Mateus 26

O Evrejska vodačija dogovorinena pe te mudaren e Isuse

1 Koga o Isus završingja sa adava, vakergja pe učenikonge: 2 "Sar so džanena panda duj dive o prazniko Pasha hem o Čhavo Manušeskoro ka ovel predajmo te čhiven le ko krsto."

3 Togaš o prvosveštenikija hem o starešine e Evrejengere khedinge pe ko dvoro e bare sveštenikoskoro so vikinela pe Kajafa 4 hem dogovoringe pe sar te astaren e Isuse ko hovajbe te šaj te mudaren le.

5 Ama phenge: "Na ko akava baro Prazniko, te na buninen pe o narodo."

E Isuseskoro pomazanie ki Vitanija

6 Dži kote sine o Isus ki Vitanija, ko kher e Simoneskoro o leprozno, 7 sar bešela sine ki sofra, ali jekh romni šišeja soj kerdo taro mermeri, a andre ki leste sine skupo mirizlivo ujle, i oj čhorgja le upro leskoro šero.

8 Koga o učenikija dikhle adava, holange hem pučle: "Soske bezveze čhorela pe akava ujle? 9 Akava mirizlivo ujle šaj sine te bikinel pe bute parenge hem o pare te del pe e čorolenge."

10 O Isus džangja so vakerena, i pučlja len: "Soske zakačinena akale romna? Oj kergja mange šukaripe. 11 O čorole manuša sekat ka oven uza tumende, ama me nane te ovav sekat tumencar. 12 Oj čhorindor adava mirizlivo ujle upra mande spremingja mo telo bašo parujbe. 13 Čače vakerava tumenge kote i te propovedinel pe o evangelije ko celo sveto, ka vakerel pe adava so kergja, te šaj sarine setinena pe ki late."

O Juda dogovorinela pe te predajnel e Isuse

14 Togaš jekh taro dešuduj učenikija, so vikinela pe sine Juda Iskariot, gelo ko prvosveštenikija 15 hem pučlja len: "Kozom pare ka den man ako predajngjum tumenge e Isuse?"

I ola platinge e Judaske trijanda srebrenikija. 16 Hem taro adava dive ov rodela sine šuži šanca te predajnel e Isuse.

O Isus bičhavela e učenikon te spreminen i Pasha

17 Ko prvo dive taro Prazniko e Beskvasno mareske, o učenikija ale uza ko Isus hem pučle: "Kaj mangeja te dža hem te kera tuke te ha o hajbe baši Pasha?"

18 O Isus odgovoringja lenge: "Džan ko gradi ko adava hem adava manuš hem vakeren leske: ‘O učiteli vakerela: Mo vreme tano paše. Tute ka slavinav i Pasha me učenikoncar.’ "

19 I o učenikija kerge sar so phengja lenge o Isus hem adathe spreminge o hajbe e Pashakoro.

O Isus phenela jekh taro dešuduj ka predajnel le

20 Koga rakjilo, o Isus bešla ki sofra pe dešuduje učenikoncar, 21 i dži kote hana sine o Isus phengja lenge: "Čače vakerava tumenge, jekh tumendar ka predajnel man."

22 Ola but razočarisalile, hem počminge te pučen le jekh po jekh: "Te na sijum me adava, Gospode?"

23 A ov odgovoringja lenge: "Adava so bolela mancar ki činija, ov ka predajnel man. 24 Čače o Čhavo Manušeskoro mora te merel sar soj pišimo, ama pharo adale manušeske so ka predajnel le! Pošukar ka ovel sine leske te na bijangjovel."

25 Togaš o Juda, o predavniko leskoro pučlja le: "Te na sijum me adava, Učitele?"

O Isus odgovoringja leske: "Agjar i sar so phengjan."

O Isus hala i posledno večera e učenikoncar

26 Dži kote hana sine, o Isus lela o maro, blagodaringja, phagla le hem dengja pe učenikonge hem phengja: "Len hem han, akavaj mo telo."

27 Togaš lela i čaša, blagodaringja hem dengja la lenge vakerindor: "Pijen latar sarine. 28 Akavaj mo rat e Zaveteskoro, so čhorgjola bute dženenge bašo oprostiba o grevija.