1 ମାପୁରୁ ମୋଶା ଉଣ୍ତିଙ୍ଗ୍‌ ମାରି ନିଜେ ଲୋକାଙ୍ଗ୍‌ ଇସ୍ରାଏଲଦି ଲୋକା ଉଣ୍ତିଙ୍ଗ୍‌ ଆମା ଆମା ପାଣି କିତା ମାନାନ୍‌, ଇର୍ରିଙ୍ଗା ଇସ୍ରାଏଲ କୁଟୁମ୍‌ଦିଙ୍ଗ୍‌ ମିସରଦାନ୍‌ ଏଣ୍ଡେସ୍‌ ସପ୍‌ସି ତାତାନ୍‌, ଇୟା ୱିଜୁ ମାଟା ମୋଶାଦି ପତେଲ୍‌ସି ମିଦିୟନିୟ ଜାଜକ ଜିତ୍ର ୱେଡ୍ରେଙ୍ଗ୍‌ ଆଟ୍‌ତାନ୍‌ । 2 ଆବେନୁ ମୋଶାଦି ପତେଲ୍‌ସି ଆୟା ଜିତ୍ର ନିଜେଦି ଇନ୍‌ଡ୍ର ୱାତି ମୋସାଦି ଆଡ଼ି ସିପରାଦିଙ୍ଗ୍‌ ମାରି ତାନି ରିଏର୍‌ ମାରିନ୍‌କାଙ୍ଗ୍‌ ଅର୍‌ସେ ଅତାନ୍‌ । 3 ଆୟା ରୁଣ୍ଡି ମାରିନ୍‌କା ଲୋଇ ଅରେନ୍‌ ୱାନି ଦର୍‌ ଗେର୍ଶୋମ୍‌,*18:3 ଗେର୍ଶୋମ୍‌ ଇୟା ବାଡିଦୁ ବାସାନିକାନ୍‌ ଇର୍ରିଙ୍ଗା ୱାନ୍‌ ଇର୍ହା ମାର୍ହାନ୍‌, "ନାନ୍‌ ଆଇ ଦେସ୍‌ତୁ ବାସାକିନିକାନ୍‌ ଆତା ।" 4 ମାରି ଅରେନ୍‌ ୱାନି ଦର୍‌ ଇଲିୟେଜର୍‌,*18:4 ଇଲିୟେସର ଅର୍ତ ମାପୁରୁ ନାଙ୍ଗିଁ ସାକାକିନିକାନ୍‌ ଇର୍ରିଙ୍ଗ୍‌ ୱାନ୍‌ ଇର୍ହା ମାର୍ହାନ୍‌, ନା ବୁବାଦି ମାପୁରୁ ନା ଉପକାର୍‌ ଆଜି ପାରୋଦି କାଣ୍ତାଦାନ୍‌ ନାଙ୍ଗି ରକିୟା କିତାନ୍‌ । 5 ଇୟାୱେନ୍‌କା ମୋଶାଦି ମାମା ଜିତ୍ର, ମୋଶାଦି ଆୟା ରିଏର୍‌ କଡ଼ର୍‌ ମାରି ଆଡ଼ିଙ୍ଗ୍‌ ଅର୍‌ସେ ଆସ୍‌ସି ବାଲିବାଟାଦୁ ମୋସାଦି ଲାକ୍‌ତୁ, ଇର୍ରିଙ୍ଗ୍‌, ମାପୁରୁଦି ଗରନତୁ ଆମା ବାଡିଦୁ ୱାନ୍‌ ବାସା କିତା ମାର୍ହାନ୍‌, ଆୟା ବାଡିଦୁ ୱାତାର୍‌ । 6 ମାରି, ୱାନ୍‌ ମୋସେଙ୍ଗ୍‌ ୱେର୍‌ତାନ୍‌, "ନି ପତେଲ୍‌ ଜିତ୍ର, ନାନ୍‌ ମାରି ନି ଆଡ଼ି, ୱାନି ୱାଲେ ନି ରିଏର୍‌ ମାରିନ୍‌କୁ, ମାପ୍‌ ୱିଜେରେ ନି ଲାକ୍‌ତୁ ୱାତାମାନାପ୍‌ ।" 7 ନାସ୍ତିୱାଲେ ମୋସା ନିଜେଦି ପତେଲ୍‌ ୱାଲେ ମିସାଦେଙ୍ଗ୍‌ ଆତ୍ରେ ସୋଲ୍‌ସି ୱାନିଙ୍ଗ୍‌ ମାଡ଼ିସ୍‌ କିଜି ମାରି ନଣ୍ଡିତାନ୍‌; ମାରି, ନିଜେ ନିଜେଦି ନେଗି ମାଟା ୱାର୍‌ଗିତି ୱେନ୍‌କା ୱାର୍‌ ଗୁଡ଼ାଦୁ ଡ଼ୁଗିତାର୍‌ । 8 ସଦାପ୍ରବୁ ଇସ୍ରାଏଲ ଉଣ୍ତିଙ୍ଗ୍‌ ପାରୋଦି ଉଣ୍ତିଙ୍ଗ୍‌ ମାରି ମିସ୍ରିୟରିଙ୍ଗ୍‌ ଆମା ଆମାକା କିତାମାନା, ସାରିଦୁ ୱାରି ଉଣ୍ତିଙ୍ଗ୍‌ ଆମା ୱିଜୁ କାସ୍ଟୁ ଗଟାତା ମାନାତ୍‌ ମାରି ସଦାପ୍ରବୁ ଏଣ୍ଡେସ୍‌ ୱାରିଙ୍ଗ୍‌ ରକିୟା କିତାମାନାନ୍‌, ଇୟାୱିଜୁ ମାଟା ମୋସା ନିଜେଦି ପତେଲ୍‌ତିଙ୍ଗ୍‌ ଇର୍ହାନ୍‌ । 9 ଆବେନୁ ସଦାପ୍ରବୁ ମିସ୍ରିୟ ଲୋକା କିୟୁଦାନ୍‌ ଇସ୍ରାଏଲ ଲୋକାଙ୍ଗ୍‌ ରକିୟା କିଜି ଆମା ୱିଜୁ ନେଗି ମାଟା ସିତାମାନାନ୍‌, ଆୟା ଉଣ୍ତିଙ୍ଗ୍‌ ଜିତ୍ର ନାଣ୍ଡ ୱେଡ଼ିକା ଆତାନ୍‌ । 10 ମାରି, ଜିତ୍ର ଇର୍ହାନ୍‌, "ଆମା ସଦାପ୍ରବୁ ମିସ୍ରିୟରି ମାରି ପାରୋଦି କିୟୁଦାନ୍‌ ମିଙ୍ଗିଁ ରକିୟା କିତାମାନାନ୍‌, ମାରି ମିସ୍ରିୟରି ମାଣାନ୍‌ ଲୋକାଙ୍ଗ୍‌ ରକିୟା କିତାମାନାନ୍‌, ୱାନ୍‌ ଦନ୍ୟ । 11 ସଦାପ୍ରବୁ ୱିଜୁ ଦିୟାମ୍‌କା ମାଣାନ୍‌ ନାଣ୍ଡ ପେରିକାନ୍‌, ଇକା ନାନ୍‌ ଇଲେଇ ନେସ୍‌ତା । ହୁଁ, ୱାର୍‌ ଆମା ବିସୟ୍‌ଦାନ୍‌ ୱାରି ବିରୁଦ୍ଧତାନ୍‌ ଗର୍ବ କିଜି ମାର୍ହାର୍‌ ଆୟା ବିସୟ୍‌ତାନ୍‌ ୱାନ୍‌ ପେରିକାନ୍‌ ।" 12 ମୋଶାଦି ପତେଲ୍‌ ଜିତ୍ର ମାପୁରୁଦି ଆଗ୍‌ଡ଼ି ହୋମବଲି ମାରି ପୁଜା ସିତାନ୍‌; ମାରି, ହାରୋଣ ମାରି ଇସ୍ରାଏଲଦି ୱିଜେରେ ପେରିକାର୍‌ ୱାଜି ମାପୁରୁଦି ଆଗ୍‌ଡ଼ି ମୋଶାଦି ମାମା ୱାଲେ ଉଟାର୍‌ ।

13 ଆୟା ମାରି ଅର୍‌ଲେଣ୍ଡ୍‌ ମୋସା ଲୋକାଦି ବିସାର୍‌ କିଦେଙ୍ଗ୍‌ ବାସ୍‌ତାନ୍‌, ଲୋକୁ ସାଲ୍‌ଦିରାନ୍‌ ୱେଡ଼ା ଆନି ସାନ୍ଧି ୱାନି ଆଗ୍‌ଡ଼ି ନିଲ୍‌ତା ମାର୍ହାର୍‌ । 14 ନାସ୍ତିୱାଲେ ମୋସା ଲୋକା ବିସୟ୍‌ ଆମାକା ଆମାକା ଇର୍ହାନ୍‌, ୱାନି ପତେଲ୍‌ସି ଆକା ସୁଡ଼ୁଜି ଇର୍ହାନ୍‌, "ନିନ୍‌ ଲୋକା ଉଣ୍ତିଙ୍ଗ୍‌ ଇକା ଏଣ୍ଡେସ୍‌ ବ୍ୟବହାର୍‌ କିଜିନି ? ନିନ୍‌ ଏନ୍ଧା ଅରେନ୍‌ ବାସ୍‌ସିନି ? ମାରି ୱିଜୁ ଲୋକୁ ସାଲ୍‌ଦିରାନ୍‌ ୱେଡ଼ା ଆନି ସାନ୍ଧି ନି ସାରିବେଡ଼େତି ଏନ୍ଧା ନିନା ମାନାର୍‌ ?"

15 ଆବେଟ୍‌ ମୋସା ନିଜେଦି ମାମେଙ୍ଗ୍‌ ଇର୍ହାନ୍‌, ଲୋକୁ ମାପୁରୁଦି ବିସାର୍‌ ବୁଜାନି ଉଣ୍ତିଙ୍ଗ୍‌ ନା ଲାକ୍‌ତୁ ୱାନାର୍‌ 16 ମାରି ୱାର୍‌ ଇନିକା ଜାଟିଙ୍ଗ୍‌ ଆତିଙ୍ଗ୍‌ବା, ନା ଲାକ୍‌ତୁ ୱାନାର୍‌; ଆବେନୁ ନାନ୍‌ ଦସି ମାରି ଦସ୍‌ ସିଲି ୱାନି ଲୋଇ ବିସାର୍‌ କିନା, ମାରି ମାପୁରୁଦି ବିଦି ମାରି ବ୍ୟବସ୍ଥା ୱିଜୁ ୱାରିଙ୍ଗ୍‌ ବୁଜାକିନାନ୍‌ ।

17 ଇୟାୱେନ୍‌କା ମୋସାଦି ପତେଲ୍‌ ଇର୍ହାନ୍‌, "ନି ଇୟା ପାଣି ନେଗିକା ଆହେତ୍‌ । 18 ନିନ୍‌ ମାରି ନି ସାଙ୍ଗ୍‌କୁ ଇୟା ଲୋକୁ ରିଏର୍‌ ସତେନେ ଜିରାନିକା; ଇରିଙ୍ଗ୍‌ ଇୟା ପାଣି ନି ଉଣ୍ତିଙ୍ଗ୍‌ ନାଣ୍ଡ୍‌ ବଜୁ; ନିନ୍‌ ଅରେନ୍‌ ନେ ଇକା କିଦେଙ୍ଗ୍‌ ଆଟ୍‌ଇ । 19 ଇୟା ଉଣ୍ତିଙ୍ଗ୍‌ ନା ମାଟାଦିଙ୍ଗ୍‌ ମୋନ୍‌ସିଆ, ନାନ୍‌ ନିଙ୍ଗିଁ ଇନା, ମାରି ମାପୁରୁ ନି ୱାଲେ ମାନିନ୍‌; ମାପୁରୁଦି ଲାକ୍‌ତୁ ନିନ୍‌ ଲୋକା ତରିନ୍‌ ଆଜି ୱାରି ମାଟା ମାପୁରୁଦି ଲାକ୍‌ତୁ ୱେର୍‌ଆ । 20 ମାରି, ନିନ୍‌ ୱାରିଙ୍ଗ୍‌ ବିଦି ମାରି ନିୟମ୍‌ଦି ଆଦେସ୍‌ ସିଆ ମାରି ୱାରିଙ୍ଗ୍‌ ନେଗି ସାରି ମାରି ନେଗିପାଣି ତର୍‌ଆ । 21 ମାରି, ନିନୁ ଇୟା ଲୋକା ମାଣାନ୍‌ ପାଣି କିନିକା, ଇରିଙ୍ଗାଁ, ମାପୁରୁଦି ଉଣ୍ତିଙ୍ଗ୍‌ ତିଲାନିକାର୍‌, ସତ୍‌ତାନ୍‌ ମାରି ଅନ୍ୟାୟ ମାରି ଲୋବ୍‌ କାଡ଼୍‌ନି ଲୋକାଙ୍ଗ୍‌ ବାସେକିଆ; ମାରି, ୱାରିଙ୍ଗ୍‌ ଲୋକା ମୁସୁକୁ ଅଜାର୍‌ ଲୋକାଙ୍ଗ୍‌, ଶହେ ଲୋକାଙ୍ଗ୍‌, ପଚାସ୍‌ ଲୋକାଙ୍ଗ୍‌ ମାରି ଦସ୍‌ ଲୋକାଙ୍ଗ୍‌ ୱାଜା ବାସେ କିଆ । 22 ୱାର୍‌ ୱିଜୁଦିନ୍ ଲୋକା ବିଚାର୍‌ କିପିର୍‌, ମାରି ଏମେ ପେରିମାଟା ଆତିଙ୍ଗାଁ ନି ଲାକ୍‌ତୁ ତାନାର୍‌, ମାତର ଇସ୍‌ରି ମାଟା ୱିଜୁ ୱାର୍‌ ବିସାର୍‌ କିନାର୍‌, ଆଦେଙ୍ଗ୍‌ ନି ପାଣି ଉସାସ୍‌ ଆନାତ୍‌, ମାରି ୱାର୍‌ ନି ୱାଲେ ବଜୁ ପିଣ୍ଡ୍‌ନାର୍‌ । 23 ନିନ୍‌ ଜଦି ଇୟାୱାଜା କିନି, ମାରି ମାପୁରୁ ଇୟାୱାଜା କିଦେଙ୍ଗ୍‌ ମାଟା ସିନାନ୍‌, ଆଦେଙ୍ଗ୍‌ ନିନ୍‌ ୱେନ୍‌ଡ୍ରେଙ୍ଗ୍‌ ଆଟ୍‌ନି, ମାରି ଇୟାୱିଜୁ ଲୋକୁ ସାନ୍ତିଦାନ୍‌ ନିଜେଦି ବାଡିଦୁ ସନାର୍‌ ।"

24 ଇୟାୱେନ୍‌କା ମୋଶା ନିଜେଦି ପତେଲ୍‌ ମାଟା ମାନାଜି ୱାନି ମାଟା ଇସାବ୍‌ଦାନ୍‌ ୱିଜୁ ପାଣି କିତାନ୍‌ । 25 ମାରି ମୋଶା ପୁରାୱିଜୁ ଇସ୍ରାଏଲଦି ମାଣାନ୍‌ ପାଣିକିନି ଲୋକାଙ୍ଗ୍‌ ଆସ୍‌କିଜି ଲୋକା ମୁସୁକୁ ପେରିକାନ୍‌, ଇର୍ରିଙ୍ଗ୍‌, ଆଜାର୍‌ ଲୋକା ମୁସୁକୁ ଅରେନ୍‌ ନେତା, ଶହେ ଲୋକା ମୁସୁକୁ ଅରେନ୍‌ ନେତା, ପଚାସ୍‌ ଲୋକା ମୁସୁକୁ ଅରେନ୍‌ ନେତା ମାରି ଦସ୍‌ ଲୋକା ମୁସୁକୁ ଅରେନ୍‌ ନେତା ୱାଜା ବାସେ କିତାନ୍‌ । 26 ଆଦେଙ୍ଗ୍‌ ୱାର୍‌ ୱିଜୁ ୱେଡ଼ାଦୁ ଲୋକା ବିସାର୍‌ କିତାର୍‌; ପେରି ବିସାର୍‌ ୱିଜୁ ମୋଶା ଲାକ୍‌ତୁ ତାତାର୍‌; ମାତର ଇସ୍‌ରି ଇସ୍‌ରି ମାଟା ୱିଜୁ ନିଜେ ନିଜେ ବିସାର୍‌ କିତାର୍‌ । 27 ଇୟାୱେନ୍‌କା ମୋଶା ନିଜେ ପତେଲ୍‌ତିଙ୍ଗ୍‌ ପକ୍‌ସି, ୱାନ୍‌ ନିଜେଦି ବାଡିଦୁ ସର୍ହାନ୍‌ ।