Êxodo 3

Mulungu ali’mwitana Mose

1 Lu’siku' lu’mo, Mose wav’age ali’di’ma idale lya nkolo na mbu’li zyamwa Yetilo, mukwiye, muhozya wamwa Gu’ku' Mulungu wa ku' nsi' ya Midiani. Mose wazifilaga mitugo ku’tali' ku' mpilimo na ibalangu', na walu’fiki’laga lu’gu’lu' lwa Holebu, lu’gu’lu' lwa Mulungu. 2 Kwenu’ko malaika wamwa Gu’ku' Mulungu wamwifumi’i’laga Mose ku' ilambi' lya moto hagati' na isaka. Mose walingaga na wakumyaga ku’wona isaka li’li’v’aka moto ali’vi li’kav’ile ku’ziga. 3 Hohene wiyombelaga, "Gwenu’gu' mugaka, isaka ku’v’aka moto ninga ku’ziga ng’o! Leka ngalu’ke ndinge visoga."

4 Gu’ku' Mulungu aho wawonaga ku’v’a Mose wagalu’kaga ki’gele alinge, wamwitanaga ku’fuma mu isaka ati', "Mose! Mose!" Nawe Mose witawu’kaga, "Kalame! Ene aha!" 5 Mulungu wamuwi’laga ati', "Ku’du' wegele bi’hi'. Zula vilatu' vyako, ku’nguno henanha wi’mile u’tov’ile lwandi' lwa nsi' nsondo." 6 Hangi' Mulungu wamuwi’laga ati', "Ene ni' Mulungu wamwa so, Mulungu wamwa Abalahamu, Isaka na Yakobo." Mose wikumbi’laga wu’syu' wakwe ku’nguno wogohaga ku’mulinga Mulungu.

7 Gu’ku' Mulungu wamuwi’laga, "Nhana nalu’wonaga lu’duko lwa v’antu' v’anne ku' Misili. Nigagwa ki’li’lo chav’o ku’nguno ya v’i’mi’li’zi v’av’o. Nanne manyile makoye gav’o, 8 hohene nasookaga ki’gele mbapi’zye ku’fuma mu makono ga V’amisili. Ndav’afumye mu nsi' yeni’yo na ku’v’afila ku' nsi' nsoga na nhanya, nsi' ya lu’tongo i’yo yi’li’keneneka mav’eele na wu’ki', nsi' ya V’akanaani, V’ahiti, V’aamoli, V’apelizi, V’ahivi na V’ayebusi. 9 Gi’si' ki’li’lo cha V’aizilaeli chanfiki’i’laga, nhana, nanne nawonaga i’vyo V’amisili v’ali’v’apa lu’duko. 10 Hohene gi’si' nu’ku’tu’ma ku’mwa Falao, ki’gele u’kav’asinie v’antu' v’anne, V’aizilaeli, ku’fuma mu nsi' ya Misili."

11 Ali’vi Mose wasu’v’yaga, "Ene ni' nde, ninga muyi’le Falao na ku’v’asinia V’aizilaeli mu Misili?" 12 Mulungu wamuwi’laga ati', "Ene nku’v’a haki’mo nanho. Aho u’lav’e wav’afumya v’antu' mu Misili, mulanisenge ene Mulungu winywe mu lu’gu’lu' lwenu’lu'. Igambo lyeni’li' li’ku’v’a lu’manyi’lo ku' wako ku’v’a ene hu' nku’tu’mile."

13 Mose wamuwu’zyaga Mulungu, "Gi’si' u’lu' nav’ayi’la V’aizilaeli na ku’v’awi’la ati', ‘Mulungu wa v’agu’ku' v’inywe wantu’maga ku' winywe,’ nav’o u’lu' v’ambu’zye, ‘Lina lyakwe nde?’ Nku’v’awi’la ki'?" 14 Mulungu wasu’v’yaga ku’mwa Mose ati', "Ene Ni’ho U’yo Ni’ho. Vyene u’lav’awi’le V’aizilaeli, ‘U’yo ali’witanwa Ene Ni’ho, mwene wantu’maga ku' winywe.’ " 15 Hangi' Mulungu wamuwi’laga Mose ati', "V’awi’le V’aizilaeli ati', ‘Gu’ku' Mulungu*3:15 Lina "Gu’ku' Mulungu" ku' Ki’ebulania li’li' lina "Yahweh" ninga "Yehova." , Mulungu wa v’agu’ku' v’inywe, Mulungu wamwa Abalahamu, Isaka na Yakobo, wantu’maga ku' winywe.’ Lyeni’li' hu' lina lyanne nhananhana, li’li' lina lya ku’nizu’ki’la ku' wu’v’yalwa wose. 16 Yaga u’kav’akunganie v’anamala v’a Izilaeli, u’v’awi’le ati', ‘Gu’ku' Mulungu, Mulungu wa v’agu’ku' v’inywe, Mulungu wamwa Abalahamu, Isaka na Yakobo, wanifumi’i’laga na ku’mbwi’la ati', "Nakamwikomya na ku’wona i’vyo muli’v’eziwa mu nsi' ya Misili. 17 Nu’lagana ku’v’a ndamufumye mu lu’duko lwinywe kwenu’ko ku' Misili, na ku’mufila ku' nsi' ya makabi’la ga V’akanaani, V’ahiti, V’aamoli, V’apelizi, V’ahivi na V’ayebusi, ku' nsi' ya lu’tongo i’yo yi’li’keneneka mav’eele na wu’ki'." ’

18 "V’anamala v’a Izilaeli v’alaku’degeleke. Hangi' ev’e na v’anamala mulaye ku' mutemi wa Misili na ku’muwi’la, ‘Gu’ku' Mulungu, Mulungu wa V’aebulania, wakwifumi’i’laga. U’ku’zumi’zye ku’yu’mbe musi’nzo gwa nsiku' idatu' mu ibalangu', ki’gele ku’kamufumi’zye ki’taambo Gu’ku' Mulungu, Mulungu wiswe.’ " 19 Hangi' Mulungu wayombaga, "Ali’vi manyile ku’v’a mutemi wa Misili akasye amuzumi’zye ku’ya, sumbwa ku' mukono gwanne gwa nguzu gu’mugahani’zye. 20 Ku’nguno yeni’yo ndawu’sye mukono gwanne na ku’yi’gu’ma Misili ku' migaka zyanne mingi i’zyo ndav’ezye kwenu’ko. Haho mutemi alamuzumi’zye ku’wu’ka. 21 Hangi' ndav’av’ezye V’amisili v’av’e na moyo gwa wu’hegela ku' V’aizilaeli, na aho mulav’e muli’wu’ka mukasye muwu’ke makono du'. 22 Ki’la muki’ma Muebulania alamulombe muzenganwa wakwe Mumisili, ninga muki’ma u’yo ikalile mu lu’go lwakwe, amupe vintu' vya mupango vya mawe ga feza na zahabu haki’mo na myenda. Vintu' na myenda zyeni’zyo mulav’azwi’ke v’ana v’inywe v’a ki’gosya na v’a ki’ki’ma. I’vi hu' vyene mulavisampe vintu' vya V’amisili."