamwa Aloni u’yo alav’e muhozya ha lwandi' lwamwa ise, na kwingi’la mu Ihema lya Ku’sangi’zya ku’tu’mama ha Hantu' Hasondo, alavizwale vizwalo vyeni’vyo nsiku' mupungati'. 31 Nanho u’layi’sole nyama ya yeni’yo ng’ondi ya ku’v’asimi’ki’la, na ku’yi’tekela mugati' na lu’gu’tu' lwa Ihema Isondo. 32 Aloni na v’ana v’akwe v’alayi’lye i’yo nyama ya ng’ondi, na migate i’zyo zili' mu ki’sege aho ha mbele ya wingi’li’lo wa Ihema lya Ku’sangi’zya. 33 V’alavilye vintu' vyeni’vyo i’vyo vitu’mamile ku' wu’swanano itungo lya ku’v’asimi’ka na ku’v’asondohya ku’nguno ya muli’mo gwa wu’hozya. Ali’vi muntu' yu’ngi' ku’du' avilye ku’nguno vili' visondo. 34 U’lu' yav’a nyama ninga yi’mo ya yeni’yo ng’ondi i’yo yatu’mamile ku' ku’v’asimi’ki’la ninga mugate gu’mo i’vyo vilasigali’le mpaka ndiyu', vilatimwe. I’vyo vyasigali’lile vikasye viliwe ku’nguno vili' vintu' visondo.

35 "Vyeni’vyo hu' i’vyo u’lav’av’ezezye Aloni na v’ana v’akwe, ku’londana na gose ago naku’lagi’li’zizye. U’ladime itungo lya nsiku' mupungati' zya ku’v’asimi’ka ku' muli’mo gwa wu’hozya. 36 Ki’la lu’siku' u’lav’e u’li’fumya ng’ombe nzagamba yi’v’e ki’taambo cha ku’sini’zya wu’kenagu’zi, ki’gele ku’v’ezya wu’swanano. Ku' ku’v’ezya vyeni’vyo u’lali’sondohye ihozezyo, na ku’li’v’ila maguta ki’gele li’v’e isondo. 37 Ku' nsiku' mupungati' u’lali’v’ezezye wu’swanano ihozezyo na ku’li’sondohya. Ku’nguno yeni’yo, ihozezyo li’lav’e isondo muno, na ki’la ki’ntu' i’cho ki’lali’kuumye ki’lav’e ki’sondo.

38 "Hohene ki’taambo i’cho u’lav’e u’li’fumya ha igu’lya na ihozezyo ki’la lu’siku' ki’lav’e i’vi: tu’di’lana tu’v’i’li' twa nkolo u’to tu’li' na musimo gwa mwaka gu’mo. 39 Kadi’lana kamo u’lakafumye ki’taambo ndiyu', na kangi' mpi’ndi'. 40 Haki’mo na kadi’lana ka kwandya, u’lafumye kilo yi’mo ya wu’fuma wu’nelezu u’wo wu’seleganiv’ilwe na nsu’pa yi’mo ya maguta masoga, na ku’pu’ngu’li’la nsu’pa yi’mo ya ki’neneko ku’v’a kalu’mbi’lo. 41 Kenako kadi’lana kangi' u’lakafumye ki’taambo ha itungo lya mpi’ndi', haki’mo na kalu’mbi’lo ka mbutoo na ka ki’neneko, ki’ti' i’vyo wav’ezyaga ndiyu'. Kenako kali' kalu’mbi’lo ka ku’zigya ako kali' na wu’motu wa ku’mutogezya Gu’ku' Mulungu. 42 Ku' wu’v’yalwa u’wo wu’lalonde yi’lav’e ki’ti’le ku’fumya ki’taambo cheni’chi' cha ku’zigya bi’hi' na wingi’li’lo wa Ihema lya Ku’sangi’zya ha mbele yanne, ene Gu’ku' Mulungu, aho ndav’e nu’poma na inywe na ku’yomba na inywe. 43 Henanho haho ndav’e nu’poma na V’aizilaeli, na lu’kumo lwanne lu’lahav’ezye hose hav’e hasondo. 44 Nanne ndali’sondohye Ihema lya Ku’sangi’zya haki’mo na ihozezyo, nanne ndamusondohye Aloni haki’mo na v’ana v’akwe, ki’gele v’antu’mami’le ene ku' muli’mo gwa wu’hozya. 45 Ndav’ezye wikalo mugati' na V’aizilaeli, na ku’v’a Mulungu wav’o. 46 Nav’o v’alamanye ku’v’a ene hu' ni' Gu’ku' Mulungu, Mulungu wav’o, u’yo wav’afumizye ku' Misili ki’gele mbezye wikalo mugati' nav’o. Ene hu' ni' Gu’ku' Mulungu, Mulungu wav’o."