UUMUKWO 14

Mwambo wa bandu babakombolilwe

1 Bu’kapo nganimmona Mwana Ngondolo ayi’mi pakitu’mbi' sa Sayuni. Pamope nakwe baabile bandu mya yimo alubaini na nsese elupu bababile na lina lya Mwana Ngondolo na lina lya Tati' bake liandikilwe muibu’ngi' yabe. 2 Nganiliyu’wa lilobe kalibu’ka kunani kati mwagayota masi' gambone gagabutuka na mwago kati wa njai. Lilobe lyanaliyu’wine lyai kati ndu’ti ya bandu babaoneya ilimba. 3 Bandu bayi’mbage mwambo wayambi' nnu’ngi' ya kiti’gu' sa lenji na nnu’ngi' ya balu' yumbe nsese bene ukoti na balu' agoi. Ntu’pu' mundu ywaakombwi kwiyi’gana mwambo wo ila balu' mya yimo alubaini na nsese elupu bai, babaakosopolilwe bu’ka mudunia. 4 Bandu bo nga balu' bangali kwisapuya kwa alwawa, na bembe nga kati igoli. Abo bammi’ngi’ya Mwana Ngondolo kwokwoti kwayenda. Bakombolilwe bu’ka nkati ya bandu bi’ngi', no pangilwa mili’mbu' kwa Nnu’ngu' na kwa Mwana Ngondolo. 5 Bembe baalongeili ubu’su’bu’su' wala baabileli na lukoolo.