Êxodo 37

Ku’v’ezya isandi’ko lya wu’sangi’lwa

1 Bezaleli wav’ezyaga isandi’ko lya mbawo zya mugu’nga. Wu’lihu walyo wav’age sentimita igana li’mo na iku’mi, wu’gali’nhu sentimita maku’mi mukaga na mukaga, na wi’i’ma walyo sentimita maku’mi mukaga na mukaga. 2 Wali’kumbi’laga zahabu nsoso mugati' na ha ibala, na ku’li’pilimya lu’ki’go lwa zahabu ki’la lwandi'. 3 Hangi' wasulaga pete ine zya zahabu, na ku’zitunga ku' magu’lu' galyo ane, pete iv’i’li' lwandi' lu’mo na pete iv’i’li' lwandi' lwa wu’v’i’li'. 4 Wav’ezyaga na miti' iv’i’li' zya mugu’nga na ku’zikumbi’la zahabu. 5 Nawe waziswekaga zyeni’zyo miti' ku' pete i’zyo zyav’age mu mbazu zya isandi’ko, ku’nguno ya ku’li’sombela. 6 Wav’ezyaga nfundi' ya wu’swanano ku' zahabu nsoso, wu’lihu wayo wav’age sentimita igana li’mo na iku’mi, na wu’gali’nhu wayo sentimita maku’mi mukaga na mukaga. 7 Hangi' wav’ezyaga masu’mbano av’i’li' ga wikole na v’amalaika v’akelubi ku' zahabu i’yo yi’sulilwe ku' nnundo, na ku’gatu’u’la ku' ki’la mpelo ya nfundi', 8 isu’mbano li’mo ku' mpelo yi’mo, na isu’mbano li’ngi' ku' mpelo ya wu’v’i’li'. Wagatu’u’laga masu’mbano genago ku’v’a ki’ntu' ki’mo na yeni’yo nfundi' ku' mpelo zyose iv’i’li'. 9 Masu’mbano genago gav’age ganzile manana gago ku' igu’lya, na ku’yi’kumbi’la nfundi', nago gav’age gilolile ku’no gayi’dolekile nfundi'.

Ku’v’ezya meza ya migate misondo

10 Vyene vivyo wav’ezyaga meza ya mbawo zya mugu’nga. Wu’lihu wayo wav’age sentimita maku’mi munane na munane, wu’gali’nhu wayo sentimita maku’mi ane na ine, na wi’i’ma wayo sentimita maku’mi mukaga na mukaga. 11 Meza yeni’yo wayi’kumbi’laga zahabu nsoso, na ku’yi’pilimi’zya lu’ki’go lwa zahabu ki’la lwandi'. 12 Hangi' wayi’v’ezezyaga kalu’bawo na ku’yi’pilimi’zya meza ki’la lwandi' na wakapilimi’zyaga lu’ki’go lwa zahabu. Kalu’bawo kenako kav’age na wu’gali’nhu wa sentimita munane. 13 Wasulaga pete ine zya zahabu ku’nguno ya meza yeni’yo, na ku’zizwi’ka ku' ki’la mugu’lu' gwa meza yeni’yo. 14 Pete zyeni’zyo wazitu’u’laga bi’hi' na ako kalu’bawo, ki’gele ziv’e hu' ha ku’dimi’zya i’zyo miti' zya ku’yi’sombela meza. 15 Wav’ezyaga miti' zya mugu’nga zya ku’yi’sombela meza, na ku’zikumbi’la zahabu. 16 Hangi' wav’ezyaga viseme ku' zahabu nsoso vya ku’tu’u’la ha igu’lya na meza: sahani na tu’viseme ku’nguno ya wu’bani, na vikombe na mabakuli ku’nguno ya ku’pu’ngu’li’la kalu’mbi’lo ka ki’neneko.

Ku’v’ezya ki’nala cha ku’tu’u’li’la tala

17 Wav’ezyaga ki’nala cha ku’tu’u’li’la tala ku' zahabu nsoso i’yo yi’sulilwe ku' nnundo. Kikali’lo chacho, kamuti' kacho, vikombe vyacho, magundo gacho na mauwa gacho, vyose vyav’aga ki’ntu' ki’mo. 18 Matambi' mukaga gafumi’laga mu mbazu zyacho, matambi' adatu' lwandi' lu’mo na matambi' adatu' lwandi' lwa wu’v’i’li'. 19 Ku' ki’la itambi' mugati' na genago mukaga kwav’age na vikombe vidatu' vya wikole na malawu' ga muti' gwa mulozi, ki’la ki’mo na magundo gacho na malawu' gacho. 20 Ku' kamuti' vyav’age vili’ho vikombe vine i’vyo viv’eziv’ilwe ku' wikole wa malawu' ga mulozi, haki’mo na magundo gavyo na malawu' gavyo. 21 Ki’la lwandi' u’lo lwafumi’i’laga matambi' av’i’li', ha nsi’li’li' yaho hav’aga na igundo li’mo li’mo. 22 Magundo genago na matambi' gago gav’age ki’ntu' ki’mo na cheni’cho ki’nala cha ku’tu’u’li’la tala, na vyose vyav’age vya zahabu nsoso i’yo yi’sulilwe ku' nnundo. 23 Wav’ezyaga tala mupungati', mikasi zya ku’gelani’zi’zya wu’tambi', haki’mo na sahani zyayo ku' zahabu nsoso. 24 Watu’mi’laga kilo maku’mi adatu'*37:24 Kilo maku’mi adatu' na itano ku' Ki’ebulania yi’li' talanta yi’mo. na itano zya zahabu nsoso ku’v’ezezya ki’nala cha ku’tu’u’li’la tala haki’mo na vilwani’lo vyacho vyose.

Ku’v’ezya ihozezyo lya ku’zuki’zi’zya wu’vumba

25 Hangi' wav’ezyaga ihozezyo lya ku’zuki’zi’zya wu’bani ku' mbawo zya mugu’nga. Ihozezyo lyeni’lo lyav’age lya mugelani’lo, wu’lihu na wu’gali’nhu walyo sentimita maku’mi ane na itano, na wi’i’ma walyo sentimita maku’mi kenda. Mapembe galyo ga mu igu’lya gose gav’aga ki’ntu' ki’mo na ihozezyo lyeni’lo. 26 Nawe wali’kumbi’laga lyeni’lo ihozezyo ku' igu’lya na mu mbazu zyalyo haki’mo na mapembe galyo ku' zahabu nsoso, na wali’v’ezezyaga lu’ki’go lwa zahabu ku’li’pilima. 27 Hangi' wav’ezyaga pete iv’i’li' zya zahabu na ku’zitu’u’la ha nsi’li’li' na lu’ki’go mu mbazu zyalyo, ku' ki’la lwandi' pete yi’mo yi’mo, ku’nguno ya ku’dimi’li’la miti' itungo lya ku’li’somba. 28 Wav’ezyaga miti' iv’i’li' zya mugu’nga, na ku’zikumbi’la zahabu.

29 Hangi' wav’ezyaga maguta masondo ga ku’v’ila, na wu’bani wu’soga wa wu’motu, u’wo wu’seleganiv’ilwe ku' wu’tonto.