ମୁସ୍କୁପୁର୍ତି କାଦି ମାନ୍ନା ନି ପାଡ଼ୁକୁ
1 ଇୟାୱେନ୍କା ୱାର୍ ଏଲିମଦାନ୍ ସର୍ହାର୍, ମାରି ମିସର ଦେସ୍ତାନ୍ ଡ଼ିସ୍ତି ୱେନ୍କା ମାରିଉଣ୍ଡ୍ରି ଲେଜୁଦି ପନ୍ଦର ଦିନ୍ତୁ ଇସ୍ରାଏଲ ଲୋକୁ ୱିଜୁ ଏଲିମ ମାରି ସିନୟଦି ନାଣିମି ସିନ୍ ବାଡିଦୁ ଇତାର୍ । 2 ନାସ୍ତିୱାଲେ ଇସ୍ରାଏଲ ଲୋକା ୱିଜୁ ମଣ୍ତଲି ମୋସା ନି ହାରୋଣଦି ବିରୁଦ୍ଧତାନ୍ ଆୟା ବାଡିଦୁ ବାସେ କିତାର୍ । 3 ମାରି, ଇସ୍ରାଏଲ ଲୋକୁ ୱାରିଙ୍ଗ୍ ଇର୍ହାର୍, "ହାୟ୍, ହାୟ୍, ମାଡ଼ୁ ଏସ୍ତିୱାଲେ କାଣ୍ଡା ସାଟି ଲାକ୍ତୁ ବାସ୍ସ ମୋନ୍ ସାନ୍ତି ଆନେଣ୍ଡା ଉଣୁଜି ମାର୍ହାଟ୍, ନାସ୍ତିୱାଲେ ଜଦି ମାଡ୍ ମିସର ଦେସ୍ତୁ ସଦାପ୍ରବୁଦି କିୟୁଦୁ ସାତିକାମାନ୍ଧି । ମିର୍ ଇୟା ୱିଜୁ ମଣ୍ଡଲିଙ୍ଗା ବାଙ୍ଗାଁଦାନ୍ ସାପିସ୍ନି ଉଣ୍ତିଙ୍ଗ୍ ମାଙ୍ଗିଁ ସପ୍ସି ଇୟା ବାଲିବାଟାଦୁ ତାତିମାନିଦେର୍ ।" 4 ଆବେଟ୍ ସଦାପ୍ରବୁ ମୋସେଙ୍ଗ୍ ଇର୍ହାନ୍, "ସୁଡ଼ୁଆ, ନାନ୍ ମି ଉଣ୍ତିଙ୍ଗ୍ ବାଦ୍ଡ଼ଦାନ୍ କାଦି ଜିନିସ୍ ପିରୁ କିନା; ମାରି, ଲୋକୁ ଆତ୍ରେ ସଲ୍ସି ୱିଜୁଦିନ୍ ଅର୍ଲେଟି ଇସାବ୍ଦାନ୍ କାଦି ଉଣ୍ଡା କିନାର୍; ଆବେଟ୍ ୱାର୍ ମା ନିୟମ୍ ଇସାବ୍ଦାନ୍ ସାଲାନାର୍ ନୋ ସିଲେ, ମାଡ୍ ୱାରିଙ୍ଗ୍ ଇୟା ପରିକା କିନାଟ୍ । 5 ସୋ ଦିନ୍ତୁ ୱାର୍ ଆମାକା ତାନାର୍, ଆକା ୱାର୍ତିଙ୍ଗାଁ ଦିନାମି ଆମାକା ଉଣ୍ଡା କିନାର୍, ଆକା ଦୁଇ ଗୁଣୁ ଆନାତ୍ ।"
6 ଇୟାୱେନ୍କା ମୋଶା ମାରି ହାରୋଣ ଇସ୍ରାଏଲ ଲୋକାଙ୍ଗ୍ ଇର୍ହାର୍, "ପ୍ରବୁ ଜେ ମିଙ୍ଗିଁ ମିସରତାନ୍ ସପ୍ସି ତାତାନ୍, ଇୟାକା ମିର୍ ମିଲିମିଲିକା ନେସ୍ନିଦେର୍ । 7 ମାରି, ସାଲ୍ଦି ବେଡ଼ାଦୁ ପ୍ରବୁଦି ମହିମା ସୁଡ଼ୁନିଦେର୍; ଏନ୍ଦାଇର୍ରିଙ୍ଗ୍ ପ୍ରବୁଦି ବିରୁଦ୍ଦାନ୍ ମି ୱାର୍ଗିନିକା ୱାନ୍ ୱେନାନ୍; ନାନ୍ ଏନ୍ ଜେ, ମିର୍ ମା ବିରୁଦ୍ଦାନ୍ ବାସେ କିନିଦେର୍ ?" 8 ମାରି ମୋଶା ଇର୍ହାନ୍, ସଦାପ୍ରବୁ ମିଲିମିଲିକା ଆନିୱାଲେ ଉଣି ଉଣ୍ତିଙ୍ଗ୍ ମିଙ୍ଗିଁ କାଣ୍ଡା ସିନାନ୍ ମାରି ସାଲ୍ଦି ବେଡ଼ାଦୁ ପଟା ପାଜ୍ନି ସାନ୍ଧି କାଦି ସିନାନ୍; ସଦାପ୍ରବୁଦି ବିରୁଦ୍ଦାନ୍ ମି ୱାର୍ଗିନିକା ୱାନ୍ ୱେନାନ୍; ମାଡ୍ ଏର୍ ? ମା ବିରୁଦ୍ତାନ୍ ସିଲେ, ମାତର ସଦାପ୍ରବୁଦି ବିରୁଦ୍ଦାନ୍ ମି ଆନାତ୍ । 9 ମାରି ମୋଶା ହାରୋଣଙ୍ଗ୍ ଇର୍ହାନ୍, "ନିନ୍ ଇସ୍ରାଏଲ ଲୋକା ୱିଜୁ ମଣ୍ଡଲିଙ୍ଗା ଇନ୍ଆ, ମିର୍ ସଦାପ୍ରବୁଦି ଆଗ୍ଡ଼ି ରାଦୁ, ୱାନ୍ ମି ୱାର୍ଗିନିକା ୱେନାନ୍ ।" 10 ଆବେନୁ ହାରୋଣ ଇସ୍ରାଏଲ୍ ଲୋକାଦି ୱିଜୁ ମଣ୍ଡଲିଙ୍ଗା ଇୟାକା ଇନି ୱେଡ଼ାଦୁ ୱାର୍ ବାଲିବାଟାଦୁ ତରିନ୍ ସୁଡ଼ୁତାର୍, ସୁଡ଼ୁଦୁ, ବାଦ୍ଡ଼ଦୁ ସଦାପ୍ରବୁ ଜାୟ୍ ତରିତାତ୍ । 11 ମାରି ସଦାପ୍ରବୁ ମୋସେଙ୍ଗ୍ ଇର୍ହାନ୍, 12 "ମାପ୍ ଇସ୍ରାଏଲ ଲୋକାଦି ୱାର୍ଗିନିକା ୱେର୍ଆମାନା; ନିନ୍ ୱାରିଙ୍ଗ୍ ଇନ୍ଆ, ମିର୍ ମିଲ୍ମିଲିକା ବେଡ଼ାଦୁ କାଣ୍ଡା ତିନିଦେର୍ ମାରି ସାଲ୍ଦି ବେଡ଼ାଦୁ ଆନାମ୍ ଉଣିଜି ପଟା ପାଜ୍ନିଦେର୍; ଆବେନୁ ମାପ୍ ଜେ ମି ସଦାପ୍ରବୁ ମାପୁରୁ ଆକା ମିର୍ ନେସ୍ନିଦେର୍ ।" 13 ୱେଡ଼ା ଆନି ବେଡ଼ାଦୁ ପୁଡ଼ୁକୁ ପଟିଙ୍ଗ୍ ୱାଜି ଗୁଡ଼ା ମୁସୁକୁ ବର୍ତି ବାସ୍ତେ, ମାରି ସାଲ୍ଦି ବେଡ଼ାଦୁ ରେକାମ୍ଦି ସାରିବେଡ଼୍ତି ମାସୁ ୱାକ୍ତାତ୍ । 14 ଇୟାୱେନ୍କା ଆର୍ତି ମାସୁ ଇମିତିଙ୍ଗ୍ ବୁମିଦୁ ମାସୁ ୱାଜା ଗୁଡ଼ୁବେଲିଦି ଇସ୍ରି ଜିନିସ୍ ବାଲିବାଟା ମୁସୁକୁ ଆର୍ଜି ମାର୍ହାତ୍ । 15 ମାରି ଇସ୍ରାଏଲ ଲୋକୁ ଆକା ସୁଡ଼ୁଜି ନିଜେ ନିଜେ ଇର୍ହାର୍, ଇୟାକା ଇନିକା ? ଇର୍ରିଙ୍ଗ୍ ଆକା ଇନିକା ମାର୍ହାତ୍, ୱାର୍ ନେସ୍ଏତାର୍ । ଆବେଟ୍ ମୋସା ଇର୍ହାନ୍, ଇୟାକା ମି ଉଣି ଉଣ୍ତିଙ୍ଗ୍ ସଦାପ୍ରବୁଦି ଆନାମ୍ । 16 ଇୟା ବିସୟ୍ଦାନ୍ ସଦାପ୍ରବୁ ଇର୍ହାମାନାନ୍, ମିର୍ ୱିଜେରେ ନିଜେ ନିଜେଦି ଉଣି ଶାକ୍ତି ବୁଜାଜି ଆକା ଉଣ୍ଡା କିଦୁ; ମିର୍ ୱିଜୁ ଲୋକ୍ ନିଜେ ନିଜେଦି ଗୁଡ଼ାଦି ଲୋକା ଇସାବ୍ଦାନ୍ ଅରେନ୍ ଅରେନ୍ ଉଣ୍ତିଙ୍ଗ୍ ଉନ୍ଡ୍ରି ଉନ୍ଡ୍ରି ଓମର16:16 ଓମର - ଆଜିନାତ୍ ଲେକିସ୍ କିନିକା ୨ ଲିଟର ଇସାବ୍ଦାନ୍ ଆକା ଉଣ୍ଡା କିଦୁ । 17 ଆବେନୁ ଇସ୍ରାଏଲ ଲୋକୁ ଆୟାୱାଜା କିତାର୍; ଏର୍ ନାଣ୍ଡ ଏର୍ ଉଣା ଉଣ୍ଡା କିତାର୍ । 18 ୱାର୍ ଓମରଦୁ ଆକା ଲେକିସ୍ନାର୍; ଏନ୍ ନାଣ୍ଡ୍ ଉଣ୍ଡା କିତା ମାର୍ହାନ୍, ୱାନିଦି ଏଜେଏତାତ୍, ମାରି, ଏନ୍ ଅଡ଼ପ୍ ଉଣ୍ଡା କିତାମାର୍ହାନ୍, ୱାନିଦି ଉଣା ଆଏତାତ୍; ଇୟାୱାଜା ୱାର୍ ଉଣି ଶାକ୍ତି ଇସାବ୍ଦାନ୍ ଉଣ୍ଡା କିତାର୍ । 19 ଇୟାୱେନ୍କା ମୋଶା ୱାରିଙ୍ଗ୍ ଇର୍ହାନ୍, "ମିର୍ ଏନ୍ବା ସାଲ୍ଦି ଆନି ବେଡ଼ାଦୁ ଇନ୍କାବା ଇଡ୍ମାଟ୍ ।" 20 ଇର୍ରିଙ୍ଗ୍ବା ୱାର୍ ମୋସାଦି ମାଟା ମାନାଏଜି ଏର୍ ଏର୍ ସାଲ୍ଦି ସାନ୍ଦି କାଣ୍ଡେକ୍ କାଣ୍ଡେକ୍ ଇଟ୍ତାର୍; ମାତର ଆବେନୁ ପିଡ଼ୁକୁ ଆତେ ମାରି କାପୁ ଆତାତ୍ । ଆଦେଙ୍ଗ୍ ମୋଶା ୱାରି ମୁସୁକୁ ରିସା ଆତାନ୍ । 21 ଇୟାୱାଜା ୱିଜୁଦିନ୍ ସାଲ୍ଦି ସାନ୍ଦି ୱାର୍ ନିଜେ ନିଜେଦି ଉଣି ଶାକ୍ତି ଇସାବ୍ଦାନ୍ ଆକା ଉଣ୍ଡା କିତାର୍; ମାତର ନାଣ୍ଡ୍ ତେର୍ୱେଲ୍ ଆତାତ୍, ଆକା ତର୍ଲେ ଆତାତ୍ ।
22 ସୋଦିନ୍ ଲୋଇ ୱାର୍ ଦୁଇଗୁଣ, ଇର୍ରିଙ୍ଗ୍, ୱିଜେରେ ରିଏର୍ ରିଏର୍ ଓମର କାଦି ଉଣ୍ତା କିତାର୍, ଆବେନୁ ମଣ୍ଡଲିଦି ପେରିକାର୍ ୱିଜେରେ ୱାଜି ମୋସେଙ୍ଗ୍ ୱେର୍ତାର୍ । 23 ନାସ୍ତିୱାଲେ ମୋଶା ୱାରିଙ୍ଗ୍ ଇର୍ହାନ୍, "ସଦାପ୍ରବୁ ଆକା ଇର୍ହାମାନାନ୍, ୱିଗେ ରୋମ୍ନି ଦିନ୍, ଇର୍ରିଙ୍ଗ୍, ସଦାପ୍ରବୁଦି ଆଗ୍ଡ଼ି ପବିତ୍ର ଦିନ୍ ଆନାତ୍; ଇୟା ଉଣ୍ତିଙ୍ଗ୍ ମି ଆମାକା ଏସ୍ନିକା ମାନାତ୍, ଆକା ଏସ୍ତୁ; ଆମାକା ୱାର୍ନିକା ମାନାତ୍, ଆକା ୱାର୍ଦୁ; ମାରି ଆମାକା ତେବାଜିନାତ୍, ଆକା ସାଲ୍ଦି ସାନ୍ଦି ଉଣ୍ତା କିଜି ଇଡ୍ଦୁ ।" 24 ଆବେନୁ ୱାର୍ ମୋଶାଦି ମାଟା ଇସାବ୍ଦାନ୍ ସାଲ୍ଦି ସାନ୍ଦି ଆକା ଇଟ୍ତାର୍, ମାରି ଆକା ବାସ୍ନା ଆଏତାତ୍, କି ଆବେନୁ ଇନି ପିଡ଼ୁକୁ ଆଉତେ । 25 ମୋଶା ଇର୍ହାନ୍, "ନେର୍ ମିର୍ ଆକା ଉଣ୍ଡୁ, ଏନ୍ଦାଇର୍ରିଙ୍ଗ୍ ନେର୍ ସଦାପ୍ରବୁଦି ରୋମ୍ନି ଦିନ୍; ନେର୍ କିଡ଼ିଇଦୁ ଆକା ପୁଟ୍ଏତ୍ । 26 ମିର୍ ସୋ ଦିନ୍ ଆକା ଉଣ୍ଡା କିନିଦେର୍, ମାତର ସାତ୍ ଦିନ୍ତୁ ରୋମ୍ନି ଦିନ୍, ଆବେନୁ ଇନିକାବା ପୁଟ୍ଏତ୍ । 27 ଇର୍ରିଙ୍ଗ୍ବା ସାତ୍ ଦିନ୍ତୁ ଏର୍ ଏର୍ ଆକା ଉଣ୍ଡା କିଦେଙ୍ଗ୍ ସର୍ହାର୍, ମାତର ଇନିକା ପୁଟ୍ଏତାତ୍ । 28 ଆବେନୁ ସଦାପ୍ରବୁ ମୋସେଙ୍ଗ୍ ଇର୍ହାନ୍, ମିର୍ ମା ମାଟା ମାରି ନିୟମ୍ ମାନାଦେଙ୍ଗ୍ ଏସ ଦିନ୍ ରାଜି ଆଏଣ୍ତା ମାନ୍ଜିନିଦେର୍ ? 29 ସୁଡ଼ୁଦୁ, ସଦାପ୍ରବୁ ମିଙ୍ଗିଁ ରୋମ୍ନି ଦିନ୍ ସିତି ଉଣ୍ତିଙ୍ଗ୍ ସୋ ଦିନ୍ତୁ ରୁଣ୍ଡି ଦିନ୍ତି ଉଣିକା ସିଜିନାନ୍; ମିର୍ ୱିଜେରେ ସାତ୍ ଦିନ୍ତୁ ନିଜେ ନିଜେଦି ବାଡିଦାନ୍ ଆତ୍ରେ ସଲୋଏଣ୍ଡା ଆଜି ନିଜେ ନିଜେଦି ବାଡ଼ିଦୁ ମାନ୍ଡ଼୍ରୁ ।" 30 ଆଦେଙ୍ଗ୍ ଲୋକୁ ସାତ୍ଦିନ୍ତୁ ରୋମିତାର୍ । 31 ମାରି, ଇସ୍ରାଏଲ କୁଟୁମ୍ଦିକାର୍ ଆୟା କାଦିଦି ଦରୁ ମାନା ସିତାର୍; ଆକା ଦାନିଆ ପାଡ଼ୁ ୱାଜା ଅଡ଼ିନାତ୍ ମାରି ଆୟାତାନି ନିଟ୍ନିକା ପୁକି ମିସାତି ରୁଟି ୱାଜା ମାର୍ହାତ୍ । 32 ମୋଶା ଇର୍ହାନ୍, "ସଦାପ୍ରବୁ ଇୟା ମାଟା ୱେର୍ତା ମାନାନ୍, ୱାନ୍ ମିଙ୍ଗିଁ ମିସର ଦେସ୍ଦାନ୍ ତାତି ବେଡ଼ାଦୁ ସାରିଦୁ ଆମା ଆନାମ୍ ଉଟ୍ପିସ୍ କିତାନ୍, ଆକା ଏଣ୍ଡେସ୍କି ମି କଡ଼କକ୍ରା ରିତି ନିତି ସୁଡ଼ୁନାର୍, ଇୟା ଉଣ୍ତିଙ୍ଗ୍ ୱାରି ଉଣ୍ତିଙ୍ଗ୍ ଉନ୍ଡ୍ରି ଓମର ଲେକିସ୍କିଜି ମାନା ଇଡ୍ଦୁ ।" 33 ନାସ୍ତିୱାଲେ ମୋଶା ହାରୋଣଙ୍ଗ୍ ଇର୍ହାନ୍, ନିନ୍ ଉନ୍ଡ୍ରି ସାଟି ଅସି ଉନ୍ଡ୍ରି ଓମର ୱାଜା ମାନା ବର୍ତି କିଜି ସଦାପ୍ରବୁଦି ଆଗ୍ଡ଼ି ଇଡ୍ଆ; ଆକା ମି କଡ଼କକ୍ରାରି ଉଣ୍ତିଙ୍ଗ୍ ରିତି ନିତି ଉଣ୍ତିଙ୍ଗ୍ ଇଡାଇ ଆନାତ୍ । 34 ଆଦେଙ୍ଗ୍ ହାରୋଣ ମୋଶାଦି ଉଣ୍ତିଙ୍ଗ୍ ଇଜି ସଦାପ୍ରବୁଦି ମାଟା ଇସାବ୍ଦାନ୍ ସାକି ସିନ୍ଦୁକ୍ ଲାକ୍ତୁ ଇଡ୍ନି ଉଣ୍ତିଙ୍ଗ୍ ଆକା ଉଣ୍ଡା କିଜି ଇଟ୍ତାନ୍ । 35 ଇସ୍ରାଏଲ ଲୋକୁ ବାସାତି ଦେସ୍ତୁ ଇତି ସାନ୍ଦି ସାଲିସ୍ ବାର୍ସେକ୍ ସାନ୍ଦି ଆୟା ମାନା ଉଣୁଜି ମାର୍ହାର୍ ମାରି କିଣାନ୍ ଦେସ୍ତି ରାଜିଦୁ ଇତି ସାନ୍ଦି ୱାର୍ ଆକା ଉଣୁଜି ମାର୍ହାର୍ । 36 ଉନ୍ଡ୍ରି ଓମର ଐପାଦି16:36 ଉଡ୍ରେ ଐପାଦି ଇସାବ୍ ଦାସ୍ ବାଗ୍ତାନ୍ ଉଡ୍ରେ ବାଗ୍ ଓମର । ୨୩ ଲିଟର ଦାସବାଗ୍ତାନ୍ ଉଡ୍ରେ ବାଗ୍ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)