18 ନାସ୍ତିୱାଲେ ୱିଜୁ ଲୋକୁ ବାଦଡ଼ ଡିଡ଼ିନିକା ମାରି ମିର୍ସ୍ନିକା ମାରି ବାଜା ମୋରି ଆଉଲି ମାରି ଗୋଇ ୱାଜା ଗରନ୍ତୁ ସୁଡ଼ୁତାର୍; ମାରି, ଆକା ସୁଡ଼ୁଜି ୱାର୍ ତିଲାଜି ଆକ ନିର୍ହାର୍ । 19 ମାରି ୱାର୍ ମୋସେଙ୍ଗ୍ ଇର୍ହାର୍, "ନିନ୍ ମା ୱାଲେ ୱାର୍ଗିଆ, ମାପ୍ ୱେନାପ୍; ମାତର ମାପୁରୁ ମା ୱାଲେ ୱାର୍ଗିମାକିନ୍, ସିଲେତିଙ୍ଗ୍ ମାପ୍ ସାନାପ୍ ।"
20 ଆବେଟ୍ ମୋଶା ଲୋକାଙ୍ଗ୍ ଇର୍ହାନ୍, "ତିଲାମାଟ୍; ଇର୍ରିଙ୍ଗା ମିଙ୍ଗିଁ ପରିକା କିଦେଙ୍ଗ୍ ମାରି ମିର୍ ଏଣ୍ଡେସ୍ ପାପ୍ କିଇଦେର୍, ଇୟାଉଣ୍ଡିଙ୍ଗ୍ ନିଜେଦି ତିଲାନିକା ତର୍ତେଙ୍ଗ୍ ମାପୁରୁ ୱାତାମାନାନ୍ ।" 21 ଆଦେଙ୍ଗ୍ ଲୋକୁ ଆକ ନିର୍ହାମାର୍ହାର୍; ମାତର ଆମାବାନୁ ମାପୁରୁ ମାର୍ହାନ୍, କେବଲ ମୋଶା ଆୟା ନାଣ୍ତ ସିକାଟି ଲାକ୍ତୁ ସର୍ହାନ୍ ।
ଜଜ୍ଞବେଦି ବିସୟ୍ତାନ୍ ନିୟମ୍
22 ଇୟାୱେନ୍କା ପ୍ରବୁ ମୋସେଙ୍ଗ୍ ଇର୍ହାନ୍, "ନିନ୍ ଇସ୍ରାଏଲ ଲୋକାଙ୍ଗ୍ ଇୟା ମାଟା ଇନ୍ଆ, ନାନ୍ ମୁସ୍କୁପୁର୍ ମାନ୍ଜି ମି ୱାଲେ ୱାର୍ଗିତା, ଇୟାକା ମିର୍ ନିଜେ ସୁଡ଼ୁତି ମାନିଦେର୍ । 23 ଇୟାଉଣ୍ଡିଙ୍ଗ୍ ମିର୍ ମାଙ୍ଗିଁ ଡ଼ିସ୍ସି, ଆଇ ଦେୟାମ୍କୁ ତିଆର୍ କିମାଟ୍; ନିଜେଦି ଉଣ୍ତିଙ୍ଗ୍ ୱେଣ୍ତି ଦେୟାମ୍ ମାରି ବାଙ୍ଗାରାମ୍ଦି ଦେୟାମ୍ ତିଆର୍ କିମାଟ୍ । 24 ମିର୍ ନା ଉଣ୍ତିଙ୍ଗ୍ ଉନ୍ଡ୍ରି ସିକ୍ଲାଦି ବେଦି ତିଆର୍ କିନିଦେର୍, ମାରି, ଆୟା ମୁସୁକୁ ମି ପୋସାକିନି କଡି ହୋମବଲି20:24 ମେଣ୍ଡା ମାରି ଡ଼ାକୁକଣ୍ତିଙ୍ଗ୍ ପୁଜା କିଜି କାତ୍ନିକା ମାରି ନେଗି ଉଣ୍ତିଙ୍ଗ୍ ପୁଜା ସିନିଦେର୍; ମାପ୍ ଆମା ୱିଜୁ ବାଡିଦୁ ନିଜେଦି ଦର୍ ଏତ୍ କିବିସ୍ନା, ଆୟା ୱିଜୁ ବାଡିଦୁ ନାନ୍ ମି ଲାକ୍ତୁ ୱାଜି ମିଙ୍ଗିଁ ଆର୍ସିବାଦ୍ କିନା । 25 ଜଦି ମିର୍ ନା ଉଣ୍ତିଙ୍ଗ୍ କାଲୁ ବେଦି ତିଆର୍ କିନିଦେର୍, ଆବେଟ୍ ପତ୍ତି କାଲୁଦାନ୍ ଆକା ତିଆର୍ କିମାଟ୍; ଇର୍ରିଙ୍ଗା ଆୟା ମୁସୁକୁ ମିର୍ ମି ସୁଡ଼ି ଇଟ୍ତିଙ୍ଗା, ଆକା ଅପବିତ୍ର କିନିଦେର୍ । 26 ମାରି ମି ନାଗ୍ଡ଼ା ନା ବେଦି ମୁସୁକୁ ଏଣ୍ଡେସ୍ ତରାଏତ୍, ଇୟା ଉଣ୍ତିଙ୍ଗ୍ ମିର୍ ପାଉଚ୍କୁ ସିଜି ନା ବେଦି ମୁସୁକୁ ସଲ୍ଇଦେର୍ ।"