Levítico 17

Ki’si’nzi’le cha ndimu

1 Gu’ku' Mulungu wamuwi’laga Mose ati', 2 "V’awi’le Aloni, v’ana v’akwe haki’mo na V’aizilaeli v’ose ati', ‘U’gu' hu' mulagi' u’go walagi’li’zizye Gu’ku' Mulungu: 3 Ki’la Muizilaeli u’yo alasi’nze ki’taambo, ki’v’e cha ng’ombe, kadi’lana ka nkolo ninga mbu’li, mugati' na nkambi' ninga ha ibala na nkambi', 4 na aleke ku’ki’leta ha muzigo gwa Ihema lya Ku’sangi’zya ku’v’a kalu’mbi’lo ku’mwa Gu’ku' Mulungu ha mbele ya Ihema lyakwe Isondo, muntu' mwenu’yo alav’aziwe ku’v’a na musango gwa kwita magazi. Yi’lamudime akomwe na iv’ilingano lya V’aizilaeli. 5 Nhama yeni’yi' yi’li' ki’gele V’aizilaeli v’amuletele Gu’ku' Mulungu vitaambo vyav’o i’vyo v’ali’v’a v’ali’si’nzi’la mu migu’nda. Yi’li’v’adima v’av’e v’ali’vileta ku' v’ahozya, yaani ku’mwa Gu’ku' Mulungu, bi’hi' na wingi’li’lo wa Ihema lya Ku’sangi’zya, ki’gele v’avisi’nze viv’e vitaambo vya kwiswanania ku’mwa Gu’ku' Mulungu. 6 Nawe muhozya alaganyanyagi’le magazi gavyo ha igu’lya na ihozezyo lyamwa Gu’ku' Mulungu i’lo li’li' bi’hi' na wingi’li’lo wa Ihema lya Ku’sangi’zya, na ku’gazigya maguta gavyo, ki’gele gav’e wu’motu wa ku’mutogezya Gu’ku' Mulungu. 7 Ku’nguno yeni’yo V’aizilaeli v’alapele wu’li’ko ku’fumya vitaambo ku' vimbulimbuli vya mbu’li i’vyo v’ali’v’ezya navyo wu’lav’a. Yeni’yi' yi’ku’v’a nhama ya nhananhana ku' wu’v’yalwa wav’o u’wo wu’lalonde.’

8 "Nanho u’lav’awi’le ati', ‘Ki’la muntu' mugati' na V’aizilaeli, ninga mugati' na v’ageni v’izi’li’zi, u’yo alafumye ki’taambo cha ku’zigya ninga ki’taambo ki’ngi', 9 bila ku’leta ha wingi’li’lo wa Ihema lya Ku’sangi’zya, ki’gele ku’fumya ki’taambo ku’mwa Gu’ku' Mulungu, yi’lamudime muntu' mwenu’yo akomwe na iv’ilingano lya V’aizilaeli.

10 " ‘Hangi' muntu' ninga yu’mo mugati' na V’aizilaeli, ninga mugati' na v’ageni v’izi’li’zi, u’yo alalye nyama ya magazi ga ki’ntu' ninga ki’mo, ene ndamupe nkonya muntu' mwenu’yo na ku’mukoma na iv’ilingano lya V’aizilaeli. 11 Ku’nguno wu’zuwu’ku wa ki’tundwa wu’li' mu magazi nanne namulagi’li’zizye kwiti’la magazi ha igu’lya na ihozezyo ki’gele ku’v’ezya wu’swanano ku’nguno ya myoyo zinywe. Magazi gali’v’ezya wu’swanano ku’nguno wu’zuwu’ku wu’li' mu magazi. 12 Ku’nguno yeni’yo nu’v’alagi’li’zya V’aizilaeli i’vi: Muntu' ninga yu’mo mugati' nav’o, ninga mugati' na v’ageni v’izi’li’zi av’o v’ikalile nav’o, nhana ku’du' ize alye nyama ya magazi.

13 " ‘Ki’la muntu' mugati' na V’aizilaeli, ninga mugati' na v’ageni av’o v’ikalile nav’o, u’yo alav’ende ndimu ninga nnoni i’yo yi’zumi’ziv’ilwe ku’liwa, yi’li’mudima agite magazi na ku’gatuli’la ku' wu’longo. 14 Ku’nguno wu’zuwu’ku wa ki’la ki’tundwa wu’li' mu magazi gacho. Hene nav’alagi’li’zizye V’aizilaeli ati', nhana ku’du' mwize mulye nyama ya magazi ga ki’tundwa ninga ki’mo. U’yo alagalye yi’lamudime akomwe na iv’ilingano.

15 " ‘Hangi' ki’la muntu', av’e muv’anda ninga mugeni mwizi’li’zi, u’yo alalye nyama ninga yi’mo ya wifwi’le ninga i’yo yi’tandagu’lilwe na ndimu, yi’lamudime avikanze vizwalo vyakwe, na koga mu minzi', nawe alav’e na zoma mpaka mpi’ndi', haho alav’e wasosoka 16 Ali’vi u’lu' aleke ku’vikanza vizwalo vyakwe na koga, haho yi’lamudime ku’wu’somba wu’kenagu’zi wakwe.’ "