1 ଇୟାୱେନ୍‌କା ପ୍ରବୁ ଇୟାୱିଜୁ ମାଟା ଇର୍ହାନ୍‌, 2 "ଏନ୍‌ ମିଙ୍ଗିଁ ଦାସ୍‌ ଇଲୁଦି ୱାଜା ମିସର ଦେସ୍‌ତାନ୍‌ ସୋପ୍‌ସି ତାତାମାନାନ୍‌, ମି ଆୟା ପ୍ରବୁ ମାପୁରୁ ନାନ୍‌ ।"

3 ନା ଆଗ୍‌ଡ଼ି ମାରି ମି ଏମେ ଦେୟାମ୍‌ ସିଲେ ।

4 ମିର୍‌ ନିଜେଦି ଉଣ୍ତିଙ୍ଗ୍‌ ଏମେ ବମା ତିଆର୍‌ କିମାଟ୍‌; କି ମୁସୁକୁପୁର୍‌, କି ଆଡ୍‌ଗିପୁର୍‌, ଦୁନିଆଦି ଆଡ୍‌ଗି ଏରୁଦୁ ମାନି ଏମେ ଜିନିସ୍‌ ବା ତାନି ବମା ତିଆର୍‌ କିମାଟ୍‌ । 5 ମିର୍‌ ୱାନିକାଙ୍ଗ୍‌ ମାଡ଼ିସ୍‌ କିମାଟ୍‌, କି ୱାନିକାଙ୍ଗ୍‌ ସେବା କିମାଟ୍‌; ଏଣ୍ତେସ୍‌କି ନାନ୍‌ ମି ପ୍ରବୁ ମାପୁରୁ ନିଜେ ଗୌରବ୍‌ ରକିୟାକିନି ମାପୁରୁ ନେ, ମାରି, ଏମେକାର୍‌ ନାଙ୍ଗି କାଡ଼୍‌ନାର୍‌, ନାନ୍‌ ୱାରିଙ୍ଗ୍ ମୁଣ୍ଡ୍ରି ମାରି ନାଲ୍‌ଗି ପିଡ଼ି ସାନ୍ଦି ୱାରି କଡ଼ରି ମୁସୁକୁ ପୁର୍ବେଦିବୁବାରି ପାପ୍‌ଦି ଦଣ୍ଡ୍‌ ସିନା । 6 ମାତର ଆମାକାର୍‌ ନାଙ୍ଗି ଜିବନ୍‌ନୋନାର୍‌ ମାରି ନା ମାଟା ମାନାନାର୍‌, ନାନ୍‌ ୱାରିଙ୍ଗ୍‌ ଆଜାର୍‌ ଆଜାର୍‌ ବାର୍ସେକ୍‌ କୁଟୁମ୍‌ ସାନ୍ଦି ଦୟା କିନିକାର୍‌ ।

7 ମିର୍‌ ନିଜେଦି ପ୍ରବୁ ମାପୁରୁଦି ଦର୍‌ ମିସ୍‌ଦାନ୍‌ ଆସ୍‌ମାଟ୍‌; ଏଣ୍ତେସ୍‌କି ଏନ୍‌କି ୱାନି ଦର୍‌ଦିଙ୍ଗ୍‌ ମିସ୍‌ଦାନ୍‌ ଆସ୍‌ନାନ୍‌, ପ୍ରବୁ ୱାନିଙ୍ଗ୍‌ ଦସି ଇଜି ଦଣ୍ତ୍‌ ସିନାନ୍‌ ।

8 ରମ୍‌ନି ଦିନ୍‌ ପବିତ୍ର ୱାଜା ମାନାଦେଙ୍ଗ୍‌ ଏତ୍‌ କିଦୁ । 9 ସୋଦିନ୍‌ ପାଣି ମାରି ନିଜେଦି ୱିଜୁ ପାଣି କିନିଦେର୍‌; 10 ମାତର ସାତ୍‌ ଦିନ୍‌ ମି ପ୍ରବୁ ମାପୁରୁଦି ରମ୍‌ନି ଦିନ୍‌; ଆବେଟ୍‌ ମିର୍‌, ମି ମାରିନ୍‌କୁ, ମି ଆଇଲିକ୍‌, ମି‌ ଦାସର୍‌, ମି କଡିଗରିଏଙ୍ଗ୍‌, ମି ଗାଡ଼୍‌ ଲାକ୍‌ତୁମାନି ଆଇ ଦେସ୍‌ତି ଲୋକୁ, ଏର୍‌ ଇନି ପାଣି ବା କିମାଟ୍‌ । 11 ଏଣ୍ତେସ୍‌କି ପ୍ରବୁ ବାଦଡ଼ ମାରି ଦୁନିଆ ମାରି ସାମ୍‌ଦୁର୍‌ ମାରି ବୁମିଦୁ ମାନି ୱିଜୁ ଜିନିସ୍‌ ସୋଦିନ୍‌ତାନ୍‌ ତିଆର୍‌ କିଜି ସାତ୍‌ ଦିନ୍‌ତୁ ରୋମିତାନ୍‌; ଇୟାଉଣ୍ଡିଙ୍ଗ୍‌ ପ୍ରବୁ ରୋମ୍‌ନି ଦିନ୍‌ତିଙ୍ଗ୍‌ ଆର୍ସିବାଦ୍‌ କିଜି ପବିତ୍ର କିତାମାନାନ୍‌ ।

12 ମିର୍‌ ନିଜେଦି ବୁବା ୟାୟାରିଙ୍ଗ୍‌ ମାନାଦୁ; ଆବେଟ୍‌ ମି ପ୍ରବୁ ମାପୁରୁ ମିଙ୍ଗିଁ ଏମେ ଦେସ୍‌ ସିନାନ୍‌, ଆୟା ଦେସ୍‌ତୁ ନିନୁ ନାଣ୍ଡ ବାର୍‌ସେକ୍‌ ଜିନି ।

13 ମିର୍‌ ଲୋକାଙ୍ଗ୍‌ ଡାକ୍‌ମାଟ୍‌ ।

14 ମିର୍‌ ଦାରି ପାଣି କିମାଟ୍‌ ।

15 ମିର୍‌ ଡଙ୍ଗାଁ କିମାଟ୍‌ ।

16 ମିର୍‌ ନିଜେଦି ଲୋକା ବିରୁଦ୍‌ତାନ୍‌ ମିଚ୍‌ ସାକି ସିମାଟ୍‌ ।

17 "ମିର୍‌ ନିଜେଦି ଲୋକା ଇଲୁଦିଙ୍ଗ୍‌ ଲୋବ୍‌ ଆମାଟ୍‌, ମିର୍‌ ନିଜେଦି ପାଡ଼ାକାଦି ଆଇମାଦିଙ୍ଗ୍‌, କି ଦାସର୍‌, କି ଦାସି, ୱାରି କଡିଙ୍ଗ୍‌, କି ଗଦ, କି ମି ପାଡ଼ାକାଦି ଲୋକାଦି ଏମେ ଜିନିସ୍‌ତିଙ୍ଗ୍‌ ଲବ୍‌ କିମାଟ୍‌ ।"

18 ନାସ୍ତିୱାଲେ ୱିଜୁ ଲୋକୁ ବାଦଡ଼ ଡିଡ଼ିନିକା ମାରି ମିର୍‌ସ୍‌ନିକା ମାରି ବାଜା ମୋରି ଆଉଲି ମାରି ଗୋଇ ୱାଜା ଗରନ୍‌ତୁ ସୁଡ଼ୁତାର୍‌; ମାରି, ଆକା ସୁଡ଼ୁଜି ୱାର୍‌ ତିଲାଜି ଆକ ନିର୍ହାର୍‌ । 19 ମାରି ୱାର୍‌ ମୋସେଙ୍ଗ୍‌ ଇର୍ହାର୍‌, "ନିନ୍‌ ମା ୱାଲେ ୱାର୍‌ଗିଆ, ମାପ୍‌ ୱେନାପ୍‌; ମାତର ମାପୁରୁ ମା ୱାଲେ ୱାର୍‌ଗିମାକିନ୍‌, ସିଲେତିଙ୍ଗ୍‌ ମାପ୍‌ ସାନାପ୍‌ ।"

20 ଆବେଟ୍‌ ମୋଶା ଲୋକାଙ୍ଗ୍‌ ଇର୍ହାନ୍‌, "ତିଲାମାଟ୍‌; ଇର୍ରିଙ୍ଗା ମିଙ୍ଗିଁ ପରିକା କିଦେଙ୍ଗ୍‌ ମାରି ମିର୍‌ ଏଣ୍ଡେସ୍‌ ପାପ୍‌ କିଇଦେର୍‌, ଇୟାଉଣ୍ଡିଙ୍ଗ୍‌ ନିଜେଦି ତିଲାନିକା ତର୍‌ତେଙ୍ଗ୍‌ ମାପୁରୁ ୱାତାମାନାନ୍‌ ।" 21 ଆଦେଙ୍ଗ୍‌ ଲୋକୁ ଆକ ନିର୍ହାମାର୍ହାର୍‌; ମାତର ଆମାବାନୁ ମାପୁରୁ ମାର୍ହାନ୍‌, କେବଲ ମୋଶା ଆୟା ନାଣ୍ତ ସିକାଟି ଲାକ୍‌ତୁ ସର୍ହାନ୍‌ ।

22 ଇୟାୱେନ୍‌କା ପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ଇସ୍ରାଏଲ ଲୋକାଙ୍ଗ୍‌ ଇୟା ମାଟା ଇନ୍‌ଆ, ନାନ୍‌ ମୁସ୍‌କୁପୁର୍‌ ମାନ୍‌ଜି ମି ୱାଲେ ୱାର୍‌ଗିତା, ଇୟାକା ମିର୍‌ ନିଜେ ସୁଡ଼ୁତି ମାନିଦେର୍‌ । 23 ଇୟାଉଣ୍ଡିଙ୍ଗ୍‌ ମିର୍‌ ମାଙ୍ଗିଁ ଡ଼ିସ୍‌ସି, ଆଇ ଦେୟାମ୍‌କୁ ତିଆର୍‌ କିମାଟ୍‌; ନିଜେଦି ଉଣ୍ତିଙ୍ଗ୍‌ ୱେଣ୍ତି ଦେୟାମ୍‌ ମାରି ବାଙ୍ଗାରାମ୍‌ଦି ଦେୟାମ୍‌ ତିଆର୍‌ କିମାଟ୍‌ । 24 ମିର୍‌ ନା ଉଣ୍ତିଙ୍ଗ୍‌ ଉନ୍‌ଡ୍ରି ସିକ୍‌ଲାଦି ବେଦି ତିଆର୍‌ କିନିଦେର୍‌, ମାରି, ଆୟା ମୁସୁକୁ ମି ପୋସାକିନି କଡି ହୋମବଲି* ମାରି ନେଗି ଉଣ୍ତିଙ୍ଗ୍‌ ପୁଜା ସିନିଦେର୍‌; ମାପ୍‌ ଆମା ୱିଜୁ ବାଡିଦୁ ନିଜେଦି ଦର୍‌ ଏତ୍‌ କିବିସ୍‌ନା, ଆୟା ୱିଜୁ ବାଡିଦୁ ନାନ୍‌ ମି ଲାକ୍‌ତୁ ୱାଜି ମିଙ୍ଗିଁ ଆର୍ସିବାଦ୍‌ କିନା । 25 ଜଦି ମିର୍‌ ନା ଉଣ୍ତିଙ୍ଗ୍‌ କାଲୁ ବେଦି ତିଆର୍‌ କିନିଦେର୍‌, ଆବେଟ୍‌ ପତ୍‌ତି କାଲୁଦାନ୍‌ ଆକା ତିଆର୍‌ କିମାଟ୍‌; ଇର୍ରିଙ୍ଗା ଆୟା ମୁସୁକୁ ମିର୍‌ ମି ସୁଡ଼ି ଇଟ୍‌ତିଙ୍ଗା, ଆକା ଅପବିତ୍ର କିନିଦେର୍‌ । 26 ମାରି ମି ନାଗ୍‌ଡ଼ା ନା ବେଦି ମୁସୁକୁ ଏଣ୍ଡେସ୍‌ ତରାଏତ୍‌, ଇୟା ଉଣ୍ତିଙ୍ଗ୍‌ ମିର୍‌ ପାଉଚ୍‌କୁ ସିଜି ନା ବେଦି ମୁସୁକୁ ସଲ୍‌ଇଦେର୍‌ ।"