1 Samuel 16

Samwẹl obyeng Devid ana k’eso

1 Ọvaar Ibinọkpaabyi oben Samwẹl bẹ́, "M’abhom Saul atuma yen ch’ikk’ẹ mbhuma mach’ọvaarnọng kw’Israẹl? Tọka ana ke ny’ikọ k’mpyi, atima abina ozenga; m’ntọhm-ọ z’Jẹsẹ kw’ofon Bẹtẹlẹhẹm. Kaam kk’ojinọngnwa wanẹ kwẹ ntéka bẹ́, ode ọvaarnọng."

2 Samwẹl ọbọbh bẹ́, "M’nsi yen nta o? Ó̱de Saul ọbhaang odik nwa, m’ọfhọ-m ọfhọ."

Ọvaar Ibinọkpaabyi oben-ẹ bẹ́, "Tìma ọbhaamnwa ikwakwẹ zọhng, aben bẹ́, ‘Kk’nkwa bẹ́, mfọhnọ ẹja nnang Ọvaar Ibinọkpaabyi.’ 3 Yerẹ Jẹsẹ okwu ny’ẹjafọhnọ ndo, kaam m’nkọhk-ọ ọttọhk f’im’asi. Ọnọng nwo kw’im’nkọhk-ọ, kẹ kw’im’abyenga ana k’eso."

4 Samwẹl osi k’ose kw’Ọvaar Ibinọkpaabyi obenẹ. Ch’opyirẹ z’Bẹtẹlẹhẹm, asogbọhkọnọng p’obhon nwo mazẹ-ẹ nya o, matọma ofufọhnọ ch’makebh-ẹ. Mabọbh-ẹ bẹ́, "Ma, akwu k’ọdaam o?"

5 Samwẹl ọpọhna bẹ bẹ́, "Iye e, nkwu k’ọdaam e! Nkwu bẹ́, mfọhnọ ẹja nnang Ọvaar Ibinọkpaabyi. Mm’ado ifor sabọnga iwur, mọtọn ọd-ọfọhnọ ẹja." Nya o, odo Jẹsẹ ọmaana ajinọngva pẹ mawur, obir oyerẹ bẹ bẹ́, mator-ẹ ny’ẹja ndo.

6 K’ogbe kw’nkk’apyira, Samwẹl oze Eliyab, ochibhẹ bẹ́, "K’odik ọkkọkka, ọnọng kw’Ọvaar Ibinọkpaabyi ikk’otéka bẹ́, mabyeng-ẹ ana k’eso w’obe m’ititika s’Ọvaar Ibinọkpaabyi."

7 Okenaka, Ọvaar Ibinọkpaabyi oben Samwẹl bẹ́, "Ikkikkerẹ sẹ, wanẹma ebe chẹ kàsaana, kirẹ kaam kk’ẹ mbhuma. Ose kw’Ọvaar Ibinọkpaabyi od-oze idik, minna azang kw’oyokinọng od-oze. Oyokinọng od-okkerẹ m’mkpa s’ebir. Ṉ́nòde Ọvaar Ibinọkpaabyi, kẹ od-okkerẹ z’ettem."

8 Nya o, Jẹsẹ oyerẹ Abinadab, okwu ọkpan ny’ititika s’Samwẹl. Samwẹl oben bẹ́, "Ọvaar Ibinọkpaabyi nwoma kobir otéka." 9 Jẹsẹ obir osi Shama okwu ọkpan ny’ititika s’Samwẹl. Samwẹl oben bẹ́, "Ọvaar Ibinọkpaabyi nwoma kobir otéka." 10 Jẹsẹ osi ajinọngva pẹ achenọmfa, makpan ny’ititika s’Samwẹl. Samwẹl oben bẹ́, "Ọnọng kw’Ọvaar Ibinọkpaabyi oték ma kode." 11 Nya o, Samwẹl ọbọbh Jẹsẹ bẹ́, "Ajinọngva p’ayen maphyir bọ ma o?"

Jẹsẹ ọpọhna bẹ́, "Oyok kw’ikarẹ oning za e. Kẹ od-okkerẹ arọkimaan."

Samwẹl oben bẹ́, "Tọhm ọnọng oyer-ẹ, okwu. M’ẹwọr moninga maa okwu okebha mina ma."

12 Minna kw’Jẹsẹ ọtọhmọ, matima Devid akwu. Wa ojibhẹ k’ifor, oyen ikkikkerẹ ọkkọkka, obir ojibh ojinọng.

Nya o, Ọvaar Ibinọkpaabyi oben Samwẹl bẹ́, "Bina byeng-ẹ ana k’eso, kẹ wọ kw’ikk’nteka."

13 Minna kw’Samwẹl ọtọk mpyi nwo kw’ana, obyeng-ẹ ana ny’ivotte k’ititika. Tọma ny’ewu ndo, Egwugwuma ch’Ọvaar Ibinọkpaabyi ẹsaka ttara ẹfa, ẹnwa Devid k’ifor. Samwẹl o, obina ochina z’Rama.

Devid orukọ ọmaana Saul

14 M’ogbe nwa, Egwugwuma ch’Ọvaar Ibinọkpaabyi kk’Saul ọbọhk ẹtta, egwugwumatama ch’efon z’Ọvaar Ibinọkpaabyi ẹyak-ẹ odik.

15 Atọhmnọng p’Saul maben-ẹ bẹ́, "Kirẹ e, Ọvaar Ibinọkpaabyi wọ ọtọhmọ egwugwumatama nda bẹ́, ẹnang-ọ irem nja e. 16 Tte atte kwamina oben mina atọhmnọng pẹ p’aning ma bẹ́, mad-aror ọnọng kw’okpo ogim-ogim okikir. K’ogbe kw’egwugwumatama ch’efon z’Ibinọkpaabyi ẹnwọ-ọ k’ifor, kẹ min’od-okir ogim-ogim nwo, ọfha ọsọ-ọ aninga mawuriji."

17 Ofona nya o, Saul oben atọhmnọng pẹ bẹ́, "Màror ọnọng kw’okpo okira mawuriji, chen-m."

18 Ọtọhmnọng wanẹ ọpọhna bẹ́, "Kk’ojinọngnwa wanẹ kw’Jẹsẹ kw’ofon Bẹtẹlẹhẹm nza, kw’okpo ogim-ogim okikir. Kẹ ọbar ettem, obir ode okkikkaama. Okpo ọgbaakadik mawuriji, obir ojibh ojinọng. Ọvaar Ibinọkpaabyi obir oninga ọmaan-ẹ."

19 Ofona nya, Saul ọtọhm azeng-eden pẹ z’Jẹsẹ, oben-ẹ bẹ́, "Tọhm nnwa kwọ Devid, kw’od-okkerẹ arọkimaan chen-m." 20 Minna kw’Jẹsẹ ọtọk brẹd, obir ọtọka atuk k’ogberenwa, ọttara ovunwa, ọdabh k’ẹnyanya, ọtọhm pyẹ, ttara nnwa kwẹ Devid, ochena Saul.

21 Devid okwu oruk ọmaana Saul, ọtọma ọtọhm osisi ọmaan-ẹ. Kẹ Devid ọdaak Saul idik maa, okwu ode otim-egbongkpo kwẹ. 22 Nya o, Saul ọtọhm ẹkkaabha ọnang Jẹsẹ, oben-ẹ bẹ́, "Tte Devid ochina ororo k’ọtọhm faam, okurọ bẹ́, kaam kk’ettem ndaama mmaan-ẹ."

23 K’ogbe kpenamkpen kw’egwugwumatama ch’efon z’Ibinọkpaabyi ẹnwa Saul, Devid ọd-ọtọka ogim-ogim kwẹ okir. Minna kw’ifor id-ibhekẹ Saul, ibir igbọhk-ẹ. Egwugwumatama ndo ebir ẹttẹ-ẹ ọbọhk.