1 तीसवा वोरह्यान चौथा मोयनान पाचवे दिह, जेवी मी ठेरायेल बोंदिन विचीम कबार नेदीन मीरे इतो, तेवी ओहलो एनो काय हेरोग उगड़ेल एने मी बोगवानान देरसेन दिख्यो। 2 ✝1:2 1 राजा 4:10-16; 2 इतिहास 9:10 गुलामीन विचीम कसदीन देसाम, यहोयाकीम राजान राज ने पाचवा वोरह्या माय ताच मोयनान पाचवे दिह। 3 बोगवानान ज्य वचन बूजीन बेटाख यहेजकेल चाकऱ्या फाय कबार नेदीन मीरे पोचनो, एने ताहरी देखानो एने बोगवानान ताकेत ताहरी ता पोर एती।

4 जेवी मी देखणे बाज गीयो, ते मी उत्तेर उगे रेन एक बुत्यो आवतालो दिख्यो। एने मोटलो वादेल चारो उगे उजोड़ एने आक्‍ठान विचीम चोमेकतालो पितलान काह आवतालो देखानो।

5 ✝ 1:5 प्रकाशितवाक्य 4:6 तान माय जिवताला जेनवेरान गेत चार साप एता, तान वेह माणहान गेत एतो। 6 ता माय रेन आखान चार चार मुख एने चार चार फाके एता।

7 तान खुऱ्या हुतरा एने वासड़ान खुऱ्यान गेत एता, एने ता चोमकाड़ेल पितलान गेत चोमेकताला। 8 तान कावदेन फाका बुंदे माणहान गेत आथ एता एने ता चारून मुख एने फाके इह केरीन एता। 9 तान फाके एका दिहरा हेऱ्या जोड़ाईल एता, एने चालने बुखेत तान फाके वोलताला नाह; एने आखा जिव जिवान सोमोर हुतरा चालताला पुण नाह वोलताला।

10 तान मुख इह केरीन देखातालो; चार माय रेन आखान एक एक मुख माणहान गेत एतो, एने डाखरी उगे सिंहान गेत, एने जिवड़ी उगे एक एक मुख बोयलान गेत, एने चारून मुय गुवड़ान गेत एतो चालने बुखेत नाह वोलताला। 11 तान मुये ओहला एता। एने तान मुख एने फाके उपेर उगे आंग आंगे एता; आखा जीवान दुय दुय फाके एता, जा एक दिहरान फाका हेऱ्या जोड़ाय रियेल एता, एने दुय दुय फाका केरीन तान सेरीर डापायेल एतो। 12 आखान आखा ओंगाण हुतरा जाताला, जाहरी काहरी बी जीव जातालो, एने ता चालने बुखेत नाह वोलताला।

13 ता जीवताला जीवान वेह आक्‍ठान हेलेगताला कोल्यान गेत देखातालो, एने तो आक्‍ठो जीवान विचीम इही तिहे हेरकी तालो; तो आक्‍ठो उजोड़ पाड़तालो; एने ता आक्‍ठा केरीन विजली निकेलताली। 14 जीवान चालनो फिरनो विजलीन गेत जोरेस एतो।

15 जेवी मी ता जीवाह देखणेच बाज रियेल एतो, ते काय दिख्यो काय बुई पोर ता फाय चारू मुखान गेणती माय, एक-एक चाकारा एता। ✝1:15 यहेजकेल 10:9-13 16 ता चाकारान वेह एने बाणावोट इह केरीन एती, ता होनान मोणीन गेत पिपेलताला, एने चारू एक हारका देखाताला, एने आखा चाकारा इह केरीन बाणायेल एता, काय एक चाकारान विचीम दिहरो चाकारो रेय। 17 चालने बुखेत ता तान चार चोमखेर चाल सेकताला, एने चालने बुखेत नाह वोलताला। 18 ✝1:18 प्रकाशितवाक्य 4:8 ता चाकारान गोलाव जुलूम मोठा एने बिय आवी ओहला एता, एने ता चारू चाकारान गोलावा माय डोलाच डोला एता। 19 जेवी ता जीव चालताला, केदी ता जीव उपेर हवा माय उखलाताला, ते चाकारा बी ता हेऱ्या उखलाताला। 20 ता ताहरीच जाताला, जाहरी जीव ताह लिजाणे हुदे, एने चाकारा बी ता हेऱ्या उपेर उखलाताला, काहाकाय ता जीवान जीव ता चाकारा माय एती। 21 केरीन केदी जीव चालताला, ते चाकारा बी चालताला; केदी ता जीव उबरी जाताला ते चाकारा बी उबरी जाताला; केदी केदी ता जीव उपेर हवा जाताला ते चाकारा बी उपेर जाताला, काहाकाय तान जीव चाकारा माय इतो।

22 ✝ 1:22 प्रकाशितवाक्य 4:6 ता जीवान मुंडा पोर जोगणान गेत काह एतो जो ओहटान गेत बिवाड़े ओहलो चोमेकतालो, एने तो तान मुंडा पोर पोसरी रियेल एतो। 23 ज्या जुगमोन्डेल बुंदे आखा जीवान हुतरा फाके एता, एने आखा जीवान दुय दुय फाके एता जा केरीन तान सेरील डापायेल एतो। 24 ✝1:24 प्रकाशितवाक्य 1:4-15; 19:6 जेवी ता जीव चालताला, ते तान फाकान फोड़फोड़ आवाज माहु देरीयान पाण्यान खेकलो हारको, एने आखी ताकेतवाला आवाजा हारको, सेनान फड़फड़ान हारको आवाज आवतालो, जेवी ता उबरेताला, ते ता तान फाके नेड़ा केर लेताला। 25 जेवी ता उबरियेल एता एने तान फाके बुंदे वाल लेताला, तेवी तान मुंडा पोर जो जुगमोन्डोल इतो, ता पोर रेन एक आवाज होमलातालो। एने जेवी ता उबरेताला तेवी तान फाके नेड़ा केर लेताला।

26 ✝ 1:26 यहेजकेल 10:1; प्रकाशितवाक्य 4:2-3 तान मुंडी पोर जो जुगमोन्डोल इतो जो एक निलमोणीन राजगादिन गेत देखातालो, एने ज्यी उचाली राजगादी पोर माणहा हारको एगदो देखातालो। 27 मी तान कोमरान उपेर दिख्यो। काय चोमेकताला पितलान गेत देखातालो, ओहलो लागतालो काय आक्‍ठा माय बोरायेल एय, मी पुशो तान कोमरान बुंदे दिख्यो ते आक्‍ठान गेत देखातालो, एने तो चोमेकतालो उजेड़ ने गेत दिप पोड़तालो।

28 ✝ 1:28 यहेजकेल 8:2 जिह केरीन जेठवड़ीन दिह्या माय वादला माय बांड देखाह, तिहेच केरीन तान चार चोमखेर बोड़ाय देखातालो, बोगवानान ताकेत ओहलीच इतो, एने ताह देखीन, मी मुयान बोरहे जाय पुड़नो, तेवी मी एक सोबदो हुमल्यो जिह एगदो वातु किरेह।